Նախապատրաստվում է Թուրքիայի նախագահ Ռեջեփ Էրդողանի աշխատանքային այցը Ռուսաստան՝ հայտարարել է Կրեմլի խոսնակ Դմիտրի Պեսկովը։ Նա նշել է, որ բանակցությունների օրակարգը լայն է՝ սկսած երկկողմ հարաբերություններից։ «Իհարկե քննարկվելու են նաև Սիրիան ու այլ տարածաշրջանային հակամարտություններ»,- հավելել է Դմիտրի Պեսկովը։ Անցած շաբաթ Reuters գործակալությունը, վկայակոչելով իր աղբյուրները, գրել էր, որ սեպտեմբերին Էրդողանն այցելելու է Սոչի՝ սիրիական Իդլիբում ստեղծված իրավիճակը քննարկելու:
*****
Պերմի պետական համալսարանում հրաձգության հետևանքով կա ութ զոհ, երկու տասնյակից ավելի վիրավոր: Կրակողը համալսարանի 18-ամյա ուսանող է: Ըստ «Կոմերսանտի»՝ Պերմի հետազոտական ինստիտուտի ուսանող-կասկածյալը մահացել է վերակենդանացման բաժանմունքում՝ ձերբակալության ժամանակ ստացած վնասվածքի պատճառով: Ըստ ականատեսների՝ կասկածյալը չէր փորձել թաքնվել:
*****
Օրեր առաջ Աֆղանստանում տեղի ունեցած պայթյունների պատասխանատվությունն ստանձնել է «Իսլամական պետություն» ահաբեկչական խմբավորումը: Ըստ «Թալիբան» շարժման՝ ահաբեկիչների թիրախում իրենք են եղել: Զոհերի մեծ մասը նույնպես թալիբներ էին: Չնայած ահաբեկչական վտանգին՝ Քաբուլի օդանավակայանը վերսկսել է աշխատանքը:
*****
Իրանի արտաքին գործերի նախարարության մամուլի քարտուղար Սայեդ Խաթիբզադեն անդրադարձել է Գորիս-Կապան ավտոճանապարհի Որոտանի հատվածում ստեղծված իրավիճակին: Ըստ IRNA գործակալության՝ Խաթիբզադեն ընդգծել է, որ իրենց առաջնահերթությունը հարևան երկրների տարածքային ամբողջականության քաղաքականությունն է, և Թեհրանը փորձում է հավասարակշռված աջակցել հարևաններին: Պատասխանելով ադրբեջանական կողմից բեռնատարների իրանցի վարորդների ձերբակալման մասին հարցին՝ Խաթիբզադեն նշել է, որ Իրանը հետևողական է այդ հարցում և պահանջել է անհապաղ ազատ արձակել վարորդներին: Ուշագրավ է, որ Թեհրան-Բաքու հարաբերություններում նկատվող լարվածության ֆոնին Իրանն Ադրբեջանի հետ սահմանին արդեն մի քանի օր է կուտակում է մեծ քանակությամբ ծանր ռազմական տեխնիկա: Հաղորդվում է, որ իրանական կողմը սահմանի մոտակայքում նախատեսում է անցկացնել զորավարժություններ:
*****
Իրանի նախագահ Էբրահիմ Ռայիսին մեկնաբանել է հանրապետության մուտքը Շանհայի համագործակցության կազմակերպություն: Նախագահն Իրանի լիիրավ անդամակցությունը կառույցին դիվանագիտական հաջողություն է անվանել: Նա նշել է, որ հանրապետության ներկայությունը կազմակերպությունում ստեղծում է ամուր տնտեսական կապեր երկրների միջև և նշանակում է Իրանի ներառումն Ասիայի տնտեսական ենթակառուցվածքներում: Նա կոչ է արել հանրապետության ԱԳՆ-ին և համապատասխան այլ գերատեսչություններին ապահովել բոլոր անհրաժեշտ պայմանները, որքան հնարավոր է արագ աշխատանքներին ներգրավվելու համար:
*****
Ռուսաստանում սեպտեմբերի 19-ին ավարտվեց խորհրդարանի ընտրության եռօրյա քվեարկությունը: ԿԸՀ տվյալներով՝ ձայների մոտ 50 տոկոսն ստացել է իշխող «Եդինայա Ռոսիա» կուսակցությունը: Պետական դումայում այն կունենա սահմանադրական մեծամասնություն: Երկրորդ տեղում Կոմունիստական կուսակցությունն է՝ մոտ 20 տոկոս ձայներով, երրորդը՝ Ժիրինովսկու կուսակցությունը՝ ավելի քան 7 տոկոս։ Նախնական տվյալով՝ «Արդար Ռուսաստան» և «Նոր մարդիկ» կուսակցությունները ևս կանցնեն Դումա: Առաջին անգամ անցկացվել է նաև հեռավար էլեկտրոնային քվեարկություն, այդպես են քվեարկել նաև նախագահ Վլադիմիր Պուտինն ու վարչապետ Միխայիլ Միշուստինը:
*****
Լարվածության աճ կա Կոսովո-Սերբիա հարաբերություններում: Կոսովոն լրացուցիչ ոստիկանական խմբեր է կուտակել Սերբիայի հետ սահմանին, որպեսզի նրանք հսկեն՝ արդյոք Սերբիան կատարում է երկիր մտնող ավտոմեքենաների վրայից սերբական համարանիշները հանելու պահանջը: Տարիներ շարունակ Սերբիան Կոսովոյում գրանցված մեքենաների վրայից հեռացրել է գրանցման համարանիշները: Կոսովոյի այս քայլը Բելգրադի այդ քաղաքականության պատասխանն է: Պրիշտինան պահանջում է, որ սերբական համարանիշները փոխարինվեն ժամանակավոր պետհամարանիշներով և այդ գործընթացը պետք է հսկեն ոստիկանները Կոսովոյից:
*****
Ավստրալիայի հետ ծագած դիվանագիտական ճգնաժամի հարցը Ֆրանսիայի նախագահ Էմանուել Մակրոնը կքննարկի ԱՄՆ նախագահ Ջո Բայդենի հետ: Ավստրալիան խզել էր Ֆրանսիայի հետ սուզանավերի արտադրության պայմանագիրը, փոխարենն անվտանգային նմանատիպ դաշինք էր կազմել Մեծ Բրիտանիայի և ԱՄՆ-ի հետ: Մակրոն հետ հեռախոսազրույցի առաջարկ է արել ԱՄՆ նախագահը: Ֆրանսիան խորհրդակցությունների համար հետ է կանչել Վաշինգտոնից և Կանբերայից իր դեսպաններին: Փարիզը դեսպանին հետ չկանչեց Լոնդոնից, քանի որ, ըստ Ֆրանսիայի, Բրիտանիան վարում է մշտական պատեհապաշտության քաղաքականություն: