ՀԱՅ ԳԵՐԻՆԵՐԻՆ ԱԶԱՏ ԱՐՁԱԿԵԼՈՒ ՀԵՐԹԱԿԱՆ ԿՈՉՆ ԱԴՐԲԵՋԱՆԻՆ
Եվրախորհրդարանի Հարավային Կովկասի հետ հարաբերությունների պատվիրակության ղեկավար Մարինա Կալյուրանդը, Եվրախորհրդարանի Հայաստանի հարցով հիմնական զեկուցող Անդրեյ Կովաչևը և Ադրբեջանի հարցով հիմնական զեկուցող Զելյանա Զովկոն ողջունում են ՄԱԿ-ի Արդարադատության միջազգային դատարանի դեկտեմբերի 7-ի «Հայաստանն ընդդեմ Ադրբեջանի» և «Ադրբեջանն ընդդեմ Հայաստանի» գործերի շրջանակներում հրատապ միջոցներ կիրառելու վերաբերյալ որոշումները: Կալյուրանդը, Կովաչևը և Զովկոն իրենց հայտարարությամբ ևս մեկ անգամ կոչ են արել Ադրբեջանին ազատ արձակել պահվող բոլոր հայ գերիներին:
«Սրանք պարտադիր իրավական ուժ ունեցող կարևոր որոշումներ են, որոնք պետք է ի կատար ածվեն ամբողջությամբ: Ավելին, մենք շարունակում ենք Ադրբեջանին կոչ անել անհապաղ ազատ արձակել մնացած բոլոր գերիներին, ինչպես նաև Հայաստանին՝ փոխանակելու ականապատ դաշտերի վերաբերյալ հասանելի տեղեկությունը՝ արդյունավետ ականազերծման համար: Այս առումով մենք ողջունում ենք վերջերս 10 հայ գերիների արձակումը և ականապատ դաշտերի քարտեզների փոխանցումը: Մենք ևս մեկ անգամ վերահաստատում ենք Եվրամիության հանձնառությունը՝ աջակցելու կողմերի միջև փոխվստահության ձևավորման քայլերին և առարկայական բանակցություններին, մասնավորապես՝ հակամարտության տևական կարգավորմանը և Լեռնային Ղարաբաղի ապագա կարգավիճակի հստակեցմանը՝ ԵԱՀԿ Մինսկի խմբի համանախագահների հովանու ներքո ընթացող գործընթացի շրջանակում»:
ԳԵՐԻՆԵՐԻՆ ՎԵՐԱԴԱՐՁՆԵԼՈՒ ՀԱՐՑՈՒՄ ԿԱ ԴՐԱԿԱՆ ԸՆԿԱԼՈՒՄ. ՄՈՒՐԱԴՈՎ
Ադրբեջանական կողմի բոլոր զինծառայողները, որոնք գերի էին ընկել Լեռնային Ղարաբաղում, ռուս խաղաղապահների աջակցությամբ վերադարձվել են՝ ՏԱՍՍ լրատվական գործակալությանը հայտնել է Հարավային ռազմական օկրուգի հրամանատարի տեղակալ Ռուստամ Մուրադովը։ Նա շեշտել է, որ ներկայում շարունակվում են գերեվարված հայ զինվորների վերադարձի ուղղությամբ աշխատանքները: «Կա դրական ընկալում,- ընդգծել է Մուրադովը,- ես կարծում եմ, որ այս հարցը պետք է ամբողջությամբ կարգավորվի։ Ռուս խաղաղապահները վերջ կդնեն այս խնդրին»,- հաստատել է Հարավային ռազմական օկրուգի հրամանատարի տեղակալը։
Ռուստամ Մուրադովը նշել նաև, որ Լեռնային Ղարաբաղում տեղակայվելուց հետո ռուս խաղաղապահների կողմից զոհերի 1960 աճյուն է վերադարձվել հայկական և ադրբեջանական կողմերին. որոնողական աշխատանքները շարունակվում են:
ՌԱԶՄԱԳԵՐԻՆԵՐԻ ՎԵՐԱԴԱՐՁԸ՝ ԱՌԱՋՆԱՀԵՐԹՈՒԹՅՈՒՆ
Լեռնային Ղարաբաղում խաղաղապահ ծառայությանն է անդրադարձել ՌԴ գլխավոր շտաբի պետ Վալերի Գերասիմովը: Օտարերկրյա պետությունների ռազմական կցորդների հետ ճեպազրույցում նա շեշտել է, որ Լեռնային Ղարաբաղում խաղաղապահ գործողության շրջանակում ռուս զինծառայողները հիմա կենտրոնացած են ռազմագերիների վերադարձի, ենթակառուցվածքային նախագծերի իրականացման և այլ հումանիտար հարցերի լուծման ուղղությամբ։ Գերասիմովի խոսքով՝ լարվածության թուլացման ու հրադադարի ռեժիմի պահպանման համար ռուս խաղաղապահները կազմակերպել են դիտակետերում հերթապահություն ու պարեկություն՝ խաղաղապահ առաքելության գործողության տարածքում: ՌԴ գլխավոր շտաբի պետը նաև հիշեցրել է, որ հրադադարի լրացուցիչ վերահսկման համար այս տարվա հունվարից Ակնայում գործում է ռուս-թուրքական համատեղ կենտրոնը:
ՄԵԿՆԱՐԿԵԼ Է «ՀԱՆՈՒՆ ԺՈՂՈՎՐԴԱՎԱՐՈՒԹՅԱՆ» ԳԱԳԱԹՆԱԺՈՂՈՎԸ
Մեկնարկել է Ջո Բայդենի նախաձեռնած «Հանուն ժողովրդավարության» երկօրյա գագաթնաժողովը: Համաժողովին բացման խոսքով հանդես է եկել ԱՄՆ նախագահը: Գագաթնաժողովին մասնակցում են ավելի քան 100 երկրի ղեկավարներ, օրենսդիր մարմինների ներկայացուցիչներ, գործարարներ, հասարակական և բարեգործական կազմակերպությունների ներկայացուցիչներ: Կորոնավիրուսի համավարակով պայմանավորված՝ միջոցառումն անցկացվում է հեռավար ձևաչափով:
Այս գագաթնաժողովը Վաշինգտոնը դիտարկում է որպես խթան աշխարհում ժողովրդավարական երկրների հրատապ խնդիրների լուծման համար։ Համաժողովի շրջանակում դեկտեմբերի 10-ին ելույթ կունենա նաև ՀՀ վարչապետ Նիկոլ Փաշինյանը:
ՎԵՐՍԿՍՎՈՒՄ ԵՆ ՄԻՋՈՒԿԱՅԻՆ ԳՈՐԾԱՐՔԻ ՇՈՒՐՋ ԲԱՆԱԿՑՈՒԹՅՈՒՆՆԵՐԸ
Միջուկային գործարքին վերադառնալու շուրջ Վիեննայում ընթացող բանակցություններում Ռուսաստանի և Չինաստանի դիրքորոշումներն իրատեսական և կառուցողական են՝ ի տարբերություն Արևմուտքի: Այս մասին հայտարարել է Իրանի արտգործնախարար Հոսեյն Ամիր Աբդոլլահիանը ԵՄ դիվանագիտության ղեկավար Ժոզեպ Բորելի հետ հեռախոսազրույցի ընթացքում։ «Մինչ այս պահը մենք որևէ կառուցողական և հեռուն գնացող առաջարկ չենք ստացել մյուս կողմից, ինչը հակասում է բանակցություններում լուրջ մտադրությունների մասին նրանց հայտարարություններին»,- նշել է Իրանի ԱԳ նախարարը: Աբդոլլահիանը եվրոպական երկրների հայտարարություններն «ապակառուցողական» է որակել՝ հավելելով, որ դա բարդացնում և ձգձգում է համաձայնության հասնելու գործընթացը: Վիեննայում այսօր վերսկսվում է Իրանի միջուկային գործարքի շուրջ բանակցությունների յոթերորդ փուլը:
ՄԻՆՉԵՎ 2035 ԹՎԱԿԱՆԸ ԱՄՆ-Ն ԱՆՑՈՒՄ ԿԿԱՏԱՐԻ ԷԼԵԿՏՐԱՄՈԲԻԼՆԵՐԻ
ԱՄՆ դաշնային կառավարությունը մինչև 2035 թվականը կդադարեցնի ներքին այրման շարժիչով ավտոմեքենաների գնումները և անցում կկատարի էլեկտրամոբիլների: Համապատասխան հրամանագիրը ստորագրել է ԱՄՆ նախագահ Ջո Բայդենը։ Որոշակի բացառություններ կարվեն ռազմական և տիեզերական ծրագրերի համար: Միացյալ Նահանգների կառավարությունն այժմ ունի ավելի քան 650 հազար ավտոմեքենա և տարեկան ձեռք է բերում մոտ 50 հազար ավտոմեքենա:
