22 երկրի 115 ուսուցիչ` Ավստրալիայից մինչև ԱՄՆ, այս տարի մասնակցել է սփյուռքահայ ուսուցիչների 2021 թվականի վերապատրաստման ծրագրին, որը կազմակերպել է ՀՀ կրթության, գիտության, մշակույթի և սպորտի նախարարությունը։
Վերապատրաստումներն իրականացրել է «Ֆիչըր» ընկերությունը` «ՊրոԴեՖորմ» զարգացման մասնագիտացված հարթակի համագործակցությամբ:
Ծրագրի փակման առցանց արարողությանը մասնակցել և ուսուցիչներին ողջունել է ԿԳՄՍ նախարարի տեղակալ Արթուր Մարտիրոսյանը՝ նշելով, որ ավարտին է մոտեցել ուսուցիչների վերապատրաստման 21-րդ հերթական և 2-րդ հեռավար շրջանը:
«Սա ուղիղ մեկ ամիս տևած լարված աշխատանք էր թե՛ մասնակիցների, թե՛ կազմակերպիչների համար: Վստահ եմ՝ հեշտ չէր աշխատանքային օրվանից հետո 4.5 ժամ նստել համակարգչի առջև, ջանասիրաբար լսել և մտապահել ամբողջ տեղեկությունը: Դուք իրավամբ կատարում եք չափազանց կարևոր աշխատանք և այդ պատճառով չեք խնայում ձեր ժամանակը և ջանքերը»,- նշել է նախարարի տեղակալը։
Նրա խոսքով՝ այս տարվա ուսումնական ծրագիրը որոշակի չափով տարբերվում էր նախորդ տարիների ծրագրերից: Այն, ըստ Արթուր Մարտիրոսյանի, ուրվագծել է սփյուռքում հայեցի կրթության և դաստիարակության մեր այսօրվա պատկերացումները: Մասնավորապես, շեշտը դրվել է հայ մշակույթի պատմության և հայոց պատմության վրա, հրավիրվել են սփյուռքում աշխատող և ուրույն մեթոդներ մշակած մի քանի մասնագետներ, ձևավորվել է տնօրենների վերապատրաստման փորձնական խումբ:
«Այս վերապատրաստման դասընթացների շրջանակում մենք փորձել ենք հնարավորինս արտացոլել կրթության ոլորտում առկա մարտահրավերները: Հուսով եմ, որ կարողացանք օգտակար լինել ձեզ, իսկ ձեր միջոցով՝ նաև հայ երեխաներին: Վստահեցնում եմ, որ մենք կվերլուծենք հարցման արդյունքները, արված առաջարկությունները և դիտողությունները, որպեսզի հաջորդ անգամ դասընթացները լինեն առավել թիրախավորված, նպատակային և օգտակար»,- նշել է նախարարի տեղակալը և շնորհակալություն հայտնել բոլոր դասախոսներին, որոնք անխոնջ աշխատել են այս մեկ ամսվա ընթացքում՝ ուսուցիչների հետ կիսելով իրենց գիտելիքներն ու փորձը: Արթուր Մարտիրոսյանն առաձնահատուկ շնորհակալություն է հայտնել «ՊրոԴեՖորմ» զարգացման մասնագիտացված հարթակի հետ վերապատրաստումներն անցկացրած «Ֆիչըր» ընկերությանը՝ գործընթացը բարձր մակարդակով իրականացնելու համար։
Ծրագրի փակման արարողությանը «Ֆիչըր» ՍՊԸ և «ՊրոԴեՖորմ» խմբի ներկայացուցիչ Արսեն Սիմոնյանը ներկայացրել է հակիրճ հաշվետվություն։ Նա նշել է, որ վերապատրաստման ծրագրին մասնակցել է 22 երկրի 115 ուսուցիչ, 39 դասավանդող/հյուր, ինչպես նաև 11 աջակցող անձնակազմ։ Ծրագրի ընթացքում ուսուցիչներին մատուցվել է 840 ժամ դասընթաց։
Վերապատրաստումն իրականացվել է 7 առանձին ծրագրերով՝ նախկին 6-ի փոխարեն. «Ուսուցում մանկապարտեզում» (120 դ/ժամ), «Ուսուցում մեկօրյա դպրոցում» (120 դ/ժամ), «Հայերենի տարրական ուսուցում ամենօրյա դպրոցում» (120 դ/ժամ), «Հայոց լեզվի և գրականության դասավանդում» (120 դ/ժամ), «Տնօրենների վերապատրաստում» (80 դ/ժամ), «Հայոց պատմություն» (120 դ/ժամ), «Հայ մշակույթի պատմություն և արվեստ» (120 դ/ժամ)։ «Հայոց պատմության» և «Հայ մշակույթի պատմության և արվեստի» դասավանդումը՝ որպես առանձին ծրագրեր, ներառվել են առաջին անգամ։
Նշենք, որ վերապատրաստումներն իրականացվել են Մայր Աթոռ Սուրբ Էջմիածնի Քրիստոնեական դաստիարակության կենտրոնի, Ա. Իսահակյանի և Հ. Թումանյանի թանգարանների, «Կենաց տուն» և «Կայթ» կրթամշակութային կենտրոնների սերտ համագործակցությամբ։
Այս տարի վերապատրաստման համար ԿԳՄՍ նախարարությունը հատկացրել է 6.5 միլիոն դրամ: Վերջին երկու տարիներին՝ 2020 և 2021 թթ., կորոնավիրուսի համավարակով պայմանավորված, վերապատրաստումն իրականացվում է հեռավար ձևաչափով։
Հավելենք, որ 20 տարվա ընթացքում ծրագրով վերապատրաստվել է շուրջ 1100 ուսուցիչ 40 երկրից (Արգենտինա, Ուրուգվայ, ԱՄՆ, Աբխազիա, Բելառուս, Բուլղարիա, Ռուսաստան, Գերմանիա, Եգիպտոս, Թուրքիա, Ավստրիա, Ավստրալիա, Իրան, Իրաք, Քուվեյթ, Սիրիա, Լիբանան, Հունաստան, Ղազախստան, Ուկրաինա, Ֆրանսիա, Էստոնիա, Բրազիլիա, Կանադա, Բելգիա, ԱՄԷ, Իսպանիա, Եգիպտոս, Շվեյցարիա, Վրաստան, Իսրայել, Ռումինիա, Լիտվա, Լատվիա, Կանադա, Դանիա, Շվեդիա, Կիպրոս, Չեխիա, Նիդերլանդներ):
