Դատախազությունը Հայաստանի նախկին ոստիկանապետ Վլադիմիր Գասպարյանի, նրա կնոջ, դստեր ու փոխկապակցված այլ անձանց ենթադրյալ ապօրինի ծագում ունեցող գույքի վերաբերյալ հայցում ցանկանում է փոխել պահանջները:
Համլետ Հարությունյան (ԳԴ ապօրինի ծագում ունեցող գույքի բռնագանձման գործերով վարչության դատախազ) - Առաջին փոփոխությունը, որը կատարվել է, վերաբերում է Սուսաննա Գասպարյանի ստացած աշխատավարձերին, որոնք չեն համարվել օրինական եկամուտ, ինչի արդյունքում նաև հաշվարկը էապես փոփոխվել է, քանի որ ի սկզբանե ներկայացված հայցադիմումով, երբ այսպիսի տվյալներ դեռևս առկա չէին, նրա կողմից ստացված աշխատավարձի չափով հավելյալ օրինական եկամուտ է դիտարկվել իրավասու մարմնի կողմից:
Փոփոխության հիմքում դրվել են Սուսաննա Գասպարյանի քրեական գործով ստացված տվյալները, ըստ մեղադրանքի՝ նա աշխատանքի չի գնացել, սակայն միլիոնների աշխատավարձ ու բարձր կոչումներ է ստացել:
Այս փոփոխությանը, սակայն, դեմ է Վլադիմիր Գասպարյանի ներկայացուցիչը:
Վարազդատ Ասատրյան (Վլադիմիր Գասպարյանի ներկայացուցիչ) - Անձի անմեղության կանխավարկածը ոտնահարելու պայմաններում ստացվող տեղեկություն է, և այդ հանգամանքը դրվում է սույն հայցի հիմքում, որը, մեծ հաշվով, զուրկ է փաստակազմից: Ընդամենը ենթադրություններ են, դրանց շրջանակներում չի կարող կառուցվել այդ հայցը, հետագայում խնդիր ենք ունենալու նշված քրեական գործի կասեցնելու հետ:
Դատախազն ասաց՝ ըստ տարիների հաշվել և ըստ այդմ` հայցում փոփոխություններ են մտցրել:
Համլետ Հարությունյան - 2008 թվականի հոկտեմբերի 1-ի դրությամբ` Վլադիմիր Գասպարյանը և նրա ընտանիքի անդամները կարող էին առավելագույնը ունենալ 14 մլն 529 հազար դրամի չափով օրինական դրամական միջոցներ, և չնայած այդ հանգամանքին` 2008 թվականի հոկտեմբերի 15-ին Սուսաննա Գասպարյանի անվամբ 48 մլն դրամով ձեռք է բերվել Երևան քաղաքի Թումանյան փողոցի բնակարանը:
Հայցվոր կողմի պնդմամբ՝ նշված բնակարանը Վլադիմիր Գասպարյանին է պատկանում, ըստ դատախազի` նրա կինը այդ գույքը ձեռք բերելու հնարավորություն չի ունեցել:
Դատախազը ներկայացրեց նաև, որ 2009-ին Գասպարյանը 3 միլիոն դրամով թանկարժեք մեքենա է օտարել, ապա հիշեցրեց, որ «Ապօրինի գույքի բռնագանձման մասին» օրենքի համաձայն՝ անձին պատկանող գույք է համարվում նաև այն գույքը, որը տվյալ անձը շուկայականից էականորեն ցածր գնով փոխանցել է այլ անձի:
Համլետ Հարությունյան - Հաշվի առնելով, որ Վլադիմիր Գասպարյանը նշված տրանսպորտային միջոցն օտարել է 3 միլիոն դրամով, իսկ համանման գույքի օտարման ժամանակահատվածում այդպիսի գույքի շուկայական արժեքը կազմել է 30 միլիոն 200 հազար դրամ, ստացվում է` Mercedes-Benz S 500 մակնիշի ավտոմեքենան օտարվել է իրական արժեքից 90.7 տոկոսով ցածր գնով, հետևաբար մեքենան օրենքի իմաստով համարվում է Գասպարյանին պատկանող:
