Անվտանգության խորհրդի քարտուղար Արմեն Գրիգորյանը «Ազատության» հետ զրույցում հայտարարել է, թե 2016 թվականի ապրիլյան պատերազմը կանգնել է Հայաստանի այդ ժամանակվա նախագահ Սերժ Սարգսյանի խոստումների հետևանքով, որոնք ունեցել են ժամանակացույց՝ ըստ որի այդ պայմանավորվածությունները պետք է կյանքի կոչվեին, և այդ խոստումները գոհացրել են Ադրբեջանին, որն էլ շուրջ հինգ տարի առաջ համաձայնել է կանգնեցնել ռազմական գործողությունները:
«Ապրիլյան պատերազմը կանգնել է հայկական կողմի խոստումների պատճառով: Ի դեպ, այդ խոստումներից հետո, որը որոշակի չափով ժամանակացույց էր ենթադրում և այդ ժամանակացույցը որոշակի չափով ամառվա ընթացքում էր, ամառվա ընթացքում տեղի է ունենում «Սասնա ծռերը», որը օգտագործելով Սերժ Սարգսյանը՝ ևս որոշակի չափով հետաձգում է մինչև 2017 թվականի ապրիլ, այնուհետև մինչև իշխանության տրանզիցիայի հետաձգում, բայց այդ մարդը, բազմաթիվ այդ խոստումները տալով, ստեղծելով այդպիսի բեռ Հայաստանի Հանրապետության համար, լքում է պաշտոնը և հետո գալիս ու հայտարարում է, որ «ես պատրաստ էի ստորագրելու, ես պատրաստ էի ինչ-որ քայլերի», մինչդեռ ես հստակ ասեմ, որ իր տված խոստումների պատճառով, իր ստեղծած փակուղիների պատճառով մենք կանգնել էինք լուրջ խնդիրների առաջ»,- ասել է Գրիգորյանը:
Հարցին՝ ի՞նչ խոստումներ է տվել Սերժ Սարգսյանը ապրիլյան պատերազմից հետո, նա պատասխանել է. «Երևի դա Սերժ Սարգսյանը կարող է ավելի հստակ ասել, բայց ապրիլյան պատերազմը կանգնել է, և դրան հետևել էր ժամանակացույց, ըստ որի պետք է այդ պայմանավորվածությունները կյանքի կոչվեին»:
Ըստ Գրիգորյանի՝ եթե Ադրբեջանը կանգնել է, Սարգսյանի խոստումները պետք է որ գոհացրած լինեն:
«Շատ հետաքրքիր է, որ ձեր նշած մարդը ասում է, որ ինքը պատրաստ է եղել ստորագրելու, և ինքը ևս պատերազմ է ստացել: Չմոռանանք, որ ապրիլյան պատերազմը եղել հենց այդ մարդու իշխանության օրոք, և իբրև ինքը ներկայացնում է, որ ինքը պատրաստ էր զիջումների, բայց պատերազմ է ստացել, այդտեղից մենք կարող ենք եզրահանգել, որ զիջումների հետ պատերազմն այդքան էլ կապված չէր, որովհետև եթե Սերժ Սարգսյանը պնդում է, որ ինքը զիջումների պատրաստ էր և գնում էր այդ զիջումներին, ապա ինչո՞ւ ինքը ստացավ ապրիլյան պատերազմ»,- ասել է Գրիգորյանը:
Մանրամասները՝ սկզբնաղբյուր կայքում:
