Վերջին 4 տարում Իխտիարյանների ընտանիքում 4 երեխա են լույս աշխարհ բերել, վստահեցնում են՝ սիրով կընդունեն նաև 5-րդ պարգևը: 2016-ին ամուսնացան և աշնանը տեղափոխվեցին հիփոթեքով ձեռք բերած իրենց նոր բնակարան: Եվ քանի որ շահառուի՝ Գրիգորի տարիքը չի գերազանցում 30-ը, 4-րդ երեխայի ծննդից հետո դարձավ Երեխա ունեցող ընտանիքների բնակարանային ապահովության պետական աջակցություն ծրագրի շահառու: Ի դեպ, Իխտիարյանները այս պահին միակ ընտանիքն են, որ օգտվել են 4 մլն դրամ աջակցությունից:
Գրիգոր Իխտիարյան (Երեխա ունեցող ընտանիքների բնակարանային ապահովության պետական աջակցություն ծրագրի շահառու) - Ծրագրի մասին իմացել եմ ինտերնետից, կարդացել եմ մանրամասն օրենքը, և, ոնց որ թե, բոլոր կրիտերիաներին համապատասխանում էինք, հավաքել եմ բոլոր փաստաթղթերը, գնացել եմ նախարարություն, անցել ա մոտ 1 ամիս, ու «Արցախբանկում» ունենք հիփոթեք, 4 մլն դրամի միանգամից մարում է կատարվել, այսինքն՝ կանխիկով չեմ ստացել, բայց միանգամից 4 մլն մայր գումարից մարվել է:
Երեխաներ ունենալուց ո՛չ ծրագրի մասին գիտեին, ոչ էլ որևէ աջակցության հույս ունեին: Գրիգորը նոր ձևավորվող ընտանիքներին խորհուրդ է տալիս երեխա ունենալու հարցում չհապաղել:
Գրիգոր Իխտիարյան (Երեխա ունեցող ընտանիքների բնակարանային ապահովության պետական աջակցություն ծրագրի շահառու) - Պետական աջակցությունը կարևոր գործոն է, բայց որոշում կայացնողը, միևնույն է, առաջինը պետք է իր մեջ ընդունի ու գնա այդ քայլին: Խորհուրդ կտամ էս պատերազմից հետո հատկապես, էսքան մեր զոհերից հետո, հայ ազգը կարիք ունի աճելու, կարիք ունի նոր սերնդի. խորհուրդ կտամ ունենալ, ընդունել այն պարգևը, որ Աստված տալիս է մարդուն:
Եվա Ղազարյան (Երեխա ունեցող ընտանիքների բնակարանային ապահովության պետական աջակցություն ծրագրի շահառու) - Երեխաները պետք է շատ լինեն, մեկով շատ դժվար է, իսկ հիմա ես ավելի հանգիստ եմ, ամեն բան ավելի շատ եմ հասցնում, քան երբ մեկ բալիկ ունեինք:
Երեխա ունեցող ընտանիքների բնակարանային ապահովության պետական աջակցության գլխավոր նպատակը ծնելիության խթանումն է: Եվ եթե 4 մլն դրամը տրամադրվում է 3-րդ և հաջորդ երեխայի ծնվելու պարագայում, երբ շահառուի տարիքը չի գերազանցում 30-ը, չի նշանակում, որ 30-ից հետո աջակցություն չի տրամադրվում: Նույն պայմաններին բավարարելու դեպքում 3-րդ և հաջորդ երեխա ունենալիս աջակցությունը կլինի մինչև 2 մլն դրամ, եթե շահառուի տարիքը 30-ից բարձր է: Ծրագրի վերջին փոփոխությունը տարիքային շեմի բարձրացումն է՝ նախկինում 4 մլն դրամ կստանային այն շահառուները, որոնց տարիքը մինչև 25 էր:
Գայանե Ղարագյոզյան (ՀՀ աշխատանքի և սոցիալական հարցերի նախարարության ԿՍԱԳՀ խորհրդական) - Մեր վերլուծությունը ցույց տվեց, որ պայմանը կենսունակ չէ, և 1.5 տարվա ծրագրի գործունեության ընթացքում շահառու չէր եղել, ըստ այդմ որոշում կայացվեց տարիքային շեմը 25-ից դարձնել 30:
Ծրագրի գոյության ընթացքում պայմանները մի քանի անգամ բարելավվել են: Գայանե Ղարագյոզյանը ներկայացնում է դիմելու թարմացված պայմանները:
Գայանե Ղարագյոզյան - Նախ՝ երեխան պետք է ծնվի 20 թվականի հուլիսի 1-ին կամ դրանից հետո, և շահառուն պետք է ծրագրում ընդգրկվելու համար դիմի մինչև երեխայի 1 տարին լրանալը: Անշարժ գույքի ձեռքբերման և գնահատված արժեքները չպետք է գերազանցեն 30 մլն դրամը, որը 3-րդ կամ հաջորդ երեխայի հաշվով ավելացվում է 5 մլն դրամով: Եվ դիմելու օրվա դրությամբ շահառուն պետք է ունենա 12 ամիս մարում, ինչպես նաև վերջին 12 ամիսների ուշացումները չպետք է գերազանցեն 30 օրացուցային օրը:
Դիմելու օրվա դրությամբ 12 ամիս մարում ունենալը ևս նոր փոփոխություն է: Նախկինում շահառուն պետք է երեխայի ծննդյան հաջորդ ամսվա 1-ի դրությամբ ունենար 12 ամիս մարում: Հիմա շահառուն կարող է երեխայի ծնդնդից հետո սպասել, լրացնել մարումները և դիմել:
Գայանե Ղարագյոզյան - Բարելավման արդյունքում մենք նախ փորձում ենք ավելի պարզեցնել ծրագրին դիմելու ընթացակարգերը, որոշ առումով նաև հստակեցնել, որովհետև մայր փաստաթղթում եղել են որոշակի անորոշություններ, և իհարկե պայմանների մեղմացում, որը հանգեցնում է շահառուների շրջանակի ընդլայնման:
2021 թվականի ընթացքում ծրագրի բյուջեն 3 անգամ համալրվել է՝ առաջին եռամսյակում 70, երկրորդում՝ 100, երրորդ և չորրորդ եռամսյակներում՝ 420 մլն դրամով: Ծրագրի մեկնարկից՝ 2020-ի հուլիսի 1-ից մինչև այսօր աջակցություն է ստացել 1622 շահառու՝ ընդհանուր 1 մլրդ 123 մլն դրամի չափով: 1209 շահառու 786 մլն դրամի աջակցություն է ստացել միայն 2021-ին: Նախարարությունում վերլուծել են՝ դրական դինամիկան ակնհայտ է, ծրագիրը ծառայում է նպատակին:
