ՖԻՆԼԱՆԴԻԱՆ ՊԱՇՏՈՆԱՊԵՍ ՄԻԱՑԱՎ ՆԱՏՕ-ԻՆ
Ֆինլանդիան պաշտոնապես միացավ ՆԱՏՕ-ին: Բրյուսելի կենտրոնակայանում Ֆինլանդիայի դրոշն ավելացվեց դաշինքի 30 անդամ երկրների դրոշներին: Կենտրոնակայանում պաշտոնական արարողությամբ ազդարարվեց դաշինքի համալրման մասին: Ֆինլանդիայի արտաքին գործերի նախարար Պեկա Հաավիստոն ՆԱՏՕ-ի կենտրոնակայանում ստորագրել է Հյուսիսատլանտյան դաշինքին երկրի անդամակցության փաստաթուղթը: Այնուհետև այն հանձնել է ԱՄՆ պետքարտուղար էնթոնի Բլինքենին:
Ֆինլանդիան Շվեդիայի հետ միասին ՆԱՏՕ-ին անդամակցելու հայտ Էր ներկայացրել 2022 թվականի մայիսին: Սակայն Թուրքիայի և Շվեդիայի միջև լարվածության պատճառով Անկարան շարունակում է արգելափակել Ստոկհոլմի անդամակցությունը՝ նշելով, որ ահաբեկչության մեջ մեղադրվող քուրդ փախստականներին արտահանձնելու վերաբերյալ իր պահանջները չեն բավարարվել: Կողմերի միջև հարաբերությունները լարվել են նաև Ստոկհոլմում Ղուրանի այրման միջադեպի պատճառով:
ՆԱՏՕ-ին Ֆինլանդիայի անդամակցության հանդիպումների և պաշտոնական արարողության ժամանակ ամենաբարձր մակարդակով վստահություն է հնչել, որ հեռու չէ նաև հյուսիսատլանտյան դաշինքին Շվեդիայի անդամակցության պահը:
Սաուլի Նիինիստյո Ֆինլանդիայի նախագահ - Ֆինլանդիայի անդամակցությունը ՆԱՏՕ-ին ուղղված չէ որևէ երկրի դեմ: Այն նաև չի փոխում պետության արտաքին և անվտանգության քաղաքականության հիմքերը կամ նպատակները: Ֆինլանդիան կայուն և կանխատեսելի երկիր է, որը ձգտում է վեճերի խաղաղ կարգավորմանը: Ֆինլանդիայի անդամակցությունը Հյուսիսատլանտյան դաշինքին «լիարժեք չէ» առանց Շվեդիայի անդամակցության:
Յենս Ստոլտենբերգ ՆԱՏՕ-ի գլխավոր քարտուղար - Հենց Ռուսաստանի ներխուժումը Ուկրաինա դրդեց Շվեդիային ու Ֆինլանդիային ՆԱՏՕ-ին անդամակցելու հայտ ներկայացնել։ Նախագահ Պուտինը ցանկանում էր սահմանափակել ՆԱՏՕ-ի ներկայությունը իր սահմաններին, ներխուժելով Ուկրաինա` փակել ՆԱՏՕ-ի դռները նոր անդամների դիմաց, բայց ստացավ հակառակը։ ՆԱՏՕ-ի արևելյան թևում ավելի շատ զորքեր կան օդում և ցամաքում, դաշինքի անդամներն ավելանում են, այսօր` Ֆինլանդիան, շուտով նաև Շվեդիան:
ԱՄՆ նախագահ Ջո Բայդենը ողջունել է Ֆինլանդիայի անդամակցությունը ՆԱՏՕ-ին և նշել, որ ակնկալում է նաև Շվեդիայի շուտափույթ անդամակցումը դաշինքին:
«Շուրջ մեկ տարի անց մենք Ֆինլանդիային ընդունում ենք ՆԱՏՕ: Սա պատմության մեջ ամենաարագ վավերացման գործընթացն է»,- ընդգծել է նա:
«Կոչ եմ անում Թուրքիային և Հունգարիային առանց հապաղելու ավարտել վավերացման գործընթացը»,- ասել Է Բայդենը:
ՖԻՆԼԱՆԴԻԱՅԻ ՄՈՒՏՔԸ ՆԱՏՕ ԻՐԱՎԻՃԱԿԻ ՀԵՐԹԱԿԱՆ ՍՐՈՒՄՆ Է. ՊԵՍԿՈՎ
ՆԱՏՕ-ին Ֆինլանդիայի անդամակցության փաստին անդրադարձել են Մոսկվայից: Ֆինլանդիայի մուտքը ՆԱՏՕ՝ իրավիճակի հերթական սրումն է։ Դաշինքի ընդլայնումը ոտնձգություն է Ռուսաստանի անվտանգության դեմ, հայտարարել է Ռուսաստանի նախագահի մամուլի խոսնակ Դմիտրի Պեսկովը՝ ընդգծելով, որ ռուսական կողմին ստիպում են հակաքայլեր ձեռնարկել։ Պեսկովը նշել է, սակայն, որ Ֆինլանդիայի իրավիճակը արմատապես տարբերվում է Ուկրաինայի իրավիճակից։
Ռուսաստանի արտգործնախարարությոնը նույնպես հայտարարություն է տարածել, որում ասվում է, թե Մոսկվան հարկադրված է լինելու պատասխան միջոցներ ձեռնարկել՝ ինչպես ռազմատեխնիկական, այնպես էլ այլ բնույթի, որպեսզի կասեցվեն երկրի ազգային անվտանգության սպառնալիքները։ Ռուսաստանի հյուսիս-արևմտյան սահմաններին պաշտպանական ենթակառուցվածքների շինարարության կոնկրետ քայլերը կախված կլինեն Հյուսիսատլանտյան դաշինքին Ֆինլանդիայի ինտեգրման պայմաններից, ներառյալ` ՆԱՏՕ-ի ռազմական ենթակառուցվածքների Ֆինլանդիայի տարածքում տեղակայումից:
