Մասնագետներն ալերգիան համարում են 21-րդ դարի «անտեսանելի համաճարակ»: ԱՆ ալերգոլոգիայի գծով խորհրդատու Արմինե Հակոբյանը ներկայացրել է ալերգիայի հիմնական դրսևորումները։
Ստուգե՛ք ինքներդ Ձեզ, եթե հետևյալ ախտանիշները կրկնվում են կամ առաջանում են որոշակի իրավիճակներում, հնարավոր է՝ դրանց պատճառը ալերգիան է.
հաճախակի փռշտոց, հատկապես առավոտյան,
քթարտադրություն կամ խցանում առանց մրսածության,
աչքերի քոր, կարմրություն կամ արցունքահոսություն,
երկարատև չոր հազ,
շնչահեղձության կամ սուլոցների նոպաներ,
կրկնվող մաշկային ցան կամ քոր,
շրթունքների, կոպերի կամ դեմքի այտուց։
Եթե այս նշանները պարբերաբար կրկնվում են, անհրաժեշտ է դիմել բժշկի։
5 միֆ, որը հերքվել է գիտությամբ ու փորձով.
Միֆ 1. Ալերգիան լոկ անհարմարություն է պատճառում։
Փաստ. Որոշ ալերգիկ հիվանդություններ, օրինակ՝ բրոնխիալ ասթման կամ ծանր ալերգիկ ռեակցիաները, կարող են կյանքին սպառնացող լինել։
Միֆ 2. Ալերգիան սկսում է միայն մանուկ հասակից։
Փաստ. Այն կարող է սկսվել կյանքի ցանկացած շրջանում։
Միֆ 3. Եթե ախտանիշներն անցան, բուժում այլևս պետք չէ։
Փաստ. Ալերգիկ հիվանդությունները հաճախ ունեն ալիքաձև ընթացք և պահանջում են ճիշտ հսկողություն։
Միֆ 4. Ալերգիայի բոլոր դեղերը քնկոտություն են առաջացնում։
Փաստ. Ժամանակակից հակահիստամինային դեղամիջոցների մեծ մասը չի առաջացնում արտահայտված քնկոտություն։
Միֆ 5. Ալերգիայի դեպքում պետք է պարզապես խուսափել ալերգենից։
Փաստ. Շատ դեպքերում միայն խուսափելը բավարար չէ։ Ճիշտ ախտորոշումն ու բուժումը կարող են կանխել հիվանդության առաջընթացը և զգալիորեն բարելավել կյանքի որակը։
Ե՞րբ է անհրաժեշտ անհապաղ դիմել շտապ բժշկական օգնության.
Եթե ալերգիկ ռեակցիայի ընթացքում առաջանում են դժվարացած շնչառություն, կոկորդի կամ լեզվի այտուց, խոսելու կամ կուլ տալու դժվարություն, գլխապտույտ կամ գիտակցության կորուստ, անհրաժեշտ է անմիջապես զանգահարել շտապ բժշկական օգնություն։ Այս վիճակը կարող է լինել անաֆիլաքսիա և պահանջում է անհապաղ բուժում։
«Ժամանակակից բժշկությունն ունի արդյունավետ ախտորոշման և բուժման հնարավորություններ, որոնց շնորհիվ մարդկանց մեծ մասը կարող է ապրել լիարժեք և ակտիվ կյանքով։
Մի՛ զբաղվեք ինքնաբուժմամբ։ Եթե ախտանիշները կրկնվում են, դիմե՛ք բժշկի և ստացե՛ք մասնագիտական գնահատում»,- խորհուրդ է տվել մասնագետը։
