ՀՀ քննչական կոմիտեի հատկապես կարևոր գործերի քննության գլխավոր վարչության մարդու դեմ ուղղված հանցագործությունների քննության վարչությունում քննվող քրեական վարույթի շրջանակներում պարզվել են Երևանի Բաղրամյան պողոտայում կատարված՝ 35-ամյա Վարազդատ Գասպարյանի սպանության դեպքի առանցքային մի շարք հանգամանքներ:
«2023 թ. հունիսի 6-ին՝ ժամը 22:07-ին, ահազանգ է ստացվել այն մասին, որ Բաղրամյան պողոտայի շենքերից մեկի մոտ հրազենային վնասվածքով մահացած տղամարդու դի է հայտնաբերվել:
Դեպքի առթիվ ՀՀ քրեական օրենսգրքի 155-րդ հոդվածի 1-ին մասով և 335-րդ հոդվածի 1-ին մասով նախաձեռնվել է քրեական վարույթ, որի նախաքննության կատարումը հանձնարարվել է քննչական խմբին:
Նախաքննության ընթացքում կատարվել է դեպքի վայրի զննություն, որտեղ հայտնաբերվել էր տղամարդու դին՝ դեմքի շրջանում հրազենային վնասվածքով: Հայտնաբերվել և առգրավվել էր հրազենի պարկուճ: Հարցաքննվել են մի շարք անձինք, նշանակվել են դատաձգաբանական և դիակի դատաբժշկական փորձաքննություններ:
Քննությամբ պարզվել է, որ 2023 թ. հունիսի 6-ին՝ ժամը 20:00-ի սահմաններում, 25-ամյա երիտասարդը «Օպել Աստրա» մակնիշի տաքսի ավտոմեքենայով Երևան քաղաքի Սայաթ-Նովայի և Ալեք Մանուկյան փողոցների խաչմերուկից ուղևորվել է դեպի Վ. Գասպարյանի գտնվելու վայր՝ Երևան քաղաքի Բաղրամյան պողոտային հատվող Ջեյմ Բրայսի փողոցում տեղակայված գեղեցկության սրահի մոտ և սպասել: Ժամը 22:00-ի սահմաններում, երբ հիշյալ տղամարդը դուրս է եկել նշված գեղեցկության սրահից, 25-ամյա երիտասարդն անսպասելի մոտեցել է նրան և ապօրինի կերպով ձեռք բերված 7,62 մմ (7,62 x 25) տրամաչափի ակոսափող ատրճանակից, 35-ամյա տղամարդուն սպանելու դիտավորությամբ, մեկ կրակոց է արձակել նրա դեմքի ուղղությամբ՝ պատճառելով կյանքի հետ անհամատեղելի մարմնական վնասվածք: Սպանությունն իրականացնելուց անմիջապես հետո երիտասարդը դիմել է փախուստի:
Ըստ քննության ներկա փուլում ձեռք բերված տվյալների՝ 25-ամյա երիտասարդը սպանությունը կատարել է մի քանի տարի առաջ տեղի ուենցած ընկերոջ սպանության վրեժը լուծելու նպատակով։
Բավարար փաստերի հիման վրա 25-ամյա երիտասարդի նկատմամբ հարուցվել է հանրային քրեական հետապնդում, և նրան մեղադրանք է ներկայացվել՝ ՀՀ քրեական օրենսգրքի 155-րդ հոդվածի 1-ին մասով և 335-րդ հոդվածի 1-ին մասով: Միջնորդություն է ներկայացվել դատարան նրա նկատմամբ կալանքը որպես խափանման միջոց կիրառելու վերաբերյալ, որը բավարարվել է»,- ասված է հաղորդագրության մեջ:
Նախաքննությունը շարունակվում է:
Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի՝ օրինական ուժի մեջ մտած դատավճռով:
