«Սիրիացիները հավատարիմ են իրենց ազատ և անկախ որոշմանը, ինչը հաստատում է նրանց վերաբերմունքը նախագահական ընտրություններին»: Այս հայտարարությունը, ինչպես հաղորդել է «Ալ Մայադին» հեռուստաալիքը, չորեքշաբթի արել է երկրի առաջնորդ Բաշար ալ Ասադը, որը կնոջ հետ քվեարկել է Դամասկոսի արվարձանային Դումա քաղաքի ընտրատեղամասերից մեկում:
Սիրիայի բարձրագույն ընտրական հանձնաժողովը որոշել է մինչև տեղական ժամանակով կեսգիշեր երկարաձգել տեղամասերի գործունեությունը՝ հաշվի առնելով քվեարկողների մասնակցության բարձր աստիճանը:
«Համաժողովրդական մասնակցությունը քվեարկությանը լիարժեք պատասխան է արևմտյան քաղաքական գործիչների հայտարարություններին, որոնցում խիստ քննադատվում են ընտրությունները և կոչ արվում դրանք անօրինական ճանաչել»,- ասել է Ասադը:
Գործող նախագահը ողջունել է Դումայի բնակիչներին և ընդգծել. «Մեր ներկայությունն այստեղ հուշում է, որ Սիրիայում շրջանների կամ կրոնական համայնքների միջև առճակատում չկա: Սիրիայում քաղաքացիական պատերազմ չի եղել, ինչպես պնդում է Արևմուտքը»:
Դուման գտնվում է Դամասկոսից 12 կմ հեռու, եղել է «Ջեյշ ալ Իսլամ» ծայրահեղական խմբավորման հենակետը, իսկ պատերազմի ընթացքում այստեղից պարբերաբար գնդակոծվում էր մայրաքաղաքը: Սիրիական բանակը քաղաք է մտել 2018 թ. ապրիլի 12-ին, երբ այնտեղից դուրս բերվեց ավելի քան 40 հազար զինյալ՝ իրենց ընտանիքների հետ: Նրանք տեղափոխվեցին Սիրիայի հյուսիս-արևմուտքում գտնվող Իդլիբ նահանգ:
Պետության ղեկավարի պաշտոնի համար պայքարում է երեք թեկնածու՝ Բաշար Ասադը, Սոցիալիստական կուսակցության նախկին պատգամավորն ու ընդդիմության ներկայացուցիչը:
