Ավտոապահովագրության վճարների թանկացման վերաբերյալ վարորդներ-բյուրո քննարկումը նոր հարթություն տեղափոխվեց: Քննարկումն ԱԺ-ում էր, կազմակերպել էր «Քաղաքացիական պայմանագիր» խմբակցության պատգամավոր, Ճանապարհային ոստիկանության պետի նախկին տեղակալ Արմեն Խաչատրյանը: Քննարկումն սկսեց Ավտոապահովագրողների բյուրոյի գործադիր տնօրենը, ներկայացրեց փոփոխության հիմնական կետերը:
Վաղինակ Եղիազարյան, Ավտոապահովագրողների բյուրոյի գործադիր տնօրեն - Բազային ապահովագրավճարի վերին շեմն ավելացվել է 3000 դրամով: Մինչ այժմ գոյություն ուներ վերին և ներքին շեմ, հրաժարվել ենք ներքին շեմից: Երկրորդ փոփոխությունը խմբային ռիսկային գործակիցներից հրաժարվելն է՝ փուլային տարբերակով: Դրանք իրենցից ներկայացնում են տարբեր ապահովադիրների համար նախատեսված գործակիցներ, որոնք ավելացնում ու նվազեցնում են ապահովագրավճարը՝ կախված մեքենայի հզորությունից ու օգտագործման նպատակից:
Երրորդ փոփոխությունն էլ բոնուս-մալուս համակարգի վերանայումն է: Նախկինում յուրաքանչյուր վթարից հետո ավելանում էր 4 մալուս, հիմա 3-8 մալուս կավելանա՝ կախված վթարի աստիճանից: Թանկացման վերին շեմը 250-ից դարձել է 300 տոկոս, իսկ բոնուս-մալուսային դասերը՝ 22-ից՝ 25: Վաղինակ Եղիազարյանը հիշեցնում է՝ 300 տոկոս չի թանկանում, այլ երկու խոշոր վթարից հետո 100 տոկոս ամբողջական վճարին գումարվում է ևս 200-ը և դառնում ընդհանուր՝ 300 տոկոս: Արդյոք բոնուս-մալուս համակարգն ավելի արդյունավետ չի՞ լինի, եթե այն կապվի իրավախախտումների շտեմարանի հետ՝ հարց է բարձրացնում պատգամավոր Արմեն Խաչատրյանը:
Վաղինակ Եղիազարյան - Այս տարվա ընթացքում մենք ընթացակարգ ենք հաստատելու, որով ապահովագրական ընկերությունները պետք է ներկայացնեն իրենց գնագոյացման մոդելները՝ հաշվի առնելով այս բոլոր հանգամանքները: Մենք ակնկալում ենք, որ դա էլ պետք է օգտագործենք:
Ավտովարորդների իրավունքների պաշտպան Արտակ Խաչատուրովին հետաքրքրում է՝ ի՞նչն է ստիպել ապահովագրականներին գնալ թանկացումների:
Արտակ Խաչատուրով, Ավտովարորդների իրավունքների պաշտպան - Որքա՞ն ճեղքվածք է ունեցել ապահովագրական պորտֆելը, ու ի՞նչ նպատակ կա ապագայում մուտքերն ավելացնել այս փոփոխություններով: Ակնկալվող մուտքերի ծավալը 8 տոկո՞սն է փակելու, թե՞ լրացուցիչ:
Վաղինակ Եղիազարյան - Մոտավորապես 8-10 տոկոսը:
Ինչի՞ համար է ԱՊՊԱ համակարգը, ի՞նչ նպատակ է հետապնդում՝ հարց է ուղղում «Իրազեկ և պաշտպանված սպառող» ՀԿ նախագահ Բաբկեն Պիպոյանը: Այսօր պարզ չէ, ապահովագրականներն ուրա՞խ են, որ շատ բոնուս է կիրառվում, թե՞ տխուր:
Բաբկեն Պիպոյան, «Իրազեկ և պաշտպանված սպառող» ՀԿ նախագահ - Մարդու բախտը բերել է, ուղիղ գնացել, խփել է «06»-ի՝ դառնում է ցածր ռիսկային, խփել է «Տեսլայի»՝ դառնում է բարձր ռիսկային: Պետք է գիծ քաշել, ընդունել, ի վերջո, որ շտապել եք:
Կողմերը 2 ժամից ավելի քննարկում անցկացրեցին, բայց մնաց այն, ինչ կար: Փոփոխությունների առաջին փուլով դրույթների մեծ մասը գործարկվել է փետրվարի 7-ից, բոնուս-մալուս համակարգում փոփոխություններն ուժի մեջ կմտնեն մարտի 1-ից:
