Ավտոկայարաններն ու ավտոկայանները պետք է մատչելի լինեն հաշմադամություն ունեցող անձանց համար: Դեռ 2022-ին կառավարությունը ավտոմոբիլային տրանսպորտի մասին օրենքում փոփոխություններ կատարեց, որով էլ ամրագրվեց այս պահանջը: Հիմա ՏԿԵՆ-ը օրենքում լրացումներ կատարելու նախագիծ է ներկայացրել հանրային քննարկման: Հաստատման դեպքում ավտոկայարանները և ավտոկայանները պետք է ապահովեն իրենց կողմից մատուցվող բոլոր ծառայությունների՝ դրամարկղերի, սանհանգույցների, սպասասրահների, բուժկետերի, ուղևորային հարթակների հասանելիությունը հաշմանդամություն ունեցող անձանց համար:
Ռուզաննա Այվազյան (ՀՀ ՏԿԵՆ ավտոմոբիլային տրանսպորտի քաղաքականության բաժնի պետ) - Ավտոկայանները բավականին հին շինություններ են` կառուցված խորհրդային տարիներին, երբ հաշմանդամություն ունեցող անձանց համար հստակ պայմաններ սահմանված չէին, խիստ նորմեր սահմանված չէին, թեքահարթակների, շենքային պայմանների վերաբերյալ նորմերը չէին պահպանվում, երկար տարիներ վերանորոգման աշխատանքներ չեն իրականացվել, ուստի խոչընդոտներ կան ավտոկայաններում:
Այսօր Հանրապետության ամբողջ տարածքում 33 ավտոկայան ու ավտոկայարան կա: Համակարգը բավականին վատ վիճակում է, շատ քաղաքներում ավտոկայանները փաստացի բացակայում են և վերազինման կարիք կա: Ոլորտային գերատեսչությունում արդիականացման աշխատանքը որոշել են մասնավորի միջոցով իրականացնել:
Ռուզաննա Այվազյան - ՏԿԵՆ-ի կողմից աշխատանքներ են տարվում ավտոկայանային համակարգը արդիականացնելու, ամբողջովին վերանորոգելու, վերակառուցելու, կոնցեսիոն կառավարման հանձնելու ուղղությամբ, որի շրջանակներում ակնկալվում են մեծ ծավալի ներդրումներ ամբողջ համակարգի արդիականացման ուղղությամբ: Իրականացվող օրենսդրական փոփոխությունները լրացուցիչ պահանջներ կսահմանեն կոնցեսիոների համար, որը իր ներդրումների շրջանակում կապահովի նաև հաշմանդամություն ունեցող անձանց ավտոկայանային ծառայությունների հասանելիությունը, մատչելիությունը և համահավասար պայմաններ բնակության մյուս խմբերի հետ:
Ներհամայնքային կանոնավոր ուղևորափոխադրումներ իրականացնող բոլոր տրանսպորտային միջոցները ևս պետք է հարմարեցված լինեն հաշմանդամություն ունեցող մարդկանց համար:
Ռուզաննա Այվազյան - Իսկ միջմարզային և ներմարզային կանոնավոր երթուղիների դեպքում այդ չափը՝ հաշմանդամություն ունեցող անձանց հարմարեցված տրանսպորտային միջոցների քանակը, որոշում է կառավարությունը. 20 թվականի որոշմամբ դա կազմում է ընդհանուր թվի 10 տոկոսը:
Սա վերաբերում է նոր մրցույթներում հաղթած ուղևորափոխադրողներին: Օրինակ, այս պահին միակ միասնական օպերատորը, որը գործում է Կոտայքի մարզում, մրցույթին մասնակցել է նոր կարգավորմամբ և ներհամայնքային բոլոր, իսկ ներմարզային ու միջմարզային տրանսպորտի 10 տոկոսը հարմարեցված են հաշմանդամություն ունեցող անձանց համար, մանրամասնեց ավտոմոբիլային տրանսպորտի քաղաքականության բաժնի պետը: Երևանում նոր բերված բոլոր չափերի ավտոբուսները ևս ունեն բոլոր հարմարությունները:
Ռուզաննա Այվազյան - Գործընթացը, կարծում եմ, շարունակական բնույթի է, և այդ գործող 10 տոկոսն աստիճանաբար կփոխվի, և, ի վերջո, ՀՀ-ում մենք կունենանք բնակչության բոլոր խմբերի համար հարմարեցված, արդյունավետ և բարձր որակի տրանսպորտային համակարգ:
Հանրային քննարկումը կավարտվի, ՏԿԵՆ-ում կստանան նաև գործընկեր գերատեսչությունների կարծիքը և առաջիկա ամիսներին նախագծերը կներկայացվեն կառավարության հաստատմանը: