ՀՀԿ անդամ, նախկին պատգամավոր Արտուշ Սիմոնյանին պատկանող տանը հնչած կրակոցների հետևանքով կա չորս զոհ, չորս վիրավոր և չորս ձերբակալված:
Ձերբակալվածների մասին տեղեկությունը հայտնել է Քննչական կոմիտեն, առանց անուններ հրապարակելու: Նոյեմբերի 11-ի գիշերը Երևանի Քանաքեռ թաղամասի 16-րդ փողոցում հնչած կրակոցներից սպանվել են քրեական շրջանակներում Քանաքեռցի Տույ մականունով հայտնի Արթուր Ղազարյանն ու 37-ամյա Արայիկ Խաչատրյանը: Դեպքի վայրին հարակից տներում ապրողները դռան թակոցները թողեցին անպատասխան, նրանցից մի քանինս էլ պնդեցին՝ ոչինչ չեն լսել, միջադեպի մասին տեղեկությունը ստացել են համացանցից:
Գիշերը՝ ժամը 2:45-ից սկսած, հրազենային տարբեր վնասվածքներով հոսպիտալացվել է միջադեպի 6 մասնակից: 61-ամյա նախկին պատգամավոր Արտուշ Սիմոնյանն ու 38-ամյա Արթուր Բորյանը, գիտակցության չգալով, մահացել են։ Արտուշ Սիմոնյանը պատգամավոր է ընտրվել 2003-ին, աշխատել 3-րդ գումարման ԱԺ-ում:
ՀՀ քննչական կոմիտե - Երևան քաղաքի «Հերացի» թիվ 1 համալսարանական հիվանդանոց է ընդունվել 19-ամյա երիտասարդ՝ «Աջ սրունքի դրսային մակերեսի հրազենային վնասվածք» ախտորոշմամբ, նույն օրը՝ ժամը 05:50-ին, «Միքայելյան» վիրաբուժության ինստիտուտ բուժօգնության են ընդունվել 61-ամյա տղամարդ՝ «Հեմոռագիկ շոկ, հրազենային վնասվածքով», 27-ամյա երիտասարդ՝ «Աջ ոտնաթաթի հրազենային վնասվածք», 37-ամյա տղամարդ՝ «Աջ ոտնաթաթի հրազենային վնասվածք», 38-ամյա տղամարդ՝ «Կրծքավանդակի որովայնի շրջանում հրազենային վնասվածք», ինչպես նաև դեռևս տվյալների պարզաբանման փուլում գտնվող ևս մեկ տղամարդ՝ «Ձախ նախաբազկի միջաձիգ հրազենային վիրավորում վնասվածք» ախտորոշումներով: Պարզվել է, որ բոլոր անձինք հրազենային վնասվածքները ստացել են Քանաքեռի 16-րդ փողոցի տներից մեկի բակում տեղի ունեցած միջադեպի ժամանակ:
Ի դեպ, հիվանդանոց տեղափոխվածներից երկուսը՝ 27-ամյա Հովհաննես Սիմոնյանն ու 37-ամյա Վլադիմիր Սիմոնյանը Արտուշ Սիմոնյանի որդիներն են: Նրան պատկանող տան բակում կայանած մեքենաներն իրավապահները կապարակնքել են, դրանց վրա առկա են կրակված փամփուշտների տեղերը: Դեպքի վայրում դեռևս երևում են նաև արյան հետքեր:
ՀՀ քննչական կոմիտե - Տան բակում կատարված դեպքի վայրի զննությամբ հայտնաբերվել է՝ տարբեր տրամաչափի 28 պարկուճ, 12 գնդակ, 4 ատրճանակ և 2 ինքնաձիգ:
Դեպքի առիթով Քննչական կոմիտեում հարուցվել է քրեական գործ՝ երկու կամ ավելի անձանց սպանելու, ապօրինի կերպով հրազեն ու ռազմամթերք ձեռք բերելու, իրացնելու, պահելու, փոխադրելու կամ կրելու կասկածանքով:
Հեղինակ՝ Նորայր Շողիկյան