Սաուդյան Արաբիայի էներգետիկայի նախարար արքայազն Աբդուլազիզ բին Սալմանը, ելույթ ունենալով Վիեննայում Ատոմային էներգիայի միջազգային գործակալության (ԱԷՄԳ) գլխավոր խորհրդաժողովում, հայտարարել է, որ իր երկրի Մեդինայի շրջանում հայտնաբերվել է 110 մլն տոննա ուրանի հանքավայր: Հայտնագործությունը դարձել է աշխարհում ամենանշանակալիներից մեկը հազվագյուտ հողային ռեսուրսների արդյունահանման ոլորտում: Ընդ որում, դա տեղի է ունենում այն ժամանակ, երբ Սաուդյան Արաբիան ձգտում է խթանել ներդրումներն իր էներգետիկ և հանքարդյունաբերական ոլորտներում, նշել է արքայազն Աբդուլազիզը:
Ուրանի կոնցենտրացիայով բնական հանքաքարի հայտնաբերումը նշանակալի է նաև, քանի որ այն հաջորդում է Թագավորությունում քաղաքացիական միջուկային ծրագրի վերաբերյալ ԱՄՆ-Սաուդյան Արաբիայի համաձայնագրի կնքմանը: Դա Թագավորությանը հասանելիություն կտա ամերիկյան տեխնոլոգիաներին՝ միաժամանակ թույլ տալով ամերիկյան ընկերություններին մրցել Սաուդյան Արաբիայի միջուկային էներգիայի օբյեկտներում խոշոր պայմանագրերի համար:
Ինչպես հաղորդում է The Wall Street Journal թերթը, փաստաթղթի առանցքային դրույթներից մեկը հետազոտության անցկացումն է, որի արդյունքներով ամերիկյան ընկերությունները կարող են Սաուդյան Արաբիայում ուրանի հարստացման գործարան կառուցել: Հանքարդյունաբերության ոլորտի զարգացումը կենտրոնական տեղ է զբաղեցնում արաբական աշխարհի խոշորագույն տնտեսություն ունեցող երկրի՝ Սաուդյան Արաբիայի տնտեսական դիվերսիֆիկացման ծրագրում:
