Այսօր Բիշքեկում ՌԴ նախագահ Վլադիմիր Պուտինը հանդիպել է Հայաստանի վարչապետ Նիկոլ Փաշինյանի հետ։
«Մենք վերջերս հանդիպեցինք Երևանում, որտեղ Դուք, կարծում եմ, կհամաձայնեք, հաջողությամբ անցկացրիք ՀԱՊԿ գագաթնաժողովը։ Եվս մեկ անգամ շնորհակալություն ենք հայտնում այն մթնոլորտի համար, որ ստեղծեցիք մեծ թվով կարևոր հարցերի անկեղծ քննարկման համար։ Այսօր մենք այստեղ ենք հանդիպում և, ինչպես միշտ, օգտագործում ենք նման ձևաչափեր երկկողմ բանակցությունների համար»,- ասել է Վլադիմիր Պուտինը։
Նա շեշտել է, որ Ռուսաստանը շարունակում է մնալ առաջատար առևտրատնտեսական գործընկեր. «Հայաստանի ապրանքաշրջանառության ավելի քան 30 տոկոսը բաժին է ընկնում Ռուսաստանին, որն առաջատարներից, գուցե նույնիսկ հիմնական ներդրողներից մեկն է՝ ներդրումների մոտ 40 տոկոսը։ Այս տարվա առաջին 10 ամիսներին ապրանքաշրջանառության աճը կազմել է 67 տոկոս։ Սա շատ, շատ լավ, դրական ցուցանիշ է։
Այնուամենայնիվ, հարցեր միշտ լինում են, և ես ուրախ եմ ձեզ հետ հանդիպելու այս հնարավորությունից»,- ասել է ՌԴ նախագահը։
«Այսօր մենք բավականին հաջող, կառուցողական հանդիպում անցկացրինք, և փաստորեն քննարկել ենք տնտեսական հարցերի ողջ շրջանակը՝ թե՛ նեղ, թե՛ ընդլայնված ձևաչափով։
Դուք արդեն խոսեցիք փոխադարձ առևտրի աճի մասին, որն իսկապես տպավորիչ է։ Հուսով եմ, որ Եվրասիական տնտեսական միության մեխանիզմների կատարելագործմամբ հնարավոր կլինի պահպանել այն թափը, որն արդեն ուրվագծվել է»,- ասել է Նիկոլ Փաշինյանը։
Վարչապետի խոսքով՝ հայ-ռուսական օրակարգը շատ հագեցած է։ «Համոզված եմ, որ այսօր քննարկելու ենք նաև տարածաշրջանային խնդիրներ։ Ցավոք սրտի, իրավիճակը մեր տարածաշրջանում շարունակում է լարված մնալ, և ես ուզում եմ նշել, որ մեր տարածաշրջանում հիմնական խնդիրը, իհարկե, մնում է ԼՂ հարցի կարգավորումը։
Ցավոք, վերջին շրջանում նկատում ենք նաև լարվածության աճ Լեռնային Ղարաբաղում՝ ռուս խաղաղապահների պատասխանատվության գոտում։ Համոզված եմ, դուք տեղյակ եք, որ Լաչինի միջանցքը վերջերս արգելափակվել էր, և Լեռնային Ղարաբաղում այս կապակցությամբ շատ մեծ մտահոգություններ կան։ Իհարկե մենք միշտ քննարկում ենք այդ հարցերը։ Հուսով եմ, որ այսօր էլ կկարողանանք քննարկել տարածաշրջանային անվտանգության բոլոր կարևոր հարցերը»,- ասել է ՀՀ վարչապետը։
