Ֆրանսիայի նախագահ Էմանուել Մակրոնը զանգահարել է Վլադիմիր Պուտինին, և նրանք հանգամանալից մտքեր են փոխանակել Ուկրաինայի շուրջ ստեղծված իրավիճակի բոլոր ասպեկտների վերաբերյալ՝ հաղորդում է Կրեմլը։
«Ֆրանսիական կողմը հույս է հայտնել, որ ներկա հակամարտությունը շուտափույթ կկարգավորվի՝ Կիևի հետ երկխոսության և բանակցությունների միջոցով»,- հաղորդում է РИА Новости-ն։
Պուտինն ընդգծել է, որ կարգավորումը հնարավոր է, «եթե հաշվի առնվեն անվտանգության ոլորտում Ռուսաստանի օրինական շահերը, ներառյալ՝ Ղրիմի նկատմամբ Ռուսաստանի ինքնիշխանության ճանաչումը, ուկրաինական պետության ապառազմականացման և ապաազգայնականացման խնդիրների լուծումը և այդ երկրի չեզոք կարգավիճակի ապահովումը»:
ՌԴ նախագահը զրուցակցի ուշադրությունն է հրավիրել այն փաստի վրա, որ ռուս զինվորականները չեն սպառնում Ուկրաինայում խաղաղ բնակչությանը և չեն հարվածում քաղաքացիական օբյեկտներին։ Սպառնալիքը գալիս է ուկրաինացի ազգայնականներից, որոնք հարվածային զենքեր են տեղակայում բնակելի թաղամասերում՝ խաղաղ բնակչությանը որպես կենդանի վահան օգտագործելու համար՝ հայտնում է Կրեմլը։
Ելիսեյան պալատն էլ հայտնել է. «Նախագահ Մակրոնը կրկնել է միջազգային հանրության պահանջը՝ դադարեցնել Ուկրաինայի դեմ ռուսական հարձակումը և վերահաստատել կրակի անհապաղ դադարեցման անհրաժեշտությունը»։
