Ոչ միայն Ասլան Մխիթարյանի, այլև շատ հայ ճարտարապետների նախագծեր են քննարկվել, միջազգային շատ հեղինակավոր ճարտարապետական գրասենյակների նախագծեր են քննարկվել: Երևանի ավագանու նիստին պատասխանելով «Մայր Հայաստան» խմբակցության քարտուղար Սամվել Հարոյանի՝ «Կասկադ» համալիրի մասին հարցին՝ ասաց քաղաքապետ Տիգրան Ավինյանը:
Նա հիշեցրեց համալիրի վերջնահատվածի հետ կապված պատմությունը:
«Սկսենք 2007 թվականից, երբ «Գաֆեսճյան» հիմնադրամը առաջարկել է իրականացնել «Կասկադ» համալիրի վերջնահատվածի կառուցման աշխատանքները, այսինքն՝ այն հատվածի կառուցման աշխատանքները, որոնք հիմա Երևանի քաղաքապետարանը նախաձեռնել է, որ իրականացնի:
2007 թվականին տեղի է ունենում ճարտարապետական միջազգային մրցույթ, որին մասնակցում են տարատեսակ ընկերություններ, որոնց ճարտարապետական առաջարկները քննարկելուց հետո որևէ մեկը չի ընտրվում: Ընտրվում է նյույորքյան ճարտարապետական գրասենյակի առաջարկ, որը շատ հետաքրքիր առաջարկ է լինում: Ջիմ Թորոսյանը, անձամբ ինքը՝ Կասկադ համալիրի հեղինակը, ընդունում է, որ այդ հատվածում կարող է իրենց նախորդ առաջարկված նախագծից տարբերվող նախագիծ իրականացվել: Սա 2007 թվականի պատմության մասին է խոսքը: Արդեն իսկ այդ ժամանակ, երբ քննարկումները տեղի են ունենում, նախագծի հեղինակը իր դրական եզրակացությունն է տալիս այդ ճանապարհով շարժվելու՝ հաշվի առնելով այս հանգամանքը, որ կար նյույորքյան ճարտարապետական գրասենյակի առաջարկ: Հետո տեղի է ունենում միջազգային ֆինանսական տնտեսական ճգնաժամ, նախագիծը չի իրականացվում, հիմքերը փորվում են, ստեղծվում, այդ կետում կանգնում են մինչև 2024 թվականը, երբ էլի ակտիվանում են այս խոսակցությունները:
Ես անձամբ հանդիպեցի նյույորքյան գրասենյակի ճարտարապետի հետ, և դրան զուգահեռ Երևանի քաղաքապետարանում մենք քննարկում ենք Նորագյուղ թաղամասի վերակառուցման ծրագիրը, որի ժամանակ Երևանում է լինում ֆրանսիացի հեղինակավոր ճարտարապետ Ժան-Միշել Վիլմոտը: Նա իր նախաձեռնությամբ իրականացնում է նաև Կասկադ համալիրի վերջնահատվածի էսքիզային առաջարկ: Մեր ճարտարապետական խորհուրդը ընդլայնված կազմով քննարկում է «Կասկադ» համալիրի տարբեր առաջարկներ, և որոնք որ եղել են նախկինում՝ և՛ նյույորքյան առաջարկը, և՛ ֆրանսիացի ճարտարապետի առաջարկը: Ոչ մի հանգուցալուծման չի գալիս: Պարոն Ասլան Մխիթարյանը նույնպես մասնակցում է քննարկումներին: Ոչ մի հանգուցալուծման չեն գալիս, և առաջարկ է լինում որոշակի ֆիլտրված տրամաբանությամբ դնել քվեարկության, որ մարդիկ իրենք որոշեն, թե որ ճարտարապետական առաջարկը պետք է լինի Կասկադում: Այդ առաջարկներից վերջում ֆիլտրվում են 2 նախագծեր: Տարբեր պաճառներով այլ նախագծեր չեն ներգրավվում:
«Ակտիվ քաղաքացի» հարթակում որոշվում է, որ ֆրանսիական նախագիծն է իրականացվելու: Ֆրանսիական նախագիծը մենք վերցնում ենք որպես հիմք էսքիզային առաջարկի և դնում ենք կառուցման մրցույթի, և դրա հիմքում դնում ենք, որ կենտրոնական հատվածում էլ ինչ պետք է կառուցվի, ամբողջապես հանձնվում է քաղաքին, և դրա այդ ծախսը, որպեսզի փոխհատուցվի, տրվում է հնարավորություն հարակից տարածքում բազմաֆունկցիոնալ կոմպլեքսի կառուցման»,- նշեց Ավինյանը:
