Կամավոր ատեստավորման ընթացքում բարձր արդյունքներ գրանցած ուսուցիչներն արդեն նոյեմբերին հոկտեմբերի աշխատավարձը կստանան հավելումով: Կրթական գերատեսչությունը հրապարակել է առարկայական գիտելիքի ստուգման ընդհանրական արդյունքները: Մինչ այդ էլ նախարարի հրամանով նվազեցվել է հավելավճարի անցողիկ շեմը, ինչի շնորհիվ կբարձրանա ավելի մեծ թվով ուսուցիչների աշխատավարձը:
Ժաննա Անդրեասյան, ԿԳՄՍ նախարարի տեղակալ - Ի սկզբանե սահմանված էր 80-89 տոկոսի դեպքում 30 տոկոսի չափով, 90 և ավելի տոկոսի դեպքում՝ հիսուն տոկոսի չափով, բայց սանդղակը համաչափ դարձնելու խնդիր ունեինք, որը նաև փորձնական փուլի տրամաբանությունը հաշվի առնելով՝ այս ձևով շտկվեց՝ 70-79 տոկոսի դեպքում 30 տոկոս սահմանելով, 80-89 տոկոսի դեպքում՝ 40 տոկոս, 90 և ավելի տոկոսի դեպքում, ինչպես և սահմանված էր, թողնելով 50 տոկոսը:
Կամավոր ատեստավորմանը մասնակցելու հայտ է ներկայացրել 1372 ուսուցիչ, բայց գիտելիքի ստուգմանը եկել է 996-ը կամ դիմողների 72,6 տոկոսը: Մասնակիցների 47,2 տոկոսը սեփական գիտելիքի շնորհիվ կստանա աշխատավարձի 30-50 տոկոս հավելում:
Եղվարդի համար 1 ավագ դպրոցի մաթեմատիկայի ուսուցչուհի Թամարա Սիմոնյանը կամավոր ատեստավորման թեստային առաջադրանքները կատարել է 100 տոկոսով: Աշխատավարձը կբարձրանա 50 տոկոսով:
Թամարա Սիմոնյան, Եղվարդի համար 1 ավագ դպրոցի մաթեմատիկայի ուսուցչուհի - Այստեղ այնքան աշխատավարձի բարձրացումն էական չէ, որքան երևույթը, որ ուսուցիչը ևս մեկ անգամ համոզվում է՝ ինքն ունի ինչ որ բան, որ կարող է փոխանցել սովորողներին: Ես ինքս որպես ծնող, շատ կցանկանամ, որ իմ երեխայի ուսուցիչներն իսկապես տիրապետեն առարկային, ունենան ինչ-որ բան՝ իմ երեխային փոխանցելու, սովորեցնելու, տալու, իսկ դրա համար ուսուցիչը պետք է իր վրա անընդհատ աշխատի:
Գործընթացը դրական գնահատելով հանդերձ՝ Սիմոնյանն ուշադրություն է հրավիրում որոշ խնդիրների վրա, որոնք կցանկանար հետագայում լուծվեին: Օրինակ է բերում քիմիայի ատեստավորման գործընթացը:
Թամարա Սիմոնյան - Ինձ ծանոթ ուսուցիչներն անգամ, որ գիտեմ՝ հեղինակություն են, և ես իրենցից շատ բան ունեմ սովորելու, ժամանակի մեջ չէին տեղավորվել թեստը գրելիս, և այստեղ մեր Կրթության, գիտության, մշակույթի և սպորի նախարարության համապաատսխան բաժիններն ունեն անելիք՝ հաջորդ տարիներին վերանայելու այդ բացը, թեստերը նախապես փորձարկելու:
Նա նաև կարծում է՝ նախապատրաստական աշխատանքներն են թերի կատարվել և անորոշ էին քննական առաջադրանքների ծավալն ու շրջանակը: Ամեն դեպքում, որքան էլ կամավոր ատեստավորման այս փորձնական փուլին մասնակիցների քանակը բավական փոքր է եղել, նախարարի տեղակալ Ժաննա Անդրեասյանը հերքում է տարածվող տեղեկությունները, թե երկրորդ փուլ է կազմակերպվելու:
Ժաննա Անդրեասյան - Լրացուցիչ փուլ կազմակերպելու կարիք չունենք, ինչպես պլանավորված է, գործընթացն անելու ենք ամեն տարի, այսինքն՝ եկող տարի կլինի դիմելու նոր հնարավորություն:
Հաջորդ տարի ատեստավորմանը մասնակցելու համար կարող են դիմել 5-12-րդ դասարանում դասավանդվող բոլոր առարկաների ուսուցիչները: Այս տարի մասնակցում էին 7-12 դասարանների 10 առարկաների մասնագետներ: Ատեստավորման արդյունքում հավելավճարի իրավունք ամենաշատն ստացել են մաթեմատիկայի ուսուցիչները՝ մասնակիցների 87 տոկոսը: Ամենաքիչը՝ քիմիայինը, մասնակիցների 11 տոկոսը: Ատեստավորման արդյունքների բողոքարկումներն էլ, ի դեպ, հիմնականում հենց քիմիային են վերաբերում: Այսօրվա դրությամբ՝ նախարարությունն ստացել է ավելի քան 100 դիմում: Բողոքարկումների արդյունքները հայտնի կդառնան ավելի ուշ:
Հեղինակ՝ Աննա Զախարյան