ՌԴ նախագահի մամուլի քարտուղար Դմիտրի Պեսկովն արձագանքել է Ուկրաինայի տարածք ռուսական հնարավոր ներխուժման մասին հայտարարություններին՝ դրանք որակելով իրադրության անհիմն սրացում՝ հայտնում է ТАСС-ը։ Պեսկովն ընդգծել է, որ Ռուսաստանը ոչ մեկի համար վտանգ չի ներկայացնում, սակայն չի բացառել սադրանքները՝ նման հայտարարություններն արդարացնելու համար:
Մամուլի քարտուղարը վստահեցրել է, որ Ռուսաստանը գործադրում է հնարավոր բոլոր ջանքերը՝ օգնելու Ուկրաինային լուծել Դոնբասում հակամարտությունը՝ հավատարիմ մնալով նորմանդական ձևաչափին և մինսկյան պայմանավորվածություններին։
«Ռուսական կողմը բազմիցս ընդգծել է, որ Դոնբասում ներուկրաինական հակամարտության կողմ չէ և հետևողականորեն հանդես է գալիս Մինսկի համաձայնագրերի լիարժեք ու պարտադիր կատարման օգտին, որոնք ստորագրել է որպես միջնորդ խաղաղ կարգավորման գործընթացում»,- ասել է Պեսկովը։
Դաշնային խորհրդի անդամ Ալեքսեյ Պուշկովն էլ Telegram-ի իր ալիքում արձագանքել է Ուկրաինայի պաշտպանության նախարար Ալեքսեյ Ռեզնիկովի հայտարարությանը, ըստ որի՝ Ուկրաինայի տարածք «ռուսական ներխուժման» դեպքում երեքից հինգ միլիոն ուկրաինացի փախստականներ կարող են մեկնել Եվրոպա՝ այն որակելով Արևմուտքին վախեցնելու փորձ։
Ռուսաստանցի պատգամավորը նաև համոզված է, որ ՆԱՏՕ-ի երկրները չեն կռվի Ուկրաինայի համար, քանի որ այն դաշինքի անդամ չէ։
«Վաշինգտոնի պայմանագրի 5-րդ հոդվածը կիրառելի չէ Ուկրաինայի նկատմամբ, և դաշինքը պարտավորություն չունի պաշտպանելու այդ երկիրը: Հետևաբար, Ուկրաինայի պաշտպանության նախարարությունը փորձում է վախեցնել Արևմուտքին առնվազն փախստականներով: Կիևը, ակնհայտորեն, այլ փաստարկներ չունի»,- գրել է Պուշկովը:
