ԿԳՄՍ նախարարի տեղակալ Արաքսիա Սվաջյանը մասնակցել է ՀՀ ոչ պետական դպրոցների համաժողովին, որը նախաձեռնել էր «Մեկ ձայն» անկախ դպրոցների հայկական ասոցիացիան:
Համաժողովին ներկա են եղել նաև ԱԺ փոխնախագահ Հակոբ Արշակյանը, Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Սիսակ Գաբրիելյանը, կրթության ոլորտային կառույցների ղեկավարներ, ոչ պետական դպրոցների ներկայացուցիչներ:
Համաժողովի նպատակը ոչ պետական կրթական հաստատությունների և պետական քաղաքականություն իրականացնող մարմինների միջև արդյունավետ երկխոսության հաստատումն է:
Համաժողովն անցել է պանելային քննարկումների ձևաչափով: ԿԳՄՍ նախարարի տեղակալ Արաքսիա Սվաջյանը մասնակցել է «Ոչ պետական հանրակրթական հաստատությունների դերն ու առանձնահատկությունները՝ պետական կրթական քաղաքականության համատեքստում» խորագրով քննարկմանը, պատասխանել ներկաների հարցերին:
«Ոչ պետական դպրոցները, ունենալով ստեղծագործական ազատություն, կարողացել են ստեղծել այնպիսի միջավայր, ծրագրեր ու մեթոդաբանություն, որոնք ապահովել են ակնհայտ դրական արդյունք: Մասնավոր դպրոցներում առկա մեխանիզմները մեզ համար ուսանելի են, և դրանց փորձի ուսումնասիրումն առաջնահերթություն է՝ հասկանալու, թե ինչպես դրանք կարող են դառնալ ուղենշային՝ պետական դպրոցներում ներդնելու տեսանկյունից: Այդ ուղղությամբ պետության և մասնավոր դպրոցների միջև համագործակցության, փորձի յուրացման և տեղայնացման ջանքեր են գործադրվում՝ հօգուտ թե՛ ոչ պետական դպրոցների, թե՛ ոլորտում պետական քաղաքականության»,- ասել է Արաքսիա Սվաջյանը:
Նա կարևորել է համագործակցությունը նաև ոչ պետական դպրոցների ձայնը լսելի դարձնելու, խնդիրներին միասնաբար լուծում տալու, ինչպես նաև գործունեության թափանցիկությունը գործընթացների թվայնացմամբ ապահովելու տեսանկյունից:
Արաքսիա Սվաջյանը նաև ընդգծել է, որ լայնածավալ բարեփոխումների փուլում շատ կարևոր են գործընկերների, ոլորտի շահագրգիռ կառույցների դիտարկումներն ու առաջարկները. «Իրավական ակտեր մշակելիս ակնկալում ենք նաև ձեր ակտիվ մասնակցությունն ու ներգրավվածությունը հենց շրջանառության փուլում՝ լսելու տարբեր առաջարկներ և դիտարկումներ, որպեսզի ավելի կատարյալ իրավական ակտեր հաստատենք»:
ԿԳՄՍ նախարարի տեղակալը խոսել է նաև մասնավոր դպրոցների ուսուցիչների պարտադիր վերապատրաստման և ատեստավորման մասին՝ ընդգծելով, որ «Հանրակրթության մասին» օրենքի փոփոխությամբ՝ գործընթացն իրականացնելու համար մասնավոր դպրոցները պետք է ներկայացնեն վերապատրաստման և ատեստավորման ծրագրեր, որոնք փորձաքննվելուց հետո կարող են երաշխավորվել:
Եզրափակելով խոսքը՝ Արաքսիա Սվաջյանն ընդգծել է՝ բոլորիս նպատակը մեկն է՝ ունենալ որակյալ կրթություն՝ անկախ կազմակերպաիրավական ձևից:
Համաժողովի երկրորդ հատվածում տեղի է ունեցել պանելային քննարկում «Կրթության նպատակները արդի մարտահրավերների համատեքստում» խորագրով:
