Հայաստանի նախկին ոստիկանապետ Վլադիմիր Գասպարյանն այս անգամ խոսեց լրագրողների հետ՝ իր վերաբերյալ քննվող դատական նիստից հետո: Նախկին բարձրաստիճան պաշտոնյան անդրադարձավ Հաղթանակի զբոսայգու մոտ գտնվող շքեղ առանձնատանը, և իրեն վերագրվող մեղադրանքներին: Նշեց՝ տունը գնել է իր հարազատներից մեկը:
Վլադիմիր Գասպարյան (Հայաստանի նախկին ոստիկանապետ) - Իր տղաների համար, իր ընտանիքի համար, ոչ թե ինձ համար, բայց երբ որ տղաներն ասացին՝ մենք մնալու ենք արտասահմանում, չենք վերադառնալու Հայաստան, լավ կլինի քավորով զբաղվեք։ Ես եմ իրենց ընտանիքի քավորը։ Իմ ծրագրերում երբեք չի եղել այդ տունը, հետո այդպես փոխանցվել է ինձ:
Հարցին՝ նվիրատվությո՞ւն է եղել, Գասպարյանը դրական պատասխան տվեց, իսկ թե ինչի դիմաց, ասաց.
«Էդ ընտանիքի քավորն եմ, և անկեղծ ասած` ժամանակին էդ մարդը Ռուսաստանում իր բիզնեսն էր դնում, ես չեմ թողել, որ Ռուսաստանում, իմ կապերի շնորհիվ չեմ թողել, որ ամեն տեսակ կրիմինալ նեղություն տա էդ մարդուն»։
Հակակոռուպցիոն դատարանում իր, իր տեղակալ Լևոն Երանոսյանի և մյուս նախկին բարձրաստիճան պաշտոնյաների գործով հետազոտվեցին ապացույցները: Մեղադրող դատախազ Տիգրան Ենոքյանը հրապարակեց 2015 թ. Գասպարյանի գրությունն` ուղղված պաշտպանության նախարարին, որով խնդրել էր դստերը՝ Յուլյա Գասպարյանին, ազատել պաշտպանության նախարարությունում զբաղեցրած պաշտոնից և փոխադրել Ոստիկանություն՝ հետագա ծառայությունն այնտեղ շարունակելու համար։ Ըստ մեղադրանքի` Յուլյա Գասպարյանն աշխատանքի չի հաճախել, բայց վճարվել է։ Հրապարակվեց նաև Գասպարյանի դստերը 3-րդ աստիճանի մեդալով պարգևատրելու, փոխգնդապետի կոչում շնորհելու վերաբերյալ փաստաթուղթը, որը ստորագրել է ոստիկանության զորքերի նախկին հրամանատար Լևոն Երանոսյանը: Նախկին ոստիկանապետն անդրադարձավ այս դրվագին եւս:
Վլադիմիր Գասպարյան - Իմ աղջիկը բարձրագույն կրթություն ուներ, իրավաբանականն ավարտել է գերազանցությամբ։ Ժամանակին, դա իմ սխալն է եղել, դատավոր դառնալու համար ստաժ էր պետք, փեսաս ինձ ասաց՝ որ վաղը դատավոր դառնա, ավարտել է, դիպլոմ ունի, դնենք, մի տեղ աշխատի, կգնա, կգա։ 4 երեխա է ունեցել: Չեմ իմացել, ազատվելուց հետո ես իմացել եմ` էդպիսի բան է եղել:
Անդրադառնալով դստեր բարձր կոչմանը, Գասպարյանն ասաց՝ հրամանները մեխանիկորեն է ստորագրել:
Վլադիմիր Գասպարյան - Էդ ստորագրությունները էդպես չեն լինում, ես ամեն հինգշաբթի 200-ից ավել հրաման եմ ստորագրել մեխանիկորեն, շատ անգամ ինքս չեմ էլ ստորագրել, գործը տվել եմ, կադրավիկն է եկել, ասել եմ՝ էդ կնիքը վերցրու, նստի ընդունարանում, որովհետև ես դրա ժամանակը չեմ ունեցել ուղղակի:
Գասպարյանն ասաց՝ իմացել է, որ դուստրը փոխգնդապետ է, բայց չի իմացել որ նա ռեժիմով բացակայել է աշխատանքից: Մեղադրանքի մեկ այլ դրվագով էլ Գասպարյանը 1997-2011 թվականներին, երբ զբաղեցրել է ռազմական ոստիկանության պետի, այնուհետև՝ պաշտպանության փոխնախարարի պաշտոնը, տեղյակ է եղել, որ Նելսոն Սարոյանը, Արմեն Մովսեսյանը և Խաչիկ Բադեյանը հրամանագրված են եղել որպես ռազմական ոստիկան, բայց փաստացի աշխատել են Սերժ Սարգսյանի եղբայրների համար թիկնապահ ու վարորդ:
Գասպարյանն ասաց՝ այդ մասին տեղեկացել է 2018 թվականին, երբ ազատվել է պաշտոնից:
Վլադիմիր Գասպարյան - Ոչ մի բան թաքուն չի մնում: Ես չեմ կարող վերահսկել, թե ով որտեղ ինչ վարորդ է աշխատում: Լավ, ես ընդունեցի, պահեցի, լավ, ինձնից հետո 5-6 ռազմականի պետ է փոխվել, ամեն մեկն էլ գեներալ է ստացել, լավ, ես փնթի էի, չտիրապետեցի իրավիճակին, բա իրենք չէին ասում` բա խեր լինի սենց:
«Լուրերի» հարցին՝ արդյոք Ալեքսանդր և Լևոն Սարգսյաններն էին դիմել իրենց անվտանգությունն ապահովելու համար, Գասպարյանը պատասխանեց.
«Ոչ Ալեքսանդր Սարգսյանը, ոչ Լևոն Սարգսյանը չէին կարող իմ մոտ գալ ու գնալ հարցեր լուծել, իմ կաբինետ մտնել»:
«Լուրեր»-ը Գասպարյանին հիշեցրեց տարիներ առաջ իր հայտարարություններից մեկը՝ ծանոթ-բարեկամներով չեն սողոսկում համակարգ, ապա հետաքրքրվեց` ինչպես է ստացվել, որ դուստրն ու կինը համակարգում էին, Գասպարյանը, սակայն, չսպասեց հարցն ավարտելուն և արձագանքեց.
«Ստոպ, կնոջս համար հիմա ես կռիվ կտամ: Իմ կինը աշխատել է, գլուխները պատին են տվել այն մարդիկ, որոնք ասում են՝ իմ կինը չի աշխատել։ Սրիկա են էն մարդիկ, որ ասում են` չի աշխատել»։
Գեներալ-գնդապետն անդրադարձավ նաև իր առողջական վիճակին:
Վլադիմիր Գասպարյան - Տերը ինձ սիրում է, ես էլ տիրոջն եմ սիրում, բոլոր էն մարդիկ, ովքեր իմ հիվանդությունը ունենային, հիմա կամ բույս էին դարձել, կամ հուղարկավորված էին վաղուց, ես ոչ բույս եմ, ոչ էլ կհուղարկավորվեմ»:
Գասպարյանի և մյուսների գործով հաջորդ նիստին կհարցաքննվեն վկաները:
Հեղինակ` Տաթև Խաչատրյան