Ռուսաստանի պաշտպանության նախարար Սերգեյ Շոյգուն էլ նշել է, որ Ֆինլանդիայի անդամակցությունը ՆԱՏՕ-ի ռազմական դաշինքին և ՆԱՏՕ-ի՝ սեփական մարտունակությունը բարձրացնելու ձգտումը, մեծացրել են հակամարտությունների վտանգը։ Շոյգուն նաև հայտնել է, որ բելառուսական գրոհային ինքնաթիռներից որոշները ստացել են հնարավորություն թշնամական թիրախներին հարվածել միջուկային զենքով, բացի այդ, բելառուսական զորքերին տրվել է «Իսկանդեր Մ» համակարգը, որը հնարավորություն է տալիս օգտագործել միջուկային հրթիռներ։
ՀԱՆԴԻՊԵԼ ԵՆ ՌԴ, ԻԻՀ, ՍԻՐԻԱՅԻ, ԹՈՒՐՔԻԱՅԻ ՓՈԽԱՐՏԳՈՐԾՆԱԽԱՐԱՐՆԵՐԸ
Մոսկվայում հանդիպել են Ռուսաստանի, Իրանի, Սիրիայի և Թուրքիայի փոխարտգործնախարարները: Ռուսաստանի արտգործնախարարությունից հայտնել են, որ դիվանագետները հանդիպման ընթացքում պայմանավորվել են շարունակել շփումները: Խորհրդակցությունների ընթացքում կողմերը քննարկել են Ռուսաստանի, Իրանի, Սիրիայի և Թուրքիայի արտաքին գործերի նախարարների առաջիկա հանդիպման նախապատրաստման հարցերը։
Արտգործնախարարության տարածած հայտարարության մեջ նշվում է, որ երկրների փոխարտգործնախարարները անմիջականորեն և անկեղծորեն ուրվագծել են իրենց մոտեցումները և պայմանավորվել շարունակել շփումները:
ԱՔԱՐՆ ԸՆԴՈՒՆԵԼ Է ՀՈՒՆԱՍՏԱՆԻ ՊԱՇՏՊԱՆՈՒԹՅԱՆ ՆԱԽԱՐԱՐԻՆ
Թուրքիայի պաշտպանության նախարար Հուլուսի Աքարը հյուրընկալել է իր հույն պաշտոնակցին փետրվարի 6-ի ուժեղ երկրաշարժից մեծապես տուժած Հաթայ քաղաքում։ Հունաստանի պաշտպանության նախարար Նիկոլաոս Պանայոտոպուլոսին օդանավակայանում դիմավորել է նախարար Հուլուսի Աքարը, նրանք միասին ուղղաթիռով շրջել են երկրաշարժից տուժած քաղաքներով, այնուհետև հայտարարություններով հանդես եկել: Թուրքիայի նախարարը հիշեցրել է, որ Հունաստանի կառավարությունն առաջիններից էր, որ օգնության համար խմբեր ուղարկեց Թուրքիա։ Անդրադառնալով Անկարայի և Աթենքի միջև երկարամյա վեճերին՝ Աքարն ասել է, որ երկու հարևանները պետք է լուծեն այդ խնդիրները միջազգային իրավունքի շրջանակներում և խաղաղ ճանապարհով։ Իր հերթին Հունաստանի պաշտպանության նախարարը նշել է, որ անհրաժեշտ է երկկողմ հարաբերություններում կայունություն հաստատել և ասել, որ ողբերգությունները, ինչպիսիք են երկրաշարժերը, ցույց են տալիս, թե որքան փոքր են Հունաստանի և Թուրքիայի միջև առկա խնդիրները։
ԹՐԱՄՓԸ ԿԿԱՆԳՆԻ ԴԱՏԱՐԱՆԻ ԱՌԱՋ
ԱՄՆ նախկին նախագահ Դոնալդ Թրամփը ժամանել է Նյու Յորք, որտեղ կկանգնի դատարանի առաջ: Մարտի 30-ին Նյու Յորքի երդվյալ ատենակալների դատարանը քվեարկել է Թրամփին մեղադրանք առաջադրելու օգտին՝ մեծահասակների համար ֆիլմերի նախկին աստղ Սթորմի Դենիելսին գումար վճարելիս Trump Organization ընկերության ֆինանսական փաստաթղթերի կեղծման գործով: Դատախազների պնդմամբ՝ Դենիելսը ստացել է առնվազն 130 հազար դոլար, որն իրականում նախատեսված է եղել Թրամփի նախընտրական քարոզարշավը ֆինանսավորման համար: Սա համարվում է քրեական հանցագործություն, որի համար Նյու Յորքի օրենսդրությամբ նախատեսվում է մինչև չորս տարվա ազատազրկում։ Թրամփը պնդում է, որ անմեղ է և հետապնդման է ենթարկվում Ջո Բայդենի վարչակազմի կողմից: Հիշեցնենք, որ նա համարվում է 2024 թվականի նախագահական ընտրություններում Հանրապետական կուսակցությունից թեկնածու առաջադրվելու գլխավոր հավակնորդը:
ԱՄՆ Սահմանադրության համաձայն՝ մեղադրանքի առաջադրումը չի խանգարում ընտրություններին մասնակցությանը։