«Երեկ ռուսաստանցի գործարար Սամվել Կարապետյանի եղբորորդին՝ Նարեկ Կարապետյանը, մի տեսանյութ էր հրապարակել, որտեղ համեմատում էր Իսպանիայի, Շվեդիայի, Բելգիայի, Դանիայի թագավորական ընտանիքների բյուջեները Հայաստանի Հանրապետության վարչապետի աշխատակազմի բյուջեի հետ։ Իհարկե, միջազգային ֆինանսական կառույցները և ֆինանսիստները հիմա կախվել են այսպիսի կոպիտ և սխալ հաշվարկներից, բայց ես կուզեմ սրան անպայման անդրադառնալ»,-այս մասին ֆեյսբուքյան իր էջում տեսանյութ է տարածել վարչապետի աշխատակազմի ղեկավար Արայիկ Հարությունյանը։
Հիշեցնենք՝ ավելի վաղ Նարեկ Կարապետյանը հայտնել է, թե վարչապետի աշխատակազմի ծախսերն ավելացրել են չորս անգամ, դրանք դարձել են 65 միլիոն դոլար։
«Որպեսզի հասկանաք, Հայաստանի վարչապետի աշխատակազմը ծախսում է ավելի շատ, քան Իսպանիայի թագավորական ընտանիքը, գումարած Շվեդիայի թագավորական ընտանիքը, գումարած Բելգիայի թագավորական ընտանիքը, գումարած Դանիայի թագավորական ընտանիքը, իրար հետ վերցրած»,-նշել էր Կարապետյանը։
Արայիկ Հարությունյանի խոսքով՝ ճիշտ չէ համեմատել թագավորական ընտանիքների բյուջեները երկրի ղեկավարի բյուջեի հետ։
«Օրինակ, Դանիայի թագավորական ընտանիքի բյուջեում չկա տեսչական մարմինների գրասենյակի, ուրեմն, գումարներ և տեսչական մարմինների քաղծառայության, Սփյուռքի հանձնակատարի գլխավոր գրասենյակի, Անվտանգության խորհրդի գրասենյակի, բայց սա էլ ոչինչ։ Նայեք, ինքն ասում է՝ չորս անգամ։ Եվ սուտը սրանում է կայանում։ Ես խնդրել եմ հանել թվերը, և այդ համեմատական թվերը հեչ իրենց օգտին չեն։ Ուրեմն, քանի որ մենք 2018 թվականին անցել ենք պառլամենտական կառավարման ձևի, ես խնդրել եմ, որպեսզի գումարները տան 2010 թվականին, երբ որ Նարեկ Կարապետյանի հայրը եղել է Սերժ Սարգսյանի աշխատակազմի ղեկավարը։ Այդ թիվը կազմել է 29 միլիարդ դրամ՝ 2010 թվականին։ 2026 թվականին երկու բյուջեները միասին՝ նախագահի և վարչապետի աշխատակազմի, կազմում են մոտ 27 միլիարդ դրամ։ Եվ սա ոչ այլ ինչ է, քան աղաղակող սուտ։ Բայց սա էլ մի կողմ։
Ես խնդրել եմ, որպեսզի համամասնությունները հանեն՝ 2010 թվականի բյուջեում այդ գումարը քանի՞ տոկոս է կազմել և 2026 թվականին։ Եվ, Նարեկ ջան, էլի սա քո օգտին չի ընդհանրապես, որովհետև 2010 թվականին այդ բյուջեի մեջ՝ 950 միլիարդ բյուջեի մեջ, այդ գումարը կազմել է 3.1%, իսկ այս տարի, նայի՛ր, հայրիկիդ ժամանակվանից չորս անգամ ավելացրել ենք բյուջեն։ Ուրեմն, այդ գումարը կազմում է 0.8% համամասնորեն։ 3.1% և 0.8%։
Եվ այսպիսի բաներ մի՛ արեք։ Մեզ պետք է լավ ընդդիմություն։ Դուք վատ ընդդիմություն եք։ Իսկ իշխանության համար լավ ընդդիմություն ունենալը նշանակում է առողջ միջավայր և առաջընթաց»,-նշել է Հարությունյանը։
