Արտգործնախարարներ Արարատ Միրզոյանի և Ջեյհուն Բայրամովի վաշինգտոնյան բանակցություններն Ազգային ժողովի ճեպազրույցների օրակարգում են: Ընդդիմադիր «Պատիվ ունեմ» խմբակցության պատգամավոր Թագուհի Թովմասյանը բանակցային մանրամասներին չի տիրատետում, բայց Հայաստանի իշխանություններին չի վստահում: Թեև երեկ խորհրդարանում վարչապետ Փաշինյանը կրկին հայտարարեց, որ ընդդիմադիրները կարող են ծանոթանալ բանակցվող փաստաթղթին, Թովմասյանն այսօրվա ճեպազրույցում կրկին նշեց՝ ինչ են բանակցում՝ իրեն հայտնի չէ:
Թագուհի Թովմասյան (ՀՀ ԱԺ «Պատիվ ունեմ» խմբակցության պատգամավոր) - Գուցե ինչ-որ ընդհանուր թեզերի մասին մենք հնարավորություն ունենանք պատկերացում կազմելու, բայց այլ բան է փաստաթղթի մասին խոսել՝ որպես գոյություն ունեցող փաստաթուղթ կամ նախագիծ, այլ բան է, երբ մենք խոսում ենք այդ փաստաթղթի հնարավոր ձևակերպումների մասին։ Կարծում եմ՝ ճիշտ չէ, որ մենք հնարավոր ձևակերպումների մասով խոսենք, բայց ես ունեմ իմ հաստատ դիրքորոշումը, որ որևէ դեպքում չպիտի ստորագրվի որևէ փաստաթուղթ, որը կարող է Արցախը հանկարծ որևէ կարգավիճակով թողնել Ադրբեջանի կազմում։
Եթե անգամ Բաքու-Ստեփանակերտ հարաբերություններում միջազգային մեխանիզմներ ներդրվեն, միևնույն է՝ խնդրահարույց են լինելու՝ նշեց Թովմասյանն ու հավելեց, որ Արցախին Ադրբեջանի հետ միայնակ թողնել չի կարելի:
Թագուհի Թովմասյան - Ադրբեջանը միայնակ չէ՝ իր թիկունքին ունի Թուրքիա, իսկ մենք իրավունք չունենք 120 հազար բնակիչ ունեցող Արցախին թողնել միայնակ Ադրբեջանի հետ:
Վաշինգտոնում մայիսի 1-ից մեկնարկած բանակցությունների հետ մեծ հույս չեն կապում ընդդիմադիր «Հայաստան» խմբակցության պատգամավորները: Սկզբունքային համարելով Արցախի ինքնորոշման իրավունքը՝ խմբակցության քարտուղար Արծվիկ Մինասյանը հայտարարեց՝ Ալիևը գիտի, որ Ադրբեջանի տարածքային ամբողջականությունը չի ներառում Արցախը:
Արծվիկ Մինասյան (ՀՀ ԱԺ «Հայաստան» խմբակցության պատգամավոր) - Միջազգային հանրությունն էլ է դա շատ լավ հասկանում։ Նույն ԵԱՀԿ Մինսկի խմբի համանախագահների բոլոր հայտարարություններում՝ մինչև այս իշխանությունների այս վարքագծի դրսևորումը, դա կար։ Բոլորը խոսել են Արցախի ինքնորոշման իրավունքի մասին։ Եվ նույնիսկ Ալմա Աթայի հռչակագիրը, որին հղում են կատարում Նիկոլ Փաշինյանն ու Իլհամ Ալիևը, որևէ ձեևով Լեռնային Ղարաբաղի Հանրապետությունը չի ներառում Ադրբեջանի մեջ։ Ալմա Աթայի հռչակագիրը, երբ եղել է, ԼՂՀ-ն արդեն անկախ է եղել, և բացարձակ կապ չունի անկախ Ադրբեջանի հետ։ Եթե այս շեշտադրումը լիներ, որևէ խնդիր չկար։
Մինասյանին շարունակեց Խաչատրյանը, նշեց՝ Ադրբեջանը բանակցությունների գնալուց առաջ հստակ իր դիրքորոշումը հայտնել է, մինչդեռ ըստ ընդդիմադիրի՝ հայկական կողմը՝ ոչ:
Արթուր Խաչատրյան (ՀՀ ԱԺ «Հայաստան» խմբակցության պատգամավոր) - ՄԱԿ-ում իրենց մշտական ներկայացուցիչը հստակ ասաց՝ Ղարաբաղը մոռացեք։ Ինչ-որ գյուղեր, ռեպարացիաներ, հրաժարում ամեն ինչից։ Դա իրենց դիրքորոշումն է։ Հայաստանն իր դիրքորոշումը հրապարակավ չի հայտնում։ Եվ հիմա այսօր խոսում են, որ կա ըմբռնում, առաջընթաց:
Կառավարող ուժից Վահագն Ալեքսանյանն ընդդիմադիրներն հորդորեց վերջնական իրենց համար հասկանալ՝ Արցախն անկա՞խ, թե՞ դեռևս ինքնորոշվող պետություն է:
Վահագն Ալեքսանյան (ՀՀ ԱԺ «Քաղաքացիական պայմանագիր» խմբակցության պատգամավոր) - Ընդդիմությունը մեկ ասում է, որ Ադրբեջանն ինքն էլ է ընդունում, որ Արցախն իր կազմում չէ, մեկ ասում է Արցախի Հանրապետություն, մեկ էլ ասում է՝ ինքնորոշման իրավունք; Եթե ընդունում ես, որ Արցախն անկախ պետություն է, ընդունում ես անկախության հանրաքվեի արդյունքները ու ասում ես, որ Ալիևն էլ դա գիտի ու ընդունում է, ապա էլ ի՞նչ ինքնորոշվես, եթե արդեն ինքնորոշվել ես. դիսոնանսը կա, չէ՞, երբեմն՝ աբսուրդի աստիճանի:
Բանակցային բոլոր հարթակներում Հայաստանի բանակցողները բարձրաձայնում և կարևորում են Լեռնային Ղարաբաղի հայության իրավունքների և անվտանգության ապահովման հարցը՝ հայտարարեց Արտաքին հարաբերությունների մշտական հանձնաժողովի նախագահ Սարգիս Խանդանյանը և ավելացրեց՝ վաշինգտոնյան բանակցությունները բացառություն չեն:
Սարգիս Խանդանյան (ՀՀ ԱԺ «Քաղաքացիական պայմանագիր» խմբակցության պատգամավոր) - Այս պահին մենք պետք է արձանագրենք այսօրվա խնդիրը, որը ԼՂ հայության անվտանգության ու իրավունքների խնդիրն է, առաջ շարժվենք այդ խնդիրները հասցեագրելու ուղղությամբ: Իսկ բանաձևը, թե դա ինչպես պետք է արվի, բավականին վաղուց Հայաստանի բանակցողները հայտնում են. խոսքը Բաքու-Ստեփանակերտ երկխոսության միջազգային տեսանելի մեխանիզմի մասին է:
Խանդանյանը շեշտեց՝ խաղաղության համաձայնագիրը վաղուց ստորագրված կլիներ, եթե Ադրբեջանը Հայաստանի համար սկզբունքային հարցերին մոտ դիրքորոշում ունենար:
Հեղինակ՝ Անի Օհանյան