Շարունակելով` Համլետ Հարությունյանն ասաց՝ 2009 թ. ապրիլին Վլադիմիր Գասպարյանն ունեցել է առավելագույնը 1 միլիոն դրամ, և չնայած այդ հանգամանքին` 41 միլիոն դրամով ձեռք է բերել Range Rover Sport մեքենա: Գասպարյանն, ըստ դատախազի, այն օտարել է 5 միլիոն դրամով:
Համլետ Հարությունյան - Դրանից հետո` 2012-ի հունվարին, Վլադիմիր Գասպարյանը 56 միլիոն 308 հազար դրամով ձեռք է բերել Mercedes-Benz G 500 մակնիշի տրանսպորտային միջոցը, նշված օրվա դրությամբ նրա ընտանիքը կարող էր ունենալ առավելագույնը 16 միլիոն 438 հազար դրամ օրինական միջոցներ:
Մեքենայի 71 տոկոսը, ըստ հայցվորի, ձեռք է բերվել ոչ օրինական դրամական միջոցների հաշվին:
Համլետ Հարությունյան - 2012 դեկտեմբերին Վլադիմիր Գասպարյանի կնոջ մայրը` Հեղուշ Գալստյանը, 19 միլիոն դրամով ձեռք է բերել Փափազյան փողոցի հողամաս, հաշվի առնելով, որ այն հետագայում անհատույց փոխանցվել է Վլադիմիր Գասպարյանին` որդուն, հիմք է տալիս պնդելու, որ այն ի սկզբանե ձեռք է բերել Գասպարյանը` առավելապես այն պայմաններում, որ Հեղուշ Գալստյանը օրինական միջոցներ չի ունեցել:
Արդեն 2014-ին, դատախազի խոսքով, Հեղուշ Գասլտյանի անվամբ 43 միլիոն դրամով ձեռք է բերվել Range Rover Sport մակնիշի մեքենա, կրկին Գալստյանը նշված տրանսպորտային միջոցը գնելու որևէ հնարավորւթյուն չի ունեցել:
Նույն թվականին Գասպարյանի զոքանչի անվամբ 12 միլիոնով ձեռք է բերվել 2 հողամաս Փափազյան փողոցում:
Համլետ Հարությունյան - Ընդ որում՝ Գալստյանը նվիրատվությամբ այն տրամադրել է Գասպարյանի անչափահաս որդուն, իրավասու մարմնի պնդմամբ` գույքերի իրական շահառուն ի սկզբանե հանդիսացել է Գասպարյանը, և դրանք ի սկզբանե ձեռք են բերվել նրա միջոցներով:
Հայցի փոփոխության միջնորդությանը դեմ է Գասպարյանի ներկայացուցիչը, նշում է` այն մի շարք խախտումներով է ներկայացվել, ըստ նրա` դատախազությունը չի կարող 100 տոկոս բռնագանձում պահանջել, քանի որ դրանց միայն մի հատվածն է դիտարկվել ապօրինի: Ըստ ներկայացուցչի՝ հայցի հիմքի առարկայի փոփոխություն կարող էր ներկայացվել միայն եզրակացության հիման վրա, մինչդեռ դա առկա չէ:
Վարազդատ Ասատրյան - Մեր պնդմամբ՝ դատախազությունը չէ այն մարմինը, որը որոշելու է` այդ գույքի բռնագանձումը հնարավոր է, թե անհնար, միջին շուկայական արժեքն էլ որոշել և արձանագրելը եւս, թվային արտահայտմամբ, պարտադիր կատարման փուլում առաջացնելու է որոշակի խնդիրներ:
Դատարանը հայցի առարկայի փոփոխության միջնորդության վերաբերյալ որոշումը կհրապարակի առանձին դատական ակտով: Ընդհանուր առմամբ, դատախազությունը պահանջում է Գասպարյանից ու նրա հետ փոխկապակցված անձանցից հօգուտ պետության բռնագանձել շուրջ 2,1 միլիարդ դրամի գույք ու մոտ 170 միլիոն դրամ:
Հեղինակ` Տաթև Խաչատրյան
