Ռուսաստանում ավարտվել է 2021 թվականի Պետդումայի ութերորդ գումարման պատգամավորների ընտրությունը: Երկրի 39 մարզում անցկացվել են խորհրդարանական ընտրություններ, 11-ում՝ նահանգապետների, հայտնում է ТАСС-ը:
Քվեարկությունն իրականացվել է խառը համակարգով. խորհրդարանի ստորին պալատի նոր կազմի կեսն ընտրվել է միամանդատ ընտրատարածքներում, մյուս կեսը` կուսակցական ցուցակներով:
Քվեաթերթիկների 80 տոկոսի հաշվարկի արդյունքում «Եդինայա Ռոսիան» առաջատարն է՝ 49,42 տոկոս ձայնով: Ըստ նախնական տվյալների՝ կուսակցությունը Պետդումայում կստանա ավելի քան 300 մանդատ:
ԿԸՀ-ի տվյալներով՝ Պետդումա մուտք գործելու հինգ տոկոսանոց արգելքը հաղթահարել է ևս 4 կուսակցություն՝ Ռուսաստանի Դաշնության կոմունիստական կուսակցությունը (19,82 տոկոս), Ռուսաստանի լիբերալ-դեմոկրատական կուսակցությունը (7,55 տոկոս), «Արդար Ռուսաստան` հայրենասերները հանուն ճշմարտության» (7,37 տոկոս) և «Նոր մարդիկ» (5,37 տոկոս) կուսակցությունները:
ԿԸՀ-ն հայտնել է նաև ընտրությունների ընթացքում տեղի ունեցած խախտումների մասին: Ըստ հանձնաժողովի տվյալների՝ դաշնային խորհրդարանի ստորին պալատի ընտրություններում այս կամ այն պատճառով 17 մարզերի 54 տեղամասերում անվավեր է ճանաչվել 8539 քվեաթերթիկ, ութ մարզում գրանցվել է քվեաթերթիկների լցոնման 12 փաստ: Խախտումների հետևանքով աշխատանքից ազատվել են մի քանի մարզի տեղամասային հանձնաժողովների ղեկավարները:
ՌԴ Ներքին գործերի նախարարությունը միաժամանակ հայտնել է, որ խախտումներ չեն ազդում քվեարկության արդյունքների վրա: