Խաղաղության պայմանագրի մեջ Սահմանադրության վերաբերյալ կետ չկա, և նման քննարկում գոյություն չունի: Մնացած երկու կետերի վերաբերյալ, որը Բայրամովն ասել է, քննարկումները կշարունակվեն: Այս մասին այսօր՝ հունվարի 21-ին, ԱԺ-ում լրագրողների հետ ճեպազրույցում ասաց ԱԺ նախագահ Ալեն Սիմոնյանը՝ անդրադառնալով խաղաղության պայմանագրի շուրջ առաջընթացի վերաբերյալ հարցին:
Լրագրողները նրան հարց ուղղեցին Ադրբեջանի արտգործնախարար Ջեյհուն Բայրամովի հայտարարության վերաբերյալ, որը դարձյալ խոսել էր ՀՀ Սահմանադրության փոփոխության և միջազգային դատարաններում Ադրբեջանի դեմ հայցերից հրաժարման մասին:
«Կարծում եմ՝ պետք է արձանագրենք, որ շատ դրական է այն փաստը, որ հակառակ կողմը նույնպես նշում է, որ մնացել է երկու կետ, որը պետք է քննարկվի: Դուք հիշում եք՝ մենք ինչից էինք սկսում՝ նոյեմբերի 9-ից հետո ակնկալվում էր նոր պատերազմ, նոր իրադարձություններ, և մենք կարողացանք ինչ-որ ձևով կառավարել, գալ-հասնել այն բանին, որ ունենք համաձայնեցված մեկ տասնյակից ավելի կետեր»,- հայտարարեց ԱԺ նախագահը՝ դա «շատ մեծ հաղթանակ» որակելով երկու կողմերի համար:
Նրա խոսքով՝ ունենք երկու պետությունների միջև կնքված առաջին իրավական փաստաթուղթը, որը պատմության մեջ աննախադեպ բան է, ունենք դելիմիտացված ու դեմարկացված սահման, ունենք համաձայնեցում, տրամաբանություն այդ սահմանի գործընթացը շարունակելու:
«Սրանք բաներ ենք, որոնց հետ հաշվի չնստել ուղղակի անհնար է: Այո՛, ես համարում եմ, որ պրոցեսը դրական է, ողջունում եմ այն հայտարարությունը, որ ունենք ևս երկու կետ, որոնց վերաբերյալ պետք է քննարկումներ ունենանք»,- նշեց նա:
