Բելառուսական Բրեստի շրջանն է.... ռուս-ուկրաինական երկրորդ բանակցությունների հարթակը: Այսօրվա հանդիպման մասին կողմերը հայտարարել էին դեռ օրեր առաջ՝ բանակցությունների առաջին փուլի ավարտից հետո: Ինչպես նախորդ անգամ, ռուսական պատվիրակությունն առաջինը հասավ հանդիպման վայր և գրեթե մեկ օր սպասեց ուկրաինացի բանակցողների խմբին:
Մի քանի անգամ սառեց թեյը, միացվեցին ու անջատվեցին տեսախցիկները. լրագրողական համայնքը ամեն րոպե նոր տեղեկության ակնկալիքով ժամեր անցկացրեց հանդիպման սրահի հարակից տարածքում:
Ուկրաինայի պատվիրակությունը Բրեստ ժամանելու մասին հայտնեցին հենց ուղղաթիռից՝ լուսանկար հրապարակելով: Հանդիպումն այս անգամ սկսվեց ձեռքսեղմումներով:
ՊՈՒՏԻՆԸ ՄԱԿՐՈՆԻՆ ՆԵՐԿԱՅԱՑՐԵԼ Է ՄՈՍԿՎԱՅԻ ՊԱՅՄԱՆՆԵՐԸ
Բակացություններին ընդառաջ` Մոսկվան ևս մեկ անգամ մատնանշեց իր պահանջները Պուտին-Մակրոն հեռախոսազրույցի ընթացքում: Մեկուկես ժամ տևած զրույցի ընթացքում Վլադիմիր Պուտինը Էմանուել Մակրոնին մանրամասն ներկայացրել է Մոսկվայի պայմանները Կիևի հետ բանակցությունների համատեքստում. առաջին հերթին՝ Ուկրաինայի ապառազմականացումն ու չեզոք կարգավիճակը:
Ռուսաստանը կհասնի իր նպատակներին, իսկ բանակցությունները ձգձգելու ճանապարհով ժամանակ շահելու փորձերը կհանգեցնեն Ռուսաստանի կողմից նոր պահանջների առաջքաշման՝ շեշտել է Կրեմլի առաջնորդը:
ՌԴ-Ն ՈՒԿՐԱԻՆԱՅԻՑ ԿԱՊԻՏՈՒԼՅԱՑԻԱ ՉԻ ՊԱՀԱՆՋՈՒՄ. ԼԱՎՐՈՎ
Ռուսաստանի արտգործնախարարը ևս վստահ է, որ Ուկրաինայի շուրջ ճգնաժամի լուծումը հնարավոր է գտնել բանակցային ճանապարհով: Ռուսաստանի գլխավոր դիվանագետի խոսքով՝ Մոսկվայի պայմանները նվազագույնն են և դրանք չի կարելի որակել որպես կապիտուլացիայի պահանջ: Լավրովը նույնպես հիշեցրել է Մոսկվայի պահանջները:
Սերգեյ Լավրով (ՌԴ արտգործնախարար) - Ղրիմի ճանաչումը որպես ՌԴ, Դոնեցկի, Լուգանսկի ժողովրդական հանրապետությունների ճանաչումը Դոնեցկի և Լուգանսկի շրջանների սահմաններում։ Ապառազմականացում, որի պարամետրերը պետք է համաձայնեցվեն, ինչպես նաև ապաազգայնականացում՝ ֆաշիստական Գերմանիայի օրինակով։
Մոսկվայի և Կիևի պահանջներն ու դիրքորոշումները, սակայն, չեն համընկնում: Ռուսաստանի հետ բանակցություններում Ուկրաինան աշխատելու է մի քանի ուղղություններով՝ կրակի դադարեցում, զինադադար, հումանիտար միջացքների ստեղծում......Ուկրաինայի գլխավոր դիվանագետի հայտարարությունն է: Դմիտրո Կուլեբան նաև շեշտել է, որ Կիևը Մոսկվայի հետ բանակցություններում երկրի տարածքի ամբողջականության հետ կապված հարցերում որևէ զիջման չի գնալու:
ՈՒԿՐԱԻՆԱՆ ԱՌԱՎԵԼ, ՔԱՆ ԵՐԲԵՎԷ, ՀԱՄԱՌ Է. ԶԵԼԵՆՍԿԻ
Ուկրաինան առավել, քան երբևէ, համառ է, միասնական և ուժեղ, հայտարարել է երկրի նախագահը: Վոլոդիմիր Զելենսկին իր ելույթում շեշտել է՝ Ուկրաինան ամեն օր զենք է ստանում իր գործընկերներից. ամեն օր ավելի ու ավելի հզոր զենքեր:
Վոլոդիմիր Զելենսկի (Ուկրաինայի նախագահ) - Ուկրաինան արդեն դիմավորում է օտարերկրյա կամավորների, որոնք գալիս են մեր երկիր։ 16 000 կամավորներից առաջին խումբն արդեն պատրաստվում է պաշտպանել մեր ազատությունը, մեր կյանքը, և դա հաջողությամբ կպսակվի, ես դրանում վստահ եմ:
Արձագանքը Ռուսաստանի պաշտպանության նախարարությունից չուշացավ: «Կիևին օգնելու համար Արևմուտքի կողմից Ուկրաինա ուղարկված վարձկանները չեն կարողանա ռազմագերու կարգավիճակ ստանալ», հայտարարել է ՌԴ պաշտպանության նախարարության պաշտոնական ներկայացուցիչը:
