Օրերս «Սուրբ Գրիգոր Լուսավորիչ» ԲԿ-ի վնասվածքաբանական բաժանմունքի վարիչ Կարեն Մանուկյանն ավարտին է հասցրել բազմաբարդ 3 փուլով նախատեսված վիրահատությունը, որն իր տեսակի մեջ եզակի է: 2013 թ. բժշկական կենտրոն տեղափոխված հիվանդին այլ հիվանդանոցում ցուցել էին ոտքի անդամահատում` կյանքը փրկելու նպատակով:
Հիվանդի մոտ ախտորոշվել էր բազմաբեկոր ներհոդային կոտրվածք` մաշկի և հյուսվածքների ջնջխումով: Տվյալ հիվանդանոցի կարծիքը կիսել են նաև «Սուրբ Գրիգոր Լուսավորիչ» ԲԿ-ի անոթային և միկրովիրաբույժները` կյանքը փրկելու նպատակով վերջույթի ամպուտացիայի անհրաժեշտություն:
Դեպքը տեղի է ունեցել քարահատման արհեստանոցում: Ինչպես պատմում է պացիենտ Նորիկ Մարգարյանը, աշխատանքի ընթացքում անուշադրության հետևանքով նրա ձախ ոտքին է ընկել 15 տոննայանոց քար, որից հետո ոտքը կտրվել է ամբողջությամբ. «Ընդամենը մի ջիլ էր մնացել, ոտքս ծնկից ներքև կտրվել էր լրիվ, ես աշխատող մարդ եմ, չէի ուզի հաշմանդամ մնալ, ինձ նման կյանք պետք չէր»,- հիշում է Մարգարյանը:
«Սուրբ Գրիգոր Լուսավորիչ» ԲԿ վնասվածքաբանության բաժանմունքի վարիչ Կարեն Մանուկյանը դեմ էր վերջույթի ամպուտացիային: Նրա ստորագրությամբ և պատասխանատվությամբ անոթային վիրաբույժի հետ մոտ 8,5 ժամ տևած վիրահատության արդյունքում փրկվում են Մարգարյանի ոտքն ու կյանքը:
Վիրահատության երկրորդ փուլով իրականացվում է որոշակի միջամտություն, ինչպես նաև ոսկրի պլաստիկա, որից հետո տեղի է ունենում ոսկրի սերտաճում: Նորիկ Մարգարյանին առաջարկվում է վերջնական վիրահատություն` սրունքի ոսկորների ուղղիչ ոսկրահատում, Իլիզարովի ապարատի տեղադրում և վերջույթի երկարացում:
«Առաջին վիրահատությունից հետո էլ ես ինքնուրույն եմ քայլել, ուղղակի կաղում էի: Բժիշկ Մանուկյանը շատ սրտացավ ու համառ էր, ինչի համար ես շնորհակալ եմ ու խոսքեր չունեմ, նա մշտապես պնդում էր, որ ինձ երրորդ վիրահատությունն է պետք, որ ոտքս երկարացնեն ու հավասարվի մյուսին»,- նշել է պացիենտը:
Երրորդ վիրահատությունը հաջող է անցել, շուտով Նորիկ Մարգարյանը հրաժեշտ կտա ժամանակավոր հենակներին և ինքնուրույն կքայլի: