ԱՄՆ նախագահ Ջո Բայդենը գտնվում է Կիևում։ Այս մասին հայտնում է ուկրաինական «Страна» պարբերականը։
ԱՄՆ նախագահի այցի ընթացքում Կիևում հայտարարվել է օդային տագնապ:
Ուկրաինայի նախագահ Վոլոդիմիր Զելենսկին ավելի ուշ իր Telegram ալիքում լուսանկար է հրապարակել Կիև ժամանած ԱՄՆ առաջնորդի հետ և այս այցը անվանել է աջակցության կարևոր ազդանշան բոլոր ուկրաինացիների համար:
Զելենսկին հրապարակել է Բայդենի հետ ձեռքսեղմման լուսանկարը, որն իր այցի կապակցությամբ կրում է ուկրաինական դրոշի գույներով փողկապ։
Միացյալ Նահանգների նախագահը հայտնել է, որ Ուկրաինան կստանա 500 միլիոն դոլարի ռազմական օգնության նոր փաթեթ, մանրամասները պաշտոնապես կհայտարարվեն երեքշաբթի։ Առայժմ հայտնի է, որ Կիևին նոր ռազմական օգնությունը ներառելու է զինամթերք HIMARS հրթիռային համակարգերի համար։ Նա նաև ասել է, որ ժամանել է Կիև՝ հայտարարելու Ուկրաինայի ժողովրդավարությանն ու ինքնիշխանությանը սատարելու մասին:
Reuters-ը փոխանցել է Ուկրաինայի նախագահ Զելենսկու հայտարարությունը, ըստ որի Կիևում Ջո Բայդենի հետ քննարկել է հեռահար սպառազինությունների հարցը:
Սպիտակ տունն էլ տեղեկացնում է, որ ավելի ուշ այս շաբաթ ԱՄՆ-ը կհայտարարի հակառուսական պատժամիջոցների նոր փաթեթի մասին:
«Երբ Պուտինը սկսեց իր ներխուժումը գրեթե մեկ տարի առաջ, նա վստահ էր, որ Ուկրաինան թույլ է, իսկ Արևմուտքը՝ բաժանված: Բայց նա բացարձակապես սխալվեց»,- Բայդենի խոսքն է մեջբերում Սպիտակ տունը:
