Պաշտպանության նախարարի տեղակալ Գաբրիել Բալայանն այսօր լրագրողների հետ զրույցում նշել է, որ վերջին 3 օրերին հակառակորդի կողմից կրակոցները նվազել են: Նա նշել է նաև, որ կա զինակոչիկների թվի ավելացում, հագուստի, սննդակարգի նոր որակ:
Բալայանն ընդգծել է, որ հիմնական մարտահրավերը գնումների ոլորտն է: «Կարծում եմ՝ այսօր գոնե բողոքարկումների առումով շատ լավ իրավիճակ ունենք, և ՊՆ համակարգում աշխատելիս ինքս շատ դեպքերի եմ առնչվել նույն իրային, պարենային ապահովման հետ, դրանք եթե չեն վերացել, գոնե նվազել են, և մենք ընդունում ենք, որ շատ բան ունենք անելու և այդ ուղղությամբ աշխատում ենք»,- ասել է Բալայանը։
Անդրադառնալով «Իմ քայլի» պատգամավորի թեկնածուի հետ 2,4 միլիարդ դրամի պայմանագիր կնքելու թեմային՝ Բալայանն ասել է․ «Պաշտպանության նախարարությունը գործում է օրենքով, կառավարության որոշմամբ սահմանված իրավակարգավորումների շրջանակում: Եթե կա կոռուպցիոն գործարքի մտավախություն, կարող են համապատասխան ընթացակարգերով բողոքարկել: Եթե բողոք չի եղել մրցույթի մյուս մասնակիցներից՝ ինչի՞ մասին է խոսքը։ Բացի դրանից՝ ընթացակարգի վրա հսկողություն կա մի քանի մարմինների կողմից, ոչ մի մարմին այդ մասին չի խոսել»:
