Կարմիր ժապավենը կտրում է օդերևութաբանական կայանի գլխավոր պատասխանատուն, և 1963 թ. շահագործված շենքը, որը տարիներ շարունակ անմխիթար, գրեթե վթարային վիճակում էր, դարձյալ վերաշահագործվում է։ Արթիկի օդերևութաբանական կայանի հինգ աշխատակիցների համար իսկական տոն էր։ Հին կենտրոնի խարխլված պատերն ու կտուրը հիմա միայն հեռախոսի էկրանին կարող են տեսնել։
Հայարփի Միքայելյան (Արթիկի օդերևութաբանական կայանի պետի պաշտոնակատար) - Կայանում ունեինք ոչ բարվոք վիճակում՝ երկու սենյակ, միջանցք, դռներ, պատուհաններ, հատակ, աշխատում ենք 24-ժամյա ռեժիմով, բարեկեցիկ պայմաններ, հաճույքով են աշխատում: Տանիքն է վերանորոգվել, դռներ, պատուհաններ՝ մետաղապլաստե, հատակը մանրահատակ և էսթետիկ նորոգում։
Շինարարությունն իրականացվել է «Արթիկ քաղաքի փակ քարհանքի թափոնների և ջրհեղեղների կառավարում» պիլոտային ծրագրի շրջանակում, ՄԱԿ-ի «Հարմարվողականության հիմնադրամի» աջակցությամբ։
Արմեն Եսոյան (շրջակա միջավայրի նախարարության բնապահպանական ԾԻԳ-ի տնօրենի պաշտոնակատար) - Այս ծրագրի ընթացքում Արթիկ քաղաքի օդերևութաբանական կենտրոնի վերանորոգումը նախատեսված էր, վերանորոգում 5 մլն 60 հազար դրամ, պլանավորում ենք կայանի գույքային և այլ կարողությունների զարգացման համար:
Այստեղ աշխատում են 24-ժամյա ռեժիմով, և հատկապես ձմռան նախապատրաստական փուլում նման վերանորոգումը խիստ անհրաժեշտություն էր, փոխել են դուռ ու պատուհաններ, ջեռուցման սեզոնին նաև հնարավոր կլինի ֆինանսներ խնայել։ Նման վերանորոգման կարիք գրեթե բոլոր մարզերի կայաններն ունեն։
Լևոն Ազիզյան (շրջակա միջավայրի նախարարության «Օդերևութաբանության և մոնիթորինգի կենտրոն» ՊՈԱԿ-ի տնօրենի պաշտոնակատար) - Ցավոք սրտի, բոլոր կայաններում է խնդիր, կապիտալ ծախսեր չկան, հիմնականում պահպանման ծախսեր, մենք միջազգային ծրագրերով է, ունենք 46 կայան, մատների վրա է, որ նորմալ, բոլորն էլ 60-ական թվականների են:
Այստեղ նախատեսվում է նաև ավտոմատ օդերևութաբանական կայանի տեղադրում։ Հայաստանի Կառավարությունը ՄԱԿ-ի հետ միասին Արթիկում իրականացնում է շուրջ 700 մլն դրամի բնապահպանական ծրագիր․ փակված քարհանքի տարածքում հիմնվում է անտառայգի և հանգստի գոտի՝ ճեմուղիներով, կառուցվում է ավելի քան 5000 գծամետր երկարությամբ ոռոգման ցանց՝ պատվարներով և թունելային համակարգով, որը կառավարելի կդարձնի ձնհալի և առատ տեղումների հետևանքով վարարումները և կկանխի ջրհեղեղների վտանգը։