Հինգշաբթի Ֆրանսիայի նախագահ Էմանուել Մակրոնը հայտարարել է, որ 2026 թվականի ամռանից երկրում կներդրվի 18-19 տարեկան երիտասարդ տղամարդկանց և կանանց կամավոր զինվորական ծառայություն՝ գրում է BBC-ն:
Այն կլինի վճարովի և կտևի 10 ամիս: Ազգային բյուջեի համար ծախսերը կկազմեն 2 միլիարդ եվրո (մոտավորապես 2,32 միլիարդ դոլար): Նախագահը դա անվանել է «նշանակալի և անհրաժեշտ քայլ», որը նախատեսված է Ռուսաստանից աճող սպառնալիքին արձագանքելու համար։
Մակրոնը նախատեսել է 2026 թվականին հավաքագրել 3000 կամավոր և մինչև 2030 թվականը այդ թիվը հասցնել 10000-ի։
«Իմ նպատակն է մինչև 2036 թվականը այս թիվը հասցնել 50000 երիտասարդի՝ կախված նրանից, թե ինչպես են զարգանում սպառնալիքները»,- նշել է Ֆրանսիայի նախագահը։
Ծառայությունն ավարտած կամավորները կկարողանան վերադառնալ քաղաքացիական կյանքի, տեղափոխվել պահեստազոր կամ շարունակել իրենց զինվորական կարիերան։