Իգոր Կոնաշենկով (ՌԴ պաշտպանության նախարարության պաշտոնական ներկայացուցիչ) - Ես ուզում եմ պաշտոնապես ընդգծել, որ Արևմուտքի կողմից ուղարկված բոլոր վարձկանները՝ Կիևի ազգայնական վարչակարգին օգնելու համար, միջազգային մարդասիրական իրավունքի համաձայն մարտիկներ չեն: Նրանք ռազմագերու կարգավիճակի իրավունք չունեն:
ՌՈՒՍԱԿԱՆ ԿՈՂՄՆ ՈՒՆԻ 498 ԶՈՀ. ՌԴ ՊՆ
Ռուսաստանի և Ուկրաինայի պաշտպանական գերատեսչությունների կողմից կորուստների վերբերյալ տվյալները մեծապես տարբերվում են: Ըստ ՌԴ ՊՆ հատուկ ներկայացուցչի՝ ռուսական կողմն ունի 498 զոհ և 1597 վիրավոր: Գերատեսչությունն ընդգծել է, որ ոչ ժամկետայինները, ոչ կուրսանտները չեն մասնակցում հատուկ գործողությանը: ՌԴ ՊՆ տվյալներով՝ ուկրաինական կողմի զոհերի թիվը գերազանցում է 2 870-ը, վիրավորների թիվը 3 700 է: Գերեվարվել է Ուկրաինայի ուժային կառույցների 572 զինծառայող:
Ըստ գերատեսչության՝ Ուկրաինայում ՌԴ ԶՈՒ կորուստները գերազանցում են 9000-ը: Սեփական կորուստների վերաբերյալ ուկրաինական կողմը տվյալներ չի հրապարակում:
ՌԴ պաշտպանության նախարարությունը հայտնել է, որ հումանիտար աղետ է հասունանում Կիևում, Մարիուպոլում, Խարկովում և Սումիում։ Ռուսաստանի Պաշտպանության ազգային կառավարման կենտրոնի ղեկավար, գեներալ-գնդապետ Միխայիլ Միզինցևը նշել է, որ հումանիտար իրավիճակն առավել բարդ է կես միլիոն բնակիչ ունեցող Մարիուպոլում: Զինվորականի խոսքով՝ ուկրաինական ազգայնական կազմավորումները խոչընդոտում են բնակչության տարհանումն այդ քաղաքներից:
ՈՒԿՐԱԻՆԱՅԻՑ ՓԱԽՍՏԱԿԱՆՆԵՐԻ ԹԻՎԸ ՀԱՍԵԼ Է 1 ՄԻԼԻՈՆԻ
Տարհանման թեման մտահոգություն է առաջացրել աշխարհում: Ուկրաինայից փախստականների թիվը, որոնք հարևան երկրներ են մեկնել վերջին յոթ օրվա ընթացքում, կազմել Է 1 միլիոն՝ հայտնել Է ՄԱԿ-ի փախստականների հարցերով գերագույն հանձնակատարը:
Ֆիլիպո Գրանդի (ՄԱԿ-ի փախստականների հարցերով գերագույն հանձնակատար) - Ես աշխատել եմ փախստականների հետ արտակարգ իրավիճակներում ավելի քան 40 տարի, և նման արագ արտագաղթ չեմ տեսել: Ժամ առ ժամ, րոպե առ րոպե ավելի շատ մարդիկ են լքում Ուկրաինան: Անթիվ-անհամար մարդիկ տեղահանվել են երկրի ներսում: Եթե հակամարտությունն անհապաղ դադարեցվի, ամենայն հավանականությամբ միլիոնավոր մարդիկ դեռ ստիպված կլինեն լքել Ուկրաինան:
ԳԵՐԱԳՈՒՅՆ ՌԱԴԱՆ ԽՆԴՐԵԼ Է ԽԱՂԱՂԱՊԱՀՆԵՐ ՈՒՂԱՐԿԵԼ ՈՒԿՐԱԻՆԱ
Հետագա աղետալի հետևանքները կանխելու համար Ուկրաինայի Գերագույն Ռադան դիմել է ՄԱԿ-ին և միջազգային այլ կազմակերպությունների` երկիր խաղաղապահ ուժեր մտցնելու խնդրանքով:
Պատգամավորներն էլ դիմել են ՄԱԿ գլխավոր քարտուղար Անտոնիո Գուտերեշին՝ հակամարտության կարգավորման հարցում միջնորդելու համար։
«Եվրամիությունը լրացուցիչ քայլեր կձեռնարկի Ռուսաստանի դեմ, եթե Ուկրաինայում իրավիճակը վատթարանա»,- հայտարարել է Եվրահանձնաժողովի նախագահ Ուրսուլա ֆոն դեր Լայենը։
«Մենք պետք է անկախանանք ռուսական գազից, նավթից և ածխից: Այս գործում առաջ գնալու մեր վճռականությունն ավելի ուժեղ է, քան երբևէ»,- հավելել է Եվրահանձնաժողովի նախագահը: Նրա խոսքով` Ուկրաինայի նախագահ Վլադիմիր Զելենսկին դիմել է Եվրահանձնաժողովին՝ ԵՄ-ին Ուկրաինային անդամակցության խնդրանքով, սակայն նախ պետք է ավարտել պատերազմը՝ նշել է Ուրսուլա ֆոն դեր Լայենը։
Եվրոպան Ուկրաինային համերաշխություն հայտնելու յուրատեսակ տարբերակ է ընտրել: Այսօր նույն ժամին Եվրոպայի տարբեր քաղաքներում ղողանջել են ամենահայտնի եկեղեցիների զանգերը:
