Երևանի քաղաքապետարանի գործակարգավարական խորհրդակցության ժամանակ՝ Նուբարաշենի աղբավայրում բռնկված հրդեհի մարման աշխատանքների զեկուցման շրջանակում, Երևանի քաղաքապետ Տիգրան Ավինյանը հիշեցրեց, որ հայտարարվել էր աղբի վերամշակման նոր գործարանի երկփուլ մրցույթ, ապա մտահոգություն հայտնեց, քանի որ որոշակի պարբերականությամբ չի զեկուցվում, թե մրցույթի հետ կապված ինչ աշխատանքներ են իրականացվում:
Ըստ Ավինյանի՝ մրցույթի անցկացման աշխատանքները հանձնարարված էին Երևանի քաղաքապետարանի բնապահպանության վարչությանը և համապատասխան ԾԻԳ-ին:
«Այսպես կդնեմ հարցը. ժողովո՛ւրդ ջան, կա՛մ մինչև տարվա վերջ այդ մրցույթը կկայանա, կա՛մ ես արդեն կադրային համապատասխան որոշումներ կկայացնեմ, որովհետև սա Երևան քաղաքի ամենակարևոր, ամենադժվարին հարցերից մեկն է, և այստեղ այլևս հապաղել մենք չենք կարող:
Հետևապես խնդրում եմ ձեզ մինչև տարվա վերջ բերել հստակ, վերջնական լուծումով, հաղթող կազմակերպությամբ կայացած մրցույթ, որը պետք է տեղի ունենա մինչև այս տարվա վերջ, և այլևս ոչ մի րոպե ավելի մենք չենք կարող դրան սպասել»,- ասաց Ավինյանը:
Հիշեցնենք, որ օգոստոսի 8-ին Նուբարաշենի աղբավայրում բռնկվել էր «Բիս-1» աստիճանի հրդեհ, որի մարման աշխատանքներին ներգրավված է եղել 430 փրկարար, օջախներին մղվել է 22.035 տոննա ջուր, աշխատել է 20-22 միավոր տեխնիկա, աղբավայր է տեղափոխվել 2450 մեքենա հող, և արդյունքում աղբավայրի տարածքն ամբողջությամբ ծածկվել է հողով: Այս պահին ՆԳՆ ՓԾ-ն աղբավայրում հերթապահություն է իրականացնում:
