Օրերս գրանցվեց ծննդկանի ու նորածնի մահվան դեպք: Ըստ բժշկի՝ Կարինե Մուսայելյանի նորածինը ծնվել է մահացած, ժամեր անց 4 անգամ սրտի կանգից հետո մահացել է 33-ամյա ծննդկանը: Կնոջ ու փոքրիկի մահվան համար ամուսինը՝ Արայիկ Ջուլհակյանը, մեղադրում է «Շենգավիթ» ԲԿ-ի մանկաբարձ-գինեկոլոգ Կարինե Հովհաննիսյանին: Ամուսինը պնդում է՝ իր կինը հղիության ընթացքում պարբերաբար հետազոտվել է, և որևէ խնդիր չի արձանագրվել: Առողջական այլ խնդիրներ ևս չի ունեցել:
Արայիկ Ջուլհակյան (Կարինե Մուսայելյանի ամուսինը) - 4:30 ին սովորական ցավերն ա սկսել, որը որ սովորական բան ա: Մի ժամ սպասել ենք՝ հասկանանք, տենանք՝ խաբուսիկ են թե չէ, ու հասկացանք, որ շարունակական են, ու որոշեցինք գնանք հիվանդանոց: 5:47-ին զանգեցինք բժշկին, ասեց՝ գնացեք, թող հերթապահը ընդունի, մինչև ես ձեզ կմոտիկանամ: Ինձ հասած տվյալներով՝ մինչև 8-ը հաստատ չի եղել, ես խոսել եմ կնոջս հետ 8:02, չի եղել: Ասեց՝ 20 րոպեից նոր կժամանի, իսկ հետագայում ճշտել եմ, որ կինս 9:35 զանգել ա, զանգերին չի պատասխանել:
Ջուլհակյանի խոսքով՝ բժիշկ Հովհաննիսյանը ավելի ուշ է եկել ծնարան: Հետո մահացած երեխային է ցույց տվել ու ասել՝ նորածինը կյանքի հետ անհամատեղելի արատ է ունեցել, որը հնարավոր չէր մինչև երեխայի ծնունդը պարզել: Փոքրիկը ծնվել է 3 կգ 700 գրամ քաշով և 53 սմ հասակով:
Արայիկ Ջուլհակյան - էդ ժամանակ ասել ա, որ կնոջս վիճակնել ա վատ, հիմա զբաղված ենք կնոջով, էրեխու պահն էլ ա, ասել ա՝ ծնվել ա մահացած, որը իմ մոտ անհասկանալի ա. ո՞նց կարա 9 ամիս նորմալ սաղ լինի ու ծնվի արատով: Մինչև այսօր ես ոչ մի պատասխան չունեմ, թե երեխան խի մահացավ, կինս խի մահացավ:
Փորձեցինք բժշկից պարզել՝ որն է եղել նորածնի և ծննդկանի մահվան պատճառը: «Շենգավիթ» ԲԿ-ի մանկաբարձ-գինեկոլոգ Կարինե Հովհաննիսյանը, հարցը չլսելով, հեռախոսը անջատեց: Պարզեցինք, որ դեպքի հաջորդ իսկ օրն իր հաշվին արձակուրդ է վերցրել: Ավելի ուշ բժշկական կենտրոնը համաձայնեց պատասխանել «Լուրերի» հարցերին:
Ինչու 3-րդ անգամ մայրանալը դարձավ Կարինե Մուսայելյանի մահվան պատճառ, և ի՞նչ խնդիր է ունեցել փոքրիկը: Շենգավիթ բժշկական կենտրոնի գլխավոր բժշկի տեղակալ Ռուսուդան Վարդանյանը մեկնաբանում է՝ քանի դեռ չկա և՛ նորածնի, և՛ ծննդկանի դատաբժշկական փորձաքննությունը, ամենը ենթադրությունների դաշտում է, բայց փաստաթղթերում արձանագրվել է պտղի սուր ասֆիքսիա, այսինքն՝ շնչահեղձություն, ինչի պատճառը ենթադրվում է, որ եղել է նորմայից ավելի կարճ պորտալարը:
Ռուսուդան Վարդանյան («Շենգավիթ» բժշկական կենտրոնի գլխավոր բժշկի տեղակալ) - Երբ որ փաստացի երեխան ծնվել է, և չափել են պորտալարի երկարությունը, տեսել են, որ կարճ պորտալարի հետ են գործ ունեցել: Դա այն խնդիրն է, որը հնարավոր է և չախտորոշվի մինչև ծնունդ: Կարող է պատահի, որ ունեցել է ինչ-ինչ անտեսանելի, այդ պահին՝ ծնված պահին, ոչ տեսանելի, բայց ինչ-որ զարգացման արատ: Երեխայի սրտի աշխատանքը եղել է նորմալ: Մեզ համար էլ առեղծվածային եղավ, որ երեխան մահացած է:
Ռուսուդան Վարդանյանի խոսքով՝ չնայած որ կինը մահացած պտուղ է ծննդաբերել, ծննդաբերության երրորդ շրջանն ընթացել է առանց բարդությունների: Ծննդկանի մոտ սկսվել է վաղ հետծննդաբերական հիպոտոնիկ արյունահոսություն միայն 30-40 րոպե անց: Բժշկուհին պատմում է՝ կատարվել են ըստ չափորոշիչների նախատեսված դեղորայքային, գործիքային, ձեռքային բոլոր անհրաժեշտ գործողությունները, սակայն անարդյունավետ:
Ռուսուդան Վարդանյան - Երբ որ մենք տեսանք, որ կոնտսերվատիվ միջոցառումները եղան անարդյունավետ, որոշում ընդունվեց արյունը կանգնեցնել որովայնահատմամբ, կինը տեղափոխվեց վիրահատարան: Ստիպված եղանք արգանդը հեռացնել:
Արայիկ Ջուլհակյան - Ինձ տեղեկացրել են, որ արյունահոսությունը չեն կարողանում դադարեցնեն, ուրիշ մասնագետ են նաև հրավիրել, եթե չկարողանան, արգանդը պետք է հեռացնեն, ու ես ասել եմ՝ եