«Մարտի 1»-ի գործի հետ կապված՝ դուք գիտեք, թե ես անձամբ ինչքան շահագրգռված եմ, բայց իմ շահագրգռվածությունը կրկնակի, տասնապատիկ կաշկանդվածություն է նաև ինձ համար, որովհետև չլինի, թե ես վարչապետ եմ ու վարչապետի կարգավիճակի բերումով ինչ-որ ազդեցություններ են գործում, ինչը խնդրահարույց է: Ես շատ ուրախ եմ ՄԻԵԴ-ի կայացրած որոշման առիթով: Այդ մասին Ստրասբուրգում հայաստանյան լրատվամիջոցների հետ ճեպազրույցի ժամանակ ասաց վարչապետ Նիկոլ Փաշինյանը՝ անդրադառնալով մարտի 1-ի զոհերի ՄԻԵԴ-ի վճռին, համաձայն որի՝ ՀՀ-ի կողմից մի շարք խախտումներ են արձանագրվել:
«Մենք ունենք դիլեմաներ: Առաջինը՝ մենք ինչպե՞ս ենք պաշտպանում ժողովրդավարությունը և ինչպե՞ս ենք պաշտպանում ժողովրդավարությունը, որ չստացվի, որ ժողովրդավարությունը պաշտպանելու անվան ներքո բռնապետություն ենք հաստատում: Սրանք շատ լուրջ դիլեմաներ են: Եթե ժողովրդավարությունը քեզ համար ընդամենը պիտակ է, այդտեղ հեշտ է, բայց եթե ժողովրդավարությունը քեզ համար հավատամք է, շատ դժվար է գործել, որովհետև մի դեպքում տեսնում ես ժողովրդավարության խոցելիությունը, մյուս դեպքում ասում ես՝ մի րոպե, այս ժողովրդավարության խոցելիությունն իբրև պաշտպանելու համար կարող ես անել քայլեր, որ ինքդ շեղվես ժողովրդավարական ուղուց: Եթե դա քեզ համար արժեք է, այդքան էլ հեշտ չէ անել: Մենք պետք է մեր պրոբլեմների հետ առերեսվենք, և պետք է այդ պրոբլեմները հասկանանք՝ ինչպես են լուծվում:
Ես որ ասում եմ՝ «Մարտի 1»-ի գործը բացահայտված է, «Մարտի 1»-ի գործը իհարկե բացահայտված է: Հիմա էլ քրեական գործերը ամբողջությամբ հրապարակային են: Ամեն ինչ նկարագրված է, բացարձակապես ամեն ինչ նկարագրված է՝ ապօրինի խմբերի ձևավորումը, նրանց վճարումը, ով փողը տվեց, ով ում տվեց և այլն: Այլ բան, որ դատական հարթության մեջ այս ամեն ինչը պետք է արձանագրվի օրինական ձևով:
Բայց հասկանում եք՝ իմ ամեն նախադասություն՝ այս թեմայով ասված, հետո կարող է օգտագործվել և՛ այս կողմից, և՛ այն կողմից, և՛ այն կողմից»,- ասաց նա՝ հավելելով, որ ժողովրդավարությունը դեռ չի հասել այն աստիճանի, ինչ աստիճանի կարող է հասնել:
«Միջազգային հանրությունը մեր ժողովրդավարությունն ավելի շատ է տեսնում և գնահատում, քան մենք ինքներս»,- ասաց նա:
Անդրադառնալով ՄԻԵԴ-ի վճռին՝ Փաշինյանն ասաց. «ՄԻԵԴ-ի որոշումները շատ լուրջ ազդակ պետք է դառնան, որ մեր ամբողջ դատաիրավական համակարգը պրոբլեմներ ունի»:
Ավելի վաղ տեղեկացրել էինք, որ Մարդու իրավունքների եվրոպական դատարանը սեպտեմբերի 18-ին հրապարակել է «Ֆարմանյանն ընդդեմ Հայաստանի»՝ մարտի 1-ի զոհերի գործով վճիռը՝ արձանագրելով ՀՀ-ի կողմից մի շարք խախտումներ։
Ըստ դատարանի միաձայն որոշման՝ բացի Սամվել Հարությունյանից և Զաքար Հովհաննիսյանից, մյուս բոլոր զոհերի դեպքում հաստատվել է, որ պետության գործողությունները հանգեցրել են կյանքի իրավունքի խախտման։
