Մեկնարկել է «Հաջողակից՝ սկսնակին» ծրագրի 4-րդ՝ «Միմյանցից ոգեշնչված» փուլային նախագիծը, որի շահառու կարող են դառնալ բոլոր ՀՀ քաղաքացի հանդիսացող, 22 տարեկանը լրացած այն կանայք, ովքեր ցանկանում են զարգացնել կամ սկսել իրենց փոքր բիզնեսը: Դիմելու համար անցեք այս հղումով և լրացրեք հայտը (վերջնաժամկետ` դեկտեմբերի 1):
«Ծրագրի շրջանակում հարցազրույցի փուլը հաղթահարած և ընտրված բոլոր մասնակիցները անցնելու են բիզնեսի պլանավորման և կառավարման մեկամսյա համապարփակ դասընթաց, ստանալու են պրակտիկ գիտելիքներ բիզնես ոլորտի առաջատար փորձագետների կողմից, աջակցություն և խորհուրդներ հիմնադրամի աշխատակազմի կողմից և վերջում ներկայացնելու են իրենց կազմած գործարար ծրագիրը հատուկ ձևավորված հանձնաժողովին: Լավագույն իրատեսական գործարար ծրագրերը կստանան դրամաշնորհներ նախապես կազմակերպած բարեգործական ընթրիքից գոյացած հասույթից, որին հիմնադրամը կավելացնի նաև իր ֆինանսական միջոցները:
Ծրագրի միջոցով Հիմնադրամը կամուրջ է հանդիսանում տարբեր ոլորտներում հաջողության հասած մարդկանց և առաջին քայլերը կատարողների միջև՝ ապահովելով, որ բարեգործությունն ուղղված լինի թիրախային և նպատակային կարիքներին և արդյունքում ստեղծի հանրային բարիք։
Թեպետ ծրագիրը մեկնարկել է անցյալ տարվա գարնանը, մեկ տարվա ընթացքում այն արդեն հասցրել է փոխել բազմաթիվ շահառուների կյանքեր՝ աջակցելով նրանց ոտքի կանգնել և իրենց բիզնեսը զարգացնել ավելի խելացի և հեռանկարային ձևով։ Այս ամենի արդյունքում նրանք ոչ միայն ամրապնդել են իրենց անձնական կայունությունը, այլև նպաստել են իրենց ընտանիքների տնտեսական բարելավմանը։
Բազմաթիվ դիմումներով և սկսնակ կին ձեռներեցների շրջանում մեծ հետաքրքրությամբ պայմանավորված` այս փուլում ևս որոշվեց, որ ծրագրի շահառուներ կլինեն սկսնակ կին գործարարները։
Առաջին փուլի հաջողության պատմությունները
Մեր առաջին փուլի շահառուներից Սրբուհի Հովհաննիսյանը՝ Վայոց ձորի Խնձորուտ գյուղից, զբաղվում է չրագործությամբ։ Ստանալով դրամաշնորհ՝ նա ձեռք է բերել սառնարան, սառցարան, պահարաններ, տարաներ, տեսախցիկ, հակահրդեհային համակարգ և արտադրամասը դարձրել է լիարժեք։ ««Իմ Քայլը» հիմնադրամի շնորհիվ ես կարողացա ավելի մեծ նպատակներ իրականություն դարձնել․ այն, ինչ պիտի անեի մի քանի տարվա ընթացքում, արեցի ընդամենը մի քանի ամսում։ Այս դրամաշնորհը սկսնակ գործարարի համար մեծ աջակցություն է»,- նշում է Սրբուհին։
Մեկ այլ շահառու՝ Իրինա Մարտիրոսյանը, երկար տարիներ տարբեր ռեստորաններում աշխատելուց հետո որոշել է հիմնել սեփական փոքրիկ արտադրամասը։ «Հիմնադրամի տրամադրած գումարով մենք ամբողջությամբ վերազինեցինք արտադրամասը և ավելացրինք արտադրանքի ծավալները։ Ձեռք ենք բերել սառցարաններ, սառնարան, գազօջախ, օդորակիչ, մսաղաց և կահավորել արտադրամասը՝ ըստ ներկայացրած բիզնես պլանի։ Առաջիկայում նախատեսում եմ ընդլայնել վաճառքները, համագործակցել նոր խանութների հետ և աշխատանքի ընդունել մեր գյուղի կանանց, ովքեր բարդ կենսական իրավիճակներում են»,- պատմում է Իրինան։
Ծրագրի կրթական բաղադրիչը
Ինչպես հայտնի է, Հիմնադրամը բոլոր ծրագրերում մեծ կարևորություն է տալիս կրթական բաղադրիչին։ Շահառուները շաբաթներ շարունակ անցնում են բիզնես պլանավորման և կառավարման դասընթացներ՝ իրենց ծրագրերը գրագետ կազմելու և հանձնաժողովին ներկայացնելու համար։ Սակայն Հիմնադրամը չի սահմանափակվում միայն այդքանով․ ծրագրի ավարտից հետո ևս մշտապես պահպանվում է հետադարձ կապ շահառուների հետ և, հնարավորության դեպքում, առաջարկվում նրանց մասնակցել տարբեր ուսուցողական և փորձի փոխանակման ծրագրերի։
Փորձի փոխանակման հնարավորություններ
Օրինակ՝ շահառուներ Լիանան և Էմիլյան ապրիլին հնարավորություն ունեցան մասնակցելու փորձի փոխանակման ծրագրի Չինաստանում։ Նրանք վերադարձան վառ տպավորություններով և նոր մոտիվացիայով․ «Երբ ծանոթանում ես այլ մշակույթի և գործելաոճի, սկսում ես նորովի ընկալել քո բիզնեսը և ուզում ես նոր գաղափարներ ներդնել համայնքում»,– պատմեց Էմիլյան։ Լիանան էլ հավելեց, որ չնայած այցերը ճանաչողական և մշակութային բնույթ ունեին, ինքը արդեն ունի հստակ գաղափարներ իր թեյերի արտադրության բիզնեսի զարգացման համար։
Հետագայում ևս 13 կին ձեռներեց հնարավորություն ստացավ մեկնել Չինաստան՝ «Սիչուանի կանանց ֆեդերացիայի» հյուրընկալությամբ։ Այս ամենը իրականություն է դառնում «Իմ քայլը» հիմնադրամի և Հայաստանում Չինաստանի դեսպանության, ինչպես նաև Չինաստանի խոշորագույն հիմնադրամների հետ համագործակցության արդյունքում, որից, իհարկե, անմասն չեն մնում մեր շահառուները։
Դուք ևս կարող եք դառնալ շահառու
Այս հաջողության պատմությունները մեր կողքին ապրող սովորական կանանց իրական օրինակներ են, ովքեր պարզապես հավատացել են իրենց ուժերին, ոգեշնչվել միմյանցից և համարձակվել սկսել կամ զարգացնել իրենց բիզնեսը։
Եթե ՀՀ քաղաքացի եք, լրացել է Ձեր 22 տարեկանը և ցանկանում եք դառնալ հաջողակ կին ձեռներեց, ապա առաջին քայլերը անելու ճիշտ ժամանակը հենց այսօր է։ Դիմելու համար անցեք այս հղումով։
Դիմելու վերջնաժամկետ` դեկտեմբերի 1»,- ասված է հաղորդագրությունում:
