Մալաթիա-Սեբաստիայում հիմնանորոգումից հետո դռները բացեց համար 82 մանկապարտեզը: Նախակրթարանի փոքրիկ բնակիչները քաղաքապետարանի ներկայացուցիչներին երգ ու պարով դիմավորեցին:
1986 թ. կառուցված շենքի հիմնորոգումը սկսվել է 2020 թվականին, ծախսվել է 200 մլն դրամ: Երևանի փոխքաղաքապետ Տիգրան Ավինյանը շրջայց կատարեց շենքում, ծանոթացավ իրականացված աշխատանքին: Նորոգվել են հատակը, պատերը, սանհանգույցը, կոյուղագծերը, դռներ-պատուհանները, ավելացվել են խմբասենյակները, ներդրվել է ջեռուցման նոր համակարգ: Փոխքաղաքապետի խոսքով՝ սա զուտ ենթակառուցվածքի, շենքի վերանորոգում չէ: Ծրագիրը մի քանի խնդիր է լուծում:
Տիգրան Ավինյան (Երևանի փոխքաղաքապետ) - Սա վստահաբար կրթական ծրագիր է, սա էներգախնայող ծրագիր է, այսինքն՝ հիմնանորոգումից հետո, ջերմամեկուսացումից, արևային կայանների տեղադրումից հետո մենք ստեղծում ենք մի միջավայր, որ նույն մանկապարտեզները իրենց կոմունալ ծախսերը կտրուկ նվազեցնում են, ու սա երեխաների ապագայի ներդրումն է, որը մենք համարում ենք առաջնահերթ:
Փոխքաղաքապետը վստահեցրեց՝ առաջիկա 3 տարում Երևանի բոլոր մանկապարտեզները հիմնանորոգված կլինեն: Իսկ ի՞նչ ճակատագրի կարժանանան հերթերում սպասող փոքրիկները:
Տիգրան Ավինյան - Դա ամենակարևոր խնդիրն է, որը լուծվում է այս ծրագրի շրջանակներում, քանի որ մանկապարտեզների հիմնանորոգումը նշանակում է հիմնանորոգվում են այն հատվածները, որոնք ուղղակի պիտանի չեն եղել օգտագործման, ու գրեթե բոլոր մանկապարտեզները, որոնք հիմնանորոգվում են, իրենց խմբերի քանակը ընդլայնվում է:
Դրա վառ օրինակը հենց համար 82 մանկապարտեզն է, եթե մինչև նորոգումը այն առավելագույնը 120 հոգու համար էր, հիմա մինչև 240 սան կարող է ընդունել:
Լևոն Հովհաննիսյան (Երևանի քաղաքապետի առաջին տեղակալ) - Մինչև հիմնանորոգումը այստեղ հաճախում էր 4 խումբ, հիմա ունենք մինչև 8 խումբ երեխաների հաճախելու հնարավորություն, ինչը շատ կարևոր է, քանի որ Մալաթիայում երեխաների մասով ունենք երեխաներ, որոնք սպասում են իրենց հերթին:
Լևոն Հովհաննիսյանը նշեց՝ հիմնանորոգումից ու վերակառուցումից զատ, բարձրացվում է շենքերի սեյսմակայունությունը, ինչը առաջնային խնդիր են համարում: Քաղաքային իշխանությունը այս տարի 270 մլն դրամ էլ նախատեսել է նոր գույքի ձեռքբերման համար:
Լևոն Հովհաննիսյան - Մասնավորապես սեղաններ-աթոռներ, ինչպես նաև առաջին անգամ ձեռք ենք բերելու զարգացնող խաղեր երեխաների համար:
ԿԲԱՐԵԿԱՐԳՎԵՆ ՆԱԽԱԿՐԹԱՐԱՆՆԵՐԻ ԲԱԿԵՐԸ
Մեկ այլ ծրագրով այս տարի կբարեկարգվեն նախակրթարանների բակերը, կստեղծվի կանաչապատ միջավայր, կներդրվեն նոր տաղավարներ, սահարաններ: Այս պահին միայն Մալաթիա-Սեբաստիայում 3 մանկապարտեզ է հիմնանորոգվում:
Քաղաքային իշխանության ներկայացուցիչների հաջորդ կանգառը համար 179 դպրոցի հարակից բակն էր. այստեղ ֆուտբոլի դաշտ է բացվում: Նախկինում ամայի և անպիտան տարածքը ամբողջությամբ բարեկարգվել, ցանկապատվել է, դաշտի համար միջազգային չափանիշներին համապատասխանող արհեստական խոտածածկ է տեղադրվել:
Տիգրան Ավինյան - Մենք բոլոր հնարավոր տեղերում ավելացնում ենք մարզադաշտեր, ֆուտբոլային դաշտեր, կանաչապատ դաշտեր, ու չենք թողնում երեխաներին, որ գարաժների, դռների վրա ֆուտբոլ խաղան, այլ խաղում են հարմարավետ, լավ խոտածածկի վրա:
Փոխքաղաքապետ Տիգրան Ավինյանը ևս մեկ անգամ հիշեցրեց՝ բնակելի շենքերի, դպրոցների հարակից տարածքները մեքենաների կայանատեղի դառնալու համար չեն ծառայելու: Դրանք երեխաների համար են: Ֆուտբոլի այս դաշտն արդեն ծառայում է նպատակին: Առաջին հարվածը գնդակին կատարված է:
