«Արդարադատության ոլորտում պատկերացումները պիտի համապատասխանեն դեռ 2018-ի հեղափոխության օրերի Հայաստանի քաղաքացիների տեսլականին»,- ներկայացնելով նորանշանակ նախարար Կարեն Անդրեասյանին՝ նշել է վարչապետը:
Փաշինյանն արձանագրել է՝ արդարադատությունում իրականացվող բարեփոխումներից մինչև Պարեկային ոստիկանության ներդրում գերատեսչությունն ակտիվ մասնակցել է, այժմ պետք է ապահովել քաղաքականության շարունակականությունը:
Նիկոլ Փաշինյան (ՀՀ վարչապետ) - Մենք Պարեկային ոստիկանության ներդրման առաջին օրերից մթնոլորտի կարևոր փոփոխություն ենք տեսել, բայց նաև արձանագրել ենք պրակտիկ մի շարք խնդիրներ, որոնք պիտի լրջորեն ուսումնասիրվեն, Երևանի ռեզերվային ընդունելության ուսուցման գործընթացներում հաշվի առնվեն, որպեսզի արդեն Շիրակի և Լոռվա մարզերում Պարեկային ոստիկանության ծառայողները հենց ծառայության մեկնարկի առաջին րոպեներից ամբողջությամբ տիրապետեն խնդիրը, ներառյալ՝ այն խնդիրները, որոնք ի հայտ են եկել Երևանի պարեկային ոստիկանության գործարկման ճանապարհին:
Արդարադատության նորանշանակ նախարար Կարեն Անդրեասյանն էլ խոստացել է նոր լիցքեր հաղորդել նախկին բարեփոխումներին:
Կարեն Անդրեասյան (Արդարադատության նախարար) - Պարո՛ն վարչապետ, ուզում եմ խոստանալ, որ մեր այս երիտասարդ ու շատ կարող թիմի հետ կկարողանանք ի վերջո արդարությունը բերել բոլորին ամբողջ երկրում:
Վարչապետը նշել է նաև, որ նախկին նախարար Ռուստամ Բադասյանի առաջարկած քրեակատարողական ծառայության նոր մոդելը հետաքրքիր է և առաջիկայում պետք է ավելի մանրամասն քննարկել:
Վարչապետի հաջորդ այցը Պետական եկամուտների կոմիտեում էր: Նիկոլ Փաշինյանը աշխատակազմին է ներկայացրել կառույցի նորանշանակ նախագահ Ռուստամ Բադասյանին, արձանագրել ՊԵԿ-ում էական, տեսանելի փոփոխությունները:
Նիկոլ Փաշինյան - Բայց կա մի ճշմարտություն, որ փողը երբեք շատ չի լինում: Մեր պետությունը զարգացման յուրաքանչյուր հանգրվանում, այս հանգրվանում առավել ևս, ունի ավելի արդյունավետ ֆիսկալ քաղաքականություն վարելու կարիք:
Հենց այս նպատակով Պետեկամուտների կոմիտեն պետք է լինի հարկ վճարողի բարեկամը և հարկ թաքցնողի թշնամին, շեշտել է Նիկոլ Փաշինյանը: Մեկ դիտարկում էլ մաքսային ծառայության մասին:
Նիկոլ Փաշինյան - Մենք, եթե չեմ սխալվում, մեկ-երկու, հնարավոր է նույնիսկ երեք քրեական գործ ունենք հետևյալի մասին, երբ մաքսային կետով բեռներն անցել են այնպես, ինչպես, օրինակ՝ կանցնեին, ասենք Հանրապետության հրապարակով՝ Ամիրյան փողոցից դեպի Տիգրան Մեծ պողոտա: Իհարկե, օրենքի և նախաքննության տրամաբանությամբ մենք նախաքննություն ենք վարում, գտնում ենք մեղավորներին, ապացույցներ ենք հետազոտում, պարզում ենք՝ ում մեղավորությունն է ապացուցված, ում մեղավորությունն ապացուցված չէ, հետո գալիս ենք այն եզրակացության, որ այդ գործի մեջ մեղավոր են այդ օրվա հերթափոխի երկու կամ երեք ծառայող: Հույս ունեմ՝ նման դեպքեր չեն կրկնվի, արդեն իսկ տեղի ունեցած դեպքերով պետք է պատասխանատվության շատ ավելի լայն շրջանակ լինի:
Սա է առաջին պայմանն ու պահանջը Փաշինյանից: Վարչապետը բարձր է գնահատել նաև արդեն նախկին նախագահ Էդվարդ Հովհաննիսյանի ծառայությունները, հիշեցրել՝ նորանշանակ նախագահը ծանոթ է համակարգին: Բադասյանը խոստացել է՝ հասարակության համար կարևոր բարեփոխումները իրականացնելու համար կստեղծեն բյուջետային եկամուտներ ապահովող համակարգ:
Ռուստամ Բադասյան (ՊԵԿ նախագահ) - Իմ հիմնական դերակատարումներից մեկը համարում եմ այդ լավ ցուցանիշների պահպանումը: Նաև շատ եմ կարևորում, որպեսզի հարկային և մաքսային ոլորտում պետական ծառայությունները լինեն հասանելի մեր տնտեսվարողների համար: Տնտեսվարողները վաղուց արժանի են ավելի լավ պայմաններում սպասարկվելու, մաքսային և հարկային ոլորտում ավելի լավ ծառայություններ ստանալու:
Նորանշանակ նախարար Գնել Սանոսյանին ներկայացնելով՝ Փաշինյանը նշել է՝ նպատակ ունեն շատ գերատեսչությունների գործառութային արդյունավետությունը մեծացնել, իսկ այդ որոշումները պահի տակ կայացված որոշումներ չեն:
Նիկոլ Փաշինյան - Իհարկե, ես չեմ ասում, որ այդ որոշումները կատարյալ են և այդտեղ լավարկման ինչ-որ գործընթացներ չեն կարող տեղի ունենալ. բայց, ընդհանուր առմամբ, կարծում եմ, որ բոլորս գիտակցում ենք, որ պետք է առաջ գնանք և հետ գնալու ճանապարհ չկա: Այն, ինչի համար այդ գործընթացն սկսել ենք, պետք է ուղղակի իր լրումին հասցնել, այն է՝ մարդկային ռեսուրսի, ֆինանսական ռեսուրսի, գործառութային արդյունավետության բարձրացումն է մեր ճանապարհը: Պետք է շարունակենք գնալ այդ ճանապարհով
Արդեն նախկին նախարար Սուրեն Պապիկյանի խոսքով՝ մեր գրեթե ամենակարևոր արյունատար անոթներն անցնում են Տարածքային կառավարման և ենթակառուցվածքների նախարարության համակարգմամբ և պատրաստ է աջակցել:
Արդեն նորանշանակ նախարար Գնել Սանոսյանն էլ ընդգծել է՝ աշխատանքների ծավալը շատ է մեծացել հատկապես պատերազմից հետո, և այժմ արագ կանցնեն աշխատանքային պրոցեսի՝ իրենց առջև դրված խնդիրները համատեղ լուծելու:
Ճգնաժամային շրջանում երկրի ֆինանսական կյանքը բնականոն պահելու համար վարչապետը գնահատել է ՀՀ ֆինանսների նախարարության աշխատանքն ու ներկայացրել նորանշանակ նախարար Տիգրան Խաչատրյանին: Ըստ վարչապետի՝ օրակարգային երկու ուղղությամբ՝ պետական գնումների համակարգի բարելավման և պետական պարտքի կառավարման լուրջ անելիքներ կան:
Նիկոլ Փաշինյան - Եղել են իրավիճակներ, երբ կարողացել ենք քաղաքական կամք դրսևորել և անհրաժեշտ փոփոխություններ իրականացնել: Եվ պետք է ուղիղ ասել, որ եղել են իրավիճակներ, երբ չենք կարողացել քաղաքական կամք դրսևորել և իրականացնել անհրաժեշտ բարեփոխումներ: Կարծում եմ՝ հիմա այդ քաղաքական կամքը դրսևորելու լավագույն շրջանն է, երբ մեր երկրի առաջ առկա մարտահրավերները մեր հանրությանը, բոլորիս ավելի ընկալունակ են դարձնում բարեփոխումների և արդյունավետության բարձրացման կուրսն անշեղորեն շարունակելու այդ ուղղությունը:
Ֆինանսների նորանշանակ նախարար Տիգրան Խաչատրյանը նկատել է՝ դեռ 25 տարի առաջ Ատոմ Ջանջուղազյանի հետ նույն օրն են ոտք դրել նախարարություն և այժմ գործակցությամբ առավել արդյունավետ կաշխատեն:
Կառավարության կազմում վերադասավորումները դեռ չեն ավարտվել, բայց հիմնական կազմն արդեն հայտնի է: 2 փոխվարչապետն ու նախարարների մեծ մասը արդեն նշանակվել են:
