ՄԻՆՉԵՎ 3 ՀԱ ՀՈՂՕԳՏԱԳՈՐԾՈՂ ՏՆՏԵՍՈՒԹՅՈՒՆՆԵՐԸ ԿՍՈՒԲՍԻԴԱՎՈՐՎԵՆ
Կառավարությունը մինչև 3 հա հող մշակող տնտեսություններին կսուբսիդավորի պարարտանյութի վաճառքի գնի 50 տոկոսը, բայց ոչ ավելի, քան 9 հազար դրամ: Փոքր ֆերմերները մատչելի գնով ձեռք կբերեն ազոտական, ֆոսֆորական, կալիումական պարարտանյութ: Գործադիրն այսպես է արձագանքում պարարտանյութերի շուկայում գնաճին:
Վահան Քերոբյան (ՀՀ էկոնոմիկայի նախարար) - Առավել խոշոր հողօգտագործողներն իրենց արտադրողականության հաշվին նվազեցնում են պարարտանյութի գնի ազդեցությունը վերջնական ապրանքի վրա: Հետևաբար, աջակցության կարիք ունեն փոքր ֆերմերները:
Հաշվի առնելով պարենային անվտանգության մարտահրավերները՝ Քերոբյանը կոչ արեց մշակել հողերը: Ակնհայտ է՝ սննդամթերքի գները աճելու են, գյուղատնտեսությունը դառնալու է ավելի հրապուրիչ: Փաշինյանը նկատեց՝ օրգանական պարարտանյութերի արտադրությունը չի զարգացել, մինչդեռ աշխարհում միտումներն այլ են. զուգահեռ էականորեն բարձրանում է օրգանիկ գյուղատնտեսական ապրանքի գինը: Նշեց՝ զարգացման ծրագրերն ամբողջ ծավալով չեն իրականացվում:
Նիկոլ Փաշինյան (ՀՀ վարչապետ) - Հատուկ ուշադրություն դարձրեք սրանց, էս ամեն ինչին: Եվ օրգանական պարարտանյութերի արտադրությանը, կաթիլային տնտեսության, ինտենսիվ գյուղատնտեսության անցնելու հրամայականին, հին գյուղատնտեսությունից մնում ա ուրվականը: Սա պետք է ներկայացվի մեր հայրենակիցներին, իհարկե աջակցել:
ՄՈՏ 100 ՀԱԶԱՐ ԸՆՏԱՆԻՔ ՍԱԿԱԳՆԱՅԻՆ ՓՈՓՈԽՈՒԹՅՈՒՆ ՉԻ ՈՒՆԵՆԱ
Պարարտանյութերի գնաճի թեման քննարկելիս վարչապետն անդրադարձավ բնական գազի սակագնի փոփոխությանը: Գազի գնի մեջ հաշվարկվել է կալորիականությունը: Դեռ նախորդ տարվանից Հայաստան մատակարարվող գազի կալորիականությունը ավելացել է: Փաշինյանը նշեց՝ ըստ էության, նախորդ մեկ տարում սպառված նույն խորանարդ մետր գազի դիմաց ավելի մեծ կալորիա է ստացվել: Եվրոպայում 1000 խմ գազի գինը հասել է 2400 դոլարի: Այս իրավիճակում շուկայի նկատմամբ զգայունությունն ավելանում է:
Նիկոլ Փաշինյան - Մենք միջոցներ ենք ձեռնարկել, ըստ էության, Հայաստանում գազի գինը 165 դոլար 1000 խմ-ի համար պահպանելու համար: Ավելացել է կալորիականության գործակիցը, որը միևնույն ժամանակ, մոտ 100 հազար անապահով ընտանիքի համար չի հաշվարկվում, նաև փոխհատուցում ենք տալիս սահմանամերձ բնակիչներին:
Գարեգին Բաղրամյան (ՀՀ ՀԾԿՀ նախագահ) - Եթե գազի ջերմատվությունը լինելու է բարձր, մենք ուղղակի քիչ ենք սպառելու, դրա հետ կապված գնի համարժեք բարձրացումն էլ չի երևալու ոչ մի բաժանորդի վրա: Եթե ավելի ցածր լինի, ավելի շատ ենք սպառելու, գինն էլ, համապատասխանաբար, նվազեցվելու է:
Վարչապետի խոսքով՝ հիմնական նպատակն ու խնդիրն է եղել գազի մատակարարման ոլորտում ինստիտուցիոնալ կարգավորել հարաբերությունները:
Մհեր Գրիգորյան (ՀՀ փոխվարչապետ) - Մոտ 100 հազար ընտանիք որևէ սակագնային փոփոխություն չեն ունենալու թե՛ ջրի, թե՛ հոսանքի, թե՛ գազի մասով:
ԱՋԱԿՑՈՒԹՅՈՒՆ ԱՆԱՍՆԱԲՈՒԾՈՒԹՅԱՆ ՈԼՈՐՏԻ ԾՐԱԳՐԵՐԻՆ
Գործադիրը կաջակցի անասնաբուծության ոլորտի ներդրումային ծրագրերին. կստեղծվեն գյուղատնտեսական խոշոր համալիրներ:
ԳՆԱՆԿՈՒՄ ՀԱՎԿԻԹԻ ՇՈՒԿԱՅՈՒՄ. ԻՆՉՊԵՍ ԵՆ ԿԱՌԱՎԱՐԵԼՈՒ ԻՐԱՎԻՃԱԿԸ
Վարչապետն անդրադարձավ նաև հավկիթի շուկայում գրանցված գնանկմանը: Մասնագիտական հանձնաժողովը չարաշահման դեպքեր չի արձանագրել, իսկ ինչպես են կառավարելու իրավիճակը՝ Սուրբ Զատկի տոնին և, ընդհանրապես, հետագայում խնդիրները բացառելու համար՝ հետաքրքրվեց վարչապետը:
Նիկոլ Փաշինյան - Ինչո՞ւ ա դա մեզ անհանգստացնում. անհանգստացնում ա, որ օրինակ, Սուրբ Զատկի շրջանում, օրինակ տիեզերական չափերի են հասնում ձվի գները, և ես գիտեմ, որ Մրցակցության հանձնաժողովը մոնիթորինգի տակ է պահում իրավիճակը:
Գեղամ Գևորգյան (ՀՀ մրցակցության պաշտպանության հանձնաժողովի նախագահ) - Այս տարվա դեպքը կրում էր առանձնահատուկ բնույթ, որովհետև գնիջեցումը տեղի է ունեցել փոքր տնտեսվարող սուբյեկտի կողմից, որոնց մասնաբաժինը չի գերազանցում 5 տոկոսը: Շղթայաձև ռեակցիա է տվել: Ինչ վերաբերում է Զատկի տոնին ընդառաջ ձվի գներին, ասեմ, որ մենք կարողանում ենք վերահսկել հարցերը: Երկու տարվա ընթացքում մեր տնտեսվարողները հասկացան, որ ապացուցողական բազան լավն է: Մեր հորդորն այն է, որ մենք ընդհանրապես ինտերվենցիայի կարիք չունենանք:
ԵՐԿԱԹՈՒՂՈՒ ՎԵՐԱԿԱՆԳՆՄԱՆ ԴԱՇՏԱՅԻՆ ԱՇԽԱՏԱՆՔՆԵՐԻ ՓՈՒԼԸ
Տարածքային կառավարման և ենթակառուցվածքների նախարարությանը գործադիրը գումար հատկացրեց՝ Երասխի և Մեղրիի մոտ 43 կմ հատվածում երկաթգծի վերականգնման նախագծի նախնական առաջադրանքի կազմման, գործիքային հետազննությունների, լաբորատոր փորձարկումների համար:
Նիկոլ Փաշինյան - Մենք թևակոխում ենք Երասխ-Սադարակ-Ջուլֆա -Օրդուբադ -Մեղրի-Հորադիզ երկաթուղու հայաստանյան, Մեղրիի տարածաշրջանի հատվածի դաշտային աշխատանքներին: Շատ կարևոր իրադարձություն է, զուգահեռ դե յուրե կարձանագրենք պայմանավորվածությունները 2021-ի Սոչիի, Բրյուսելի եռակողմ հանդիպումների ընթացքում: Զուգահեռ աշխատում ենք, որ ժամանակը ռացիոնալ օգտագործենք:
Մասնագիտական խումբը կմեկնի Մեղրի: Ուսումնասիրություններ կարվեն երկու-երեք շաբաթում, համալիր հետազոտության արդյունքը կդրվի նախագծի հիմքում:
Նիկոլ Փաշինյան - Մենք այս ամենը դիտարկում ենք «Հայկական խաչմերուկ» նախագծի շրջանակում: Կարևոր է, որ մենք աշխատանքներ ենք իրականացնում ավտոմոբիլային ճանապարհների հնարավոր երթուղիների, այդ թվում՝ նոր մայրուղիների կառուցման համար: Կարևոր է, որ քննարկում ենք նաև այդ երթուղին նախագծի հետ ինտեգրելու հարցը, այս ուղղությամբ նախաձեռնում ենք դաշտային աշխատանքներ:
Եվս 6,2 մլրդ դրամ հատկացվեց մի շարք ճանապարհաշինական ծրագրերն ավարտին հասցնելու համար: Կառավարության որոշմամբ՝ Մելիքսեթ Պողոսյանն ազատվեց Սյունիքի մարզպետի պաշտոնից: Մեկ այլ որոշմամբ՝ մարզպետ նշանակվեց Ռոբերտ Ղուկասյանը, որ մեկ տարուց ավելի է՝ ղեկավարում էր Սյունիքի հարցերի միջգերատեսչական աշխատանքային խումբը:
Կառավարության նիստին հրավիրված էր նաև նորընտիր օմբուդսմենը:
Վարչապետն ակնկալում է, որ Քրիստիննե Գրիգորյանի աշխատանքի շնորհիվ աստիճանաբար ավելի կբարձրանա ինստիտուտի արդյունավետությունը, և կօգնի իշխանության մարմիններին բարձրացնելու մարդու իրավունքների պաշտպանության մակարդակը:
