ՀՀ էկոնոմիկայի նախարարությունը 2019 թ. դեկտեմբերից հանրապետության բոլոր մարզերում նախաձեռնել է տեղեկատվական արշավ, որի նպատակն է համայնքապետերին և ֆերմերներին իրազեկել գյուղատնտեսության ոլորտում իրականացվող պետական օժանդակության ծրագրերի մասին:
Այցերի շրջանակում գյուղոլորտի պատասխանատուները եղել են Գեղարքունիքի մարզում, որտեղ հանդիպում է կազմակերպվել համայնքապետերի և գյուղատնտեսության ոլորտի տնտեսվարողների հետ:
Նախարարությունից միջոցառմանը մասնակցել են Գյուղատնտեսական ծրագրերի մշակման, ռեսուրսների օգտագործման և կոոպերացիայի զարգացման վարչության պետ Իռա Փանոսյանը և նախարարի խորհրդական Դավիթ Դավթյանը:
Հանդիպման սկզբում Գեղարքունիքի մարզպետի տեղակալ Նարեկ Գրիգորյանն իր ողջույնի խոսքում նշել է, որ որպես գյուղատնտեսական մարզ՝ Գեղարքունիքում մեծ կարևորություն է տրվում այս ոլորտում իրականացվող բոլոր ծրագրերին, և հույս է հայտնել, որ ներկայացվող ծրագրերը կնպաստեն մարզում գյուղատնտեսության հետագա զարգացմանը:
Այնուհետև Իռա Փանոսյանը հանդիպման մասնակիցներին հանգամանորեն ներկայացրել է պետական օժանդակության ծրագրերը, առանձին անդրադարձ կատարել նախարարության նոր նախաձեռնություններին, այդ թվում` փոքր և միջին «խելացի» անասնաշենքերի կառուցման, փոքր և միջին ջերմատնային տնտեսությունների ներդրման ծրագրերին:
Իռա Փանոսյանը տեղեկացրել է նաև գյուղոլորտում ապահովագրական համակարգի ներդրման մասին և հավելել, որ Գեղարքունիքի մարզի ֆերմերներին 2020 թվականի փետրվարի 5-ից հասանելի է դեղձի, խնձորի, աշնանացան գարու/ցորենի և գարնանացան գարու/ցորենի ապահովագրությունը: Նախարարության ներկայացուցիչը հավելել է, որ ապահովագրության պայմանների վերաբերյալ լրացուցիչ տեղեկություններ կարելի է ստանալ «Ինգո Արմենիա», «Ռոսգոսստրախ-Արմենիա» կամ «Սիլ Ինշուրանս» ապահովագրական ընկերություններում:
«Բոլոր 12 օժանդակության ծրագրերն էլ ուղղված են գյուղատնտեսության ոլորտում արդյունավետության բարձրացմանը, նպաստավոր պայմաններ են ստեղծված, որպեսզի ֆերմերները զբաղվեն գյուղատնտեսական գործունեությամբ»,- ամփոփելով իր խոսքը` նշել է Իռա Փանոսյանը: Նա նաև տեղեկացրել է, որ մարզերում ֆերմերների հետ հանդիպումների ընթացքում ներկայացված առաջարկներն ու խնդիրները կվերլուծվեն և հաշվի կառնվեն նոր ծրագրերի մշակման ընթացքում:
