Լոռու մարզում ծառեր են հատվել: Արամ Քոչարյանը 25 տարի աշխատել է Դսեղի անտառտնտեսությունում, ինն ամիս առաջ քննություն էր հանձնել և նշանակվել նույն անտառտնտեսության տնօրեն:
Արամ Քոչարյան (Դսեղի նախկին անտառտնտեսության տնօրեն) - Շատ կարճ ժամանակում կարողացել եմ անտառտնտեսությունում իրականացնել ապօրինի ծառահատումների նվազեցում՝ գրեթե հասցնելով զրոյական վիճակի:
«Հայանտառում» որոշեցին Դսեղի և Լալվարի անտառտնտեսությունները միավորել: Նոր ստեղծված Թումանյանի անտառտնտեսության տնօրենի նոր մրցույթին մասնակցող երեք թեկնածուից հաղթեցին երկուսը, այդ թվում՝ Արամ Քոչարյանը: Տնօրեն նշանակվեց մյուս թեկնածուն՝ Լալվարի անտառտնտեսության ճարտարագետը: Արամ Քոչարյանը բողոքարկել է որոշումը՝ կասկածի տակ դնելով նշանակված տնօրենի մրցույթին ներկայացրած փաստաթղթերի իսկությունը, սակայն մինչ այդ անտառում հանցագործություն է կատարվել:
Արամ Քոչարյան - Տնօրենը նշանակվելուց առնվազն երկու-երեք օր անց, գիշերվա ժամերին, Դսեղի անտառտնտեսությունում ապօրինի գրեթե 100 ծառ է կտրվել:
Նախկինում էլ մենք այդ մասին խոսել ենք, որ Դսեղի անտառտնտեսության և Լալվարի անտառտնտեսության աշխարհագրական դիրքն այնպիսին է, որ հնարավոր չէ իրականացնել անտառպահպանություն, քանի որ ուղիղ գծով մենակ ճանապարհով 80-100 կմ է, իսկ եթե անտառային ճանապարհներով հսկենք իրավիճակը, ապա 200 կմ է, ինչը հնարավոր չէ նման ձևով հսկել անտառպահպանությունը:
Նախկին տնօրենը ենթադրում է, որ հատումների պատճառը անտառտնտեսությունների միավորումն է, հսկողության թուլացումը: Նախկինում էլ քննարկվել է միավորման հարցը, սակայն դա տեղի չի ունեցել: Այն, որ անտառում հատումներ լինում են, չեն ժխտում նաև դսեղցիները:
Միսաք Դավթյան (Դսեղի բնակիչ) - Հիմնական պատճառը դա է, որ աշխատանք չունեն, բայց կամաց քչանում է, վերանում է, էլի: Հիմա պատկերացնում են, որ էլ այդէդպես չի լինի, կամաց կվերանա էլի:
Արսեն Ալեքյան (Դսեղի բնակիչ) - Առաջ մեծ «ԿամԱԶ»ով էին տանում, բանով, հաշիվ-հաշվարկ չկար, հիմա էլ այդպիսի բան չկա, հիմա էլ մարդիկ փոքր ավտոյով կտորով տանում են, որ մի բան անեն: Քչացել է, շատ է քչացել:
Այն, որ Դսեղի անտառտնտեսությունում անօրինական ծառեր են հատվել, չի թաքցնում նաև նորաստեղծ Թումանյանի անտառտնտեսության նորանշանակ տնօրենը, սակայն խիստ կասկածելի է համարում այդ հատումներն իր պաշտոնակալությանը համընկնելը:
Կամո Ղարագյոզյան (Թումանյանի անտառտնտեսության տնօրեն) - Զրույց ունեցա տվյալ պահաբաժնի անտառապահի հետ, անտառապահն ասաց, որ ամսի 21-ին հայտնաբերել է, տեղյակ է պահել անտառապետին Դսեղի և տնօրենին: Տնօրենն էլ ասել է, որ մի բան կձեռնարկենք, բայց չգիտես ինչու ոչինչ չեն արել, այն դեպքում, երբ իրենց պարտականությունն է, անտառապահը, անտառապետը, մանավանդ եթե տնօրենին էլ տեղյակ պահվել է, ոչինչ չի արձանագրվել:
Նախկին տնօրենն ասում է, թե նորանշանակը այնքան է խառնվել, որ խառնում է ամեն ինչ: Նա օգոստոսի 21-ին արդեն ազատված էր աշխատանքից: Ինչո՞ւ պիտի անտառապահն իրեն զեկուցեր հատումների մասին, կամ զեկուցելուց հետո հանձնարարականներ տալու որևէ իրավասություն չուներ: Նորանշանակ տնօրենը խոսում է առայժմ 12 հատված ծառի մասին, մինչդեռ Բնապահպանության տեսչական մարմնի Լոռու բաժնում այլ վիճակագրություն կա:
Աշոտ Դարչինյան (Բնապահպանության և ընդերքի տեսչական մարմնի Լոռու տարածքային բաժնի պետական տեսուչ) - Բացահայտվել է անտառների միավորման արդյուքնում անտառի հանձնում ընդունում, որի շրջանակներում զննվում են անտառների ծառերը, հիշատակված դեպքով աշխատակիցների կողմից հանձնում-ընդունման ընթացքում բացահատվել է 104 ծառի հատում, գործը հանձնվել է Թումանյանի ոստիկանության բաժին, «անհատ անձով» է արձանագրվել:
Կբացահայտվե՞ն մեծածավալ անտառահատման մեղավորները, թե՞ ոչ՝ ժամանակը ցույց կտա:
Կամո Ղարագյոզյան - Հիմա նոր է հանձնում-ընդունում կատարվում: Թղթային մասն ենք կազմում, բայց որպես խնդրահարույց հատված՝ ապօրինի հատումներ էլի կլինեն: Բայց շատ խիստ ենք լինելու, ապօրինի հատումները պիտի բացառվեն՝ գիտակցելով որ դա պրոցես է, որ շատ բարդ է:
Երկու անտառտնտեսությունների միավորումից աշխատողներ են կրճատվել, բայց նոր աշխատատեղեր էլ են բացվել: Իսկ նորանշանակ տնօրենը վստահեցնում է, որ ապօրինի հատումների դեմ անզիջում է պայքարելու:
