Երևանի քաղաքապետարանից տեղեկացնում են, որ մայրաքաղաքի Նորաձևության շաբաթը՝ YFW-ը, վերադառնում է՝ մեկ տանիքի ներքո համախմբելով հայ և միջազգային դիզայներների, ոլորտի առաջատար մասնագետների, ազդեցիկ հյուրերի և նորաձևության սիրահարների:
Նախագծի գլխավոր հովանավոր և գործընկեր Երևանի քաղաքապետարանի, միջազգային և տեղական գործընկերների հետ համատեղ Հայաստանի նորաձևության և հագուստի պալատը հոկտեմբերի 23-26-ը կանցկացնի «Երևանի նորաձևության շաբաթ 2025» ամենամյա միջոցառումը, որը 2023-ից պաշտոնապես իրականացվում է՝ նպատակ հետապնդելով զարգացնել հայկական նորաձևությունը և ճանաչելի դարձնել համաշխարհային հարթակներում, իսկ Երևան քաղաքը աստիճանաբար դասել նորաձևության շաբաթ հյուրընկալող քաղաքների շարքում։
Հայաստանի նորաձևության և հագուստի պալատը ուրախ է հայտարարել երրորդ Նորաձևության շաբաթվա մեկնարկը՝ հագեցած տպավորիչ միջոցառումներով, ցուցադրություններով, ցուցահանդեսներով և ստեղծագործական այլ նախագծերով, որոնց ընթացքում դիզայներները կցուցադրեն իրենց նոր հավաքածուները, իսկ այցելուները հնարավորություն կունենան մասնակցելու բրենդերի անհատական ցուցադրությունների, նորաձևության էքսպոյի, թեմատիկ քննարկումների և ցուցահանդեսների: YFW 2025-ը կլուսաբանվի նորաձևության լավագույն միջազգային և տեղական մեդիայի կողմից՝ Vogue, Elle, Harper's Bazaar, BBC, Le Mile, Fucking Young, White Milano, Tranoi և այլն:
Այս իրադարձությունը հիանալի հնարավորություն է հայ դիզայներների համար՝ ցուցադրելու իրենց ստեղծագործությունները, իսկ նորաձևության սիրահարների համար՝ սուզվելու նորաձևության հրաշալի աշխարհ, բացահայտելու վերջին թրենդները և ժամանակակից զարգացումները, ինչպես նաև հյուրընկալելու միջազգային դիզայներների և ոլորտի ներկայացուցիչների։
Երևանի նորաձևության շաբաթը ահռելի ազդեցություն է ունենում նաև տուրիզմի զարգացման վրա․ բազմաթիվ օտարերկրյա հյուրերի մասնակցությունը, նրանց լուսաբանումները՝ մշակութային համալիրների, ժամանցային վայրերի, հյուրընկալության, միջոցառումների վերաբերյալ, բարձրացրել են Երևանի՝ որպես զբոսաշրջային հետաքրքիր ուղղության վարկանիշը և տեսանելիությունը։ Միջոցառումը խթանում է տեղական արտադրանքի զարգացումը՝ ցույց տալով, որ Երևանը պատրաստ է հյուրընկալել և կազմակերպել միջազգային չափանիշներով անցկացվող միջոցառումներ և, որպես զբոսաշրջային ուղղություն, կարող է գրավիչ լինել նա այդ տեսանկյունից։
2023 և 2024 թվականների արձանագրած արդյունքները և հանդիսատեսի բարձր գնահատականը փաստում են միջոցառման հաջողված լինելը և հիմք են հանդիսանում ապացուցելու, որ միջոցառումը պետք է ունենա շարունակական բնույթ և տարեցտարի լավագույնս ներկայացնի Երևանը՝ իր նորաձև և ստեղծագործ մտքով:
Yerevan Fashion Week 2025-ի շրջանակում այս տարի նախատեսվում է ունենալ 4 հագեցած օր, ավելացնել միջոցառումների, միջազգային հյուրերի, դիզայներների ցանկը 2024 թվականի համեմատ՝ ունենալով հետևյալ միջոցառումները`
-
Ավելի քան 20 հայ և միջազգային (ԱՄԷից, Իրանից, Ղազախստանից, Ուզբեկստանից, Մոլդովայից, Ռուսաստանից) դիզայներների հավաքածուների ցուցադրություններ` նորարարության, կայունության, մշակութային ինքնության շեշտադրմամբ։
-
Fashion Scout Armenia երիտասարդ դիզայներների մրցույթ՝ նվիրված նոր տաղանդների բացահայտմանն ու նրանց միջազգային ճանաչում ապահովելուն Fashion Scout միջազգային հարթակի միջոցով https://fashionscout.com/fashion-scout-armenia` հնարավորություն տալով ներկայանալ Լոնդոնի նորաձևության շաբաթին և Polimoda ուսումնական ծրագրին:
-
Fashion Expo ցուցահանդեսային տարածք՝ ավելի քան 60 հայկական և միջազգային բրենդների համար: Այս ձևաչափը հնարավորություն կտա կազմակերպություններին ներկայացնել հավաքածուները, կապեր և նոր համագործակություններ ստեղծել, իրականացնել վաճառքներ, բարձրացնել իրենց ապրանքանիշների տեսանելիությունը, շփվել հրավիրված միջազգային հյուրերի, ոլորտի փորձագետների հետ, կիսվել փորձառությամբ։
-
Fashion Talks շուրջ 15 պանելային քննարկումներ նորաձևության միջազգային հեղինակավոր հյուրերի հետ հետևյալ թեմաներով՝ ոճավորում, լուսանկարչություն, կայունություն, ՏՏ և նորաձևություն, պորտֆոլիոյի ստեղծում և այլն։
-
Ցուցահանդես Ազգային պատկերասրահում՝ շուրջ 30 դիզայների ստեղծագործություններ՝ հռչակավոր նկարիչների աշխատանքներից ոգեշնչված:
-
Հատուկ նախագծեր, ինչպիսիսք են CRELAB Տավուշ և Կոտայք մարզային կենտրոնների կողմից ստեղծված ցուցադրություն և ցուցահանդես, Pepsi x YFW մրցույթ, Denim Cycle ցուցադրություն։
-
After Party միջոցառումներ, հյուրասիրություններ, երեկույթներ` համագործակցության և կապերի ստեղծման հնարավորություն ընձեռնելու տեղական և միջազգային ոլորտի ներկայացուցիչների միջև։
Այս միջոցառումը հայկական նորաձևության, մշակույթի և ստեղծարարության տոն է՝ հագեցած ծրագրով՝ նորաձևության ապշեցուցիչ ցուցադրություններից և ցուցահանդեսներից մինչև աշխույժ երեկույթներ և այլ ուշագրավ հանդիպումներ: Ներկաները հնարավորություն կունենան տեսնել հայկական բրենդների արտադրանքը, մասնակցել պանելային քննարկումների և ցուցահանդեսների, շփվել իրենց սիրելի դիզայներների, միջազգային հյուրերի, այդ թվում՝ նորաձևության մամուլի, փորձագետների, գնորդների և ազդեցիկ մարդկանց հետ:
