Քաղաքական, տնտեսական, իրավական հարցերի հագեցած օրակարգով խորհրդարանը վերսկսեց աշխատանքը: 8-րդ գումարման ԱԺ 5-րդ նստաշրջանի առաջին նիստին թեև բացակա պատգամավորներ կային, բայց ներկա էին բոլոր խմբակցությունները:
ԱՆԴՐԱԴԱՐՁ ՀՀ ԵՎ ԱՐՑԱԽԻ ՄԻՋԽՈՐՀՐԴԱՐԱՆԱԿԱՆ ՀԱՆՁՆԱԺՈՂՈՎԻՆ
Մինչև օրակարգային հարցերի քննարկումը ընդդիմադիր պատգամավոր Արծվիկ Մինասյանը հետաքրքրվեց Հայաստան-Արցախ միջխորհրդարանական հանձնաժողովի աշխատանքներից:
Արծվիկ Մինասյան (ՀՀ ԱԺ «Հայաստան» խմբակցության քարտուղար) - Հանդիպում, եթե ոչ տետատետ՝ հաշվի առնելով այսօրվա պայմանները, ապա առնվազն քննարկում 2 խորհրդարանների պատգամավորի միջև՝ համատեղ ելքեր գտնելու ուղղությամբ:
ԱԺ նախագահի խոսքով՝ Արցախի գործընկերների հետ հանդիպումը պետք է կայանար նախորդ տարվա սեպտեմբերի 15-ին, սակայն 13-14-ի իրադադարձությունները՝ Ադրբեջանի սանձազերծած ռազմական էսկալացիան, հետաձգեցին միջխորհրդարանական հանձնաժողովի հանդիպումը:
Ալեն Սիմոնյան (ՀՀ ԱԺ նախագահ) - Լաչինի միջանցքի փակ լինելու պատճառով չեմ պատկերացնում, թե մեկնելու առաջարկն ինչպես կարելի է իրագործել, իսկ առցանցի մասին կարելի է քննարկել, հասկանալ: Եթե նման հնարավորություն տեսնում են նաև Արցախի մեր գործընկերները, ապա` ինչու ոչ:
ՎԱՏ ՀԵՂԻՆԱԿՈՒԹՅԱՄԲ ԱՎԻԱԸՆԿԵՐՈՒԹՅՈՒՆԸ ԼԻՑԵՆԶԻԱ ՉԻ ՍՏԱՆԱ
Օրակարգային առաջին հարցով օրենսդիրը քննարկեց «Ավիացիայի մասին» օրենքը լրացնելու Կառավարության առաջարկը, որով ամրագրվում է` եթե օդանավ շահագործող ընկերությունն ունի վատ հեղինակություն, ապա Հայաստանում լիցենզիա չի ստանա:
Արմեն Սիմոնյան (ՀՀ ՏԿԵ նախարարի տեղակալ մաս) - Օդանավ շահագործողի վկայականի տրամադրման գործընթացում որպես կարևորագույն պահանջ դիտարկել այլ անձանց կյանքի, առողջության կամ սեփականության, պետության անվտանգության, ինչպես նաև ավիացիոն ոլորտում տնտեսվարողի վատ հեղինակություն ունենալու հարցերը, որոնց հիմքով հնարավոր կլինի մերժել իրավունքի տրամադրումը:
ԱՌԱՋԱՐԿՎԵԼ Է «ԶՎԱՐԹՆՈՑԻ» 5 ՏԱՐԻՆԵՐԻ ՆԵՐԴՐՈՒՄԱՅԻՆ ԾՐԱԳԻՐ
2022 թվականին «Զվարթնոց» օդանավակայանը սպասարկել է ավելի քան 3.5 մլն մարդու՝ նշեց փոխնախարարն ու նկատեց՝ ամենաշատ ուղևորափոխադրումներն իրականացրել է հայկական ընկերություններից մեկը, տեղափոխել ավելի քան 458 հազար ուղևորի: Ծավալների ավելացումը քննարկման դաշտ է բերել օդանավակայանը վերազինելու հարցը: Ըստ Սիմոնյանի՝ օդանավակայանի ներկայացուցիչներն առաջարկել են մոտակա 5 տարիների ներդրումային ծրագիր՝ 350 միլիոն դոլար արժողությամբ:
Արմեն Սիմոնյան - Հարցը քննարկվել է Հանրային ներդրումային կոմիտեում, բայց պայմանագրի հետ կապված որոշակի հարցեր կան, որոնք պետք է ուսումնասիրվեն:
ՀԱՅԿԱԿԱՆ ԱՎԻԱԸՆԿԵՐՈՒԹՅՈՒՆՆԵՐԻ` «ՍԵՎ ՑՈՒՑԱԿՈՒՄ» ԼԻՆԵԼՈՒ ՄԱՍԻՆ
Խոսելով հայկական ավիաընկերությունների՝ Եվրոպական հանձնաժողովի «սև ցուցակում» հայտնվելու մասին՝ Սիմոնյանը հայտարարեց՝ նախկինում թույլ տված մոտ 50 սխալից 27-28-ն արդեն ուղղել են:
Արմեն Սիմոնյան - Մենք ԵՄ-ի հետ կնքել ենք «Համաձայնագիր ընդհանուր ավիացիոն գոտու մասին», որը վավերացվել է անցած տարվա դեկտեմբերին: Այդ համաձայնագրով Հայաստանի օրենսդրությունում նախատեսված է եվրոպական բազմաթիվ դիրեկտիվների չափանիշների և նորմերի ներառում, որը պետք է իրականացվի առաջիկա 2 տարում: Այդ չափանիշներին համապատասխանությունը կհանգեցնի «սև ցուցակից» ավիաընկերությունների զուգահեռ դուրս գալուն:
ԱԶԱՏԱԶՐԿՄԱՆ ՎԱՅՐԵՐՈՒՄ ՊԵՏՔ Է ՆԵՐԴՐՎԵՆ ՆՈՐ ՉԱՓՈՐՈՇԻՉՆԵՐ
Ազատազրկման վայրերում պետք է ներդրվեն նոր չափորոշիչներ. «Կալանավորված և ձերբակալված անձանց պահման մասին» օրենքի փոփոխություններն էլ ներկայացրեց ներքին գործերի նախարարի տեղակալ Արփինե Սարգսյանը։ Պահման վայրերում խնդիրները շատ են՝ չկան թեքահարթակներ, առանձին լոգարաններ և սանհանգույցներ: Բուժօգնության համար կահավորված սենյակները չեն համապատասխանում միջազգային չափորոշիչներին:
Արփինե Սարգսյան (ՀՀ ներքին գործերի նախարարի տեղակալ) - Սա կարևոր ուղղություն է ոստիկանության ոլորտում իրականացվող բարեփոխումների շրջանակում, քանի որ շենքային պայմանների ստանդարտավորման կտորն առաջնային է, որ կարողանանք մեկ միասնական չափանիշին համապատասխան տարածքներ ունենալ:
ԱՌԱՋԱՐԿՎՈՒՄ Է ԲԱՐՁՐԱՑՆԵԼ ԱՆՕՐԻՆԱԿԱՆ ՆԵՐԿՐՎԱԾ ԴԵՂԵՐԻ ՏՈՒԳԱՆՔԸ
Էկոնոմիկայի նախարարությունն առաջարկում է ավելացված արժեքի հարկի գանձումը փուլ առ փուլ վերացնել այն հումքից ու նյութերից, որոնք Հայաստանում չկան, սակայն անհրաժեշտ են արտադրության համար: Մեկ այլ առաջարկով էլ պետք է բարձրացնել անօրինական ներկրված դեղերի տուգանքի չափը: Գործող կարգավորմամբ՝ անօրինական ներկրված դեղերի մինչև 30 փաթեթ հայտնաբերելու դեպքում նախատեսվում է տուգանք` նվազագույն աշխատավարձի 150-ապատիկի չափով, իսկ 30-ից ավելիի դեպքում` 350-ապատիկի չափով, ինչն, ըստ պատգամավոր Նարեկ Զեյնալյանի, քիչ է:
Նարեկ Զեյնալյան (ԱԺ առողջապահության հարցերի մշտական հանձնաժողովի նախագահ) - Մինչև 5 փաթեթ հայտնաբերելու դեպքում տուգանք սահմանել նվազագույն աշխատավարձի 1000-ապատիկի չափով, 5-ից ավելիի դեպքում` 2000-ապատիկի, իսկ մեկ տարվա ընթացքում կրկին հայտնաբերելու պարագայում նախատեսվում է լիցենզիայի կասեցում մինչև 2 ամիս ժամկետով, կրկին հայտնաբերելու դեպքում՝ լիցենզիայի դադարեցում:
ՓՈՓՈԽՈՒԹՅԱՆ ԱՌԱՋԱՐԿ «ՊԵՏԱԿԱՆ ԳԱՂՏՆԻՔԻ ՄԱՍԻՆ» ՕՐԵՆՔՈՒՄ
Գործադիրը փոփոխություններ է առաջարկում նաև «Պետական գաղտնիքի» մասին օրենքում: «Ծառայողական գաղտնիքը» և «Գաղտնի» դրոշմագիր ունեցող բոլոր տեղեկություններն առանց բացառության պետական գաղտնիք կհամարվեն, ներկայացրեց ԱԱԾ տնօրենի տեղակալ Տիգրան Հարությունյանը: Նախագահների, խորհրդարանի խոսնակների և վարչապետների համար կերաշխավորվի պետական գաղտնիքի հասանելիությունը պաշտոնին նշանակվելու պահից:
Տիգրան Հարությունյան (ԱԱԾ տնօրենի տեղակալ) - Նախագծերի փաթեթով առաջարկվում է խստացնել պետական գաղտնիք հրապարակելու համար նախատեսված քրեական պատասխանատվությունը: Միաժամանակ վարչական պատասխանատվություն է նախատեսվում «գաղտնի» դրոշմագիր ունեցող տեղեկությունները հրապարակելու, ինչպես նաև պետական գաղտնիք պարունակող տեղեկություններին առնչվելու թույլտվություն ունեցող անձի կողմից իր նկատմամբ կիրառված սահմանափակումները խախտելու համար:
Նախագծի փաթեթը 50 օրենքում փոփոխություն է ենթադրում: Խմբագրվել է Հայաստանի Հանրապետության քաղաքացուն, օտարերկրյա քաղաքացուն և քաղաքացիություն չունեցող անձին գաղտնիք պարունակող տեղեկություններին առնչվելու իրավունքի տրամադրման, մերժման հիմքերը, փոփոխության է ենթարկվել նաև պետական գաղտնիք պարունակող տեղեկություններին առնչվելու իրավունք ունեցող կամ նախկինում ունեցած քաղաքացիների իրավունքների սահմանափակման շրջանակը: Ինչպես նաև այն անձինք, որոնք հասանելիություն ունեն պետական գաղտնիք պարունակող հատուկ կարևորության և հույժ գաղտնի դրոշմագրեր ունեցող տեղեկություններին, այլ երկիր այցելելիս պետք է նախապես ԱԱԾ-ին տեղեկացնեն: Ազգային ժողովը քննարկեց նաև գլխադասային հանձնաժողովների կողմից դրական եզրակացության ստացած մի շարք նախագծեր՝ 2-րդ ընթերցմամբ:
Հեղինակ` Անի Օհանյան
