Առաջարկվում է տեղական ինքնակառավարման մարմիններին լիազորություն վերապահել ոչ սահմանված տեղերում և օրենսդրությամբ սահմանված պահանջների խախտմամբ առևտուր իրականացնելու կամ ծառայություն մատուցելու դեպքերում ոչ միայն տուգանքի տեսքով վարչական տույժ կիրառել, այլ նաև կիրառել լրացուցիչ վարչական տույժ՝ առևտրի կամ ծառայությունների մատուցման ընթացքում օգտագործվող առարկաների բռնագրավմամբ:
Վարչական իրավախախտումների վերաբերյալ օրենսգրքում և դրան կից մի շարք օրենքներում փոփոխություններ ու լրացումներ նախատեսող օրենսդրական փաթեթն առաջին ընթերցմամբ քննարկվել է տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի հունվարի 11-ի նիստում: Օրենսդրական փաթեթը մշակել է Երևանի քաղաքապետարանը:
ՀՀ տարածքային կառավարման և ենթակառուցվածքների նախարարի տեղակալ Հովհաննես Հարությունյանը ներկայացրել է հիմնական փոփոխությունները, որից հետո Երևանի քաղաքապետի տեղակալ Սուրեն Գրիգորյանն առավել մանրամասն անդրադարձել է կարգավորումներին:
Սուրեն Գրիգորյանի խոսքով՝ առանձին դեպքերում դատական կարգով բռնագրավումը կարող է չաշխատել: Դա կվերաբերի այն դեպքերին, երբ դատարան դիմելու պահին առգրավված գույքն այլևս գոյություն չի ունենա և հնարավոր չի լինի դիմելու դատարան՝ դրա նկատմամբ հանրային սեփականությունը սահմանելու համար: «Այդ դեպքում, եթե քաղաքացին կկարծի, որ վարչական մարմինը՝ այս դեպքում համայնքը, իրականացրել է լիազորությունները ոչ պատշաճ, և իր իրավունքները խախտվել են, կարող է դիմում ներկայացնել և գումարային հատուցում ստանալ»,- նշել է փոխքաղաքապետը:
Սննդամթերքի առգրավման դեպքում վերադարձը համարժեք իրավունքի վերականգնում չի կարող լինել: «Եթե անձից սննդամթերքը առգրավվի և թեկուզ հաջորդ օրը վերադարձվի, դա արդեն նույն սննդամթերքը չէ»,- ասել է Սուրեն Գրիգորյանը և պարզաբանել, որ չփչացող ապրանքների դեպքում այլ է. համայնքի կողմից դրանք առգրավվելու են ու պահվելու: Եթե հետագայում պարզվի, որ անձի իրավունքը խախտվել է, ապա այդ ապրանքը կվերադարձվի:
Ըստ փոխքաղաքապետի՝ այսօր տուգանքի բազմակի կիրառման դեպքերը նպատակին չեն ծառայում. մի դեպքում նման գործունեություն իրականացնող անձինք չունեն գույք, որ իրենցից այդ տուգանքը բռնագանձվի, մյուս դեպքում այդ անձինք բավականին մեծ եկամուտներ են ունենում, և այդ տուգանքը վերջիններիս համար զսպող մեխանիզմ չէ:
Սուրեն Գրիգորյանի գնահատմամբ՝ նախաձեռնության ընդունումը պայմանավորված է հանրային առողջապահության պահպանման անհրաժեշտությամբ. հաճախ վաճառվում է հակահիգիենիկ, հակասանիտարական պայմաններում պահվող սննդամթերք, որն առողջապահական ռիսկեր է ստեղծում քաղաքացիների համար: Հաջորդը՝ քաղաքի արտաքին տեսքն է: Ըստ զեկուցողի՝ քաղաքը շուկայի վերածել չի կարելի: Թեպետ գործում են առևտրի համար առանձնացված վայրեր, սակայն դրանք հաճախ իրենց նպատակին չեն ծառայում, կիսադատարկ են: Ըստ նրա՝ նախաձեռնությունը կարևոր է նաև արդար մրցակցության ապահովման տեսանկյունից:
Հարակից զեկույցում հանձնաժողովի նախագահ Վահե Ղալումյանը հիշեցրել է, որ օրենսդրական փաթեթը մանրամասն քննարկվել է: ԱԺ փորձագիտական և վերլուծական վարչությունը որոշ դիտարկումներ է ներկայացրել, որոնք կքննարկվեն առաջինից երկրորդ ընթերցում ընկած ժամանակահատվածում:
Հարցն արժանացել է հանձնաժողովի դրական եզրակացությանը:
Հեղինակի բացակայության պատճառով մինչև երկու ամիս ժամկետով հետաձգվել է ««Աղբահանության և սանիտարական մաքրման մասին» ՀՀ օրենքում փոփոխություններ և լրացումներ կատարելու մասին» և «Վարչական իրավախախտումների վերաբերյալ ՀՀ օրենսգրքում լրացումներ և փոփոխություններ կատարելու մասին» օրենսդրական փաթեթի քննարկումը:
