Չորեքշաբթի ՆԱՍԱ-ն հույս ունի Կանավերալ հրվանդանի տիեզերակայանից Լուսին ուղարկել վերջին 54 տարվա ընթացքում տիեզերագնացների առաջին արշավախումբը:
Սակայն Լուսնի մակերեսին վայրէջք առայժմ տեղի չի ունենա. «Արտեմիս-2» արշավախմբի ծրագրի համաձայն՝ չորս տիեզերագնաց կպտտվի Լուսնի շուրջը և 10 օրից կվերադառնան երկիր:
Լուսնի վրա վայրէջքը նախատեսված է 2028 թվականին, իսկ հետո, պարբերաբար արշավախմբեր ուղարկվեն Լուսին, NASA-ն նախատեսում է այնտեղ մշտական բազա կառուցել։
Առաջիկա առաքելության վերաբերյալ NASA-ի ներկայացուցիչները հայտարարել են, որ ամեն ինչ պատրաստ է։ Եթե եղանակը՝ ամպերը, ուժեղ քամին կամ տեխնիկական անսարքությունները չխանգարեն, «Օրիոն» տիեզերանավով Space Launch System հսկա հրթիռը կմեկնարկի ապրիլի 1-ին՝ տեղական ժամանակով ժամը 18:24-ին:
Եթե չորեքշաբթի մեկնարկը ձախողվի, NASA-ն պատրաստ է ևս մեկ փորձ կատարել:
Ինչպես նշում է BBC-ն, «Արտեմիս» ծրագրի հաջողությունը Միացյալ Նահանգներին լրացուցիչ առավելություն կտա Չինաստանի նկատմամբ տիեզերական մրցավազքում ընդհանրապես և Լուսնի հանքային պաշարների համար պոտենցիալ պայքարում՝ մասնավորապես։
Երկարաժամկետ հեռանկարում NASA-ն նախատեսում է լուսնային բազան որպես ցատկահարթակ օգտագործել Մարս մարդու թռիչքների համար:
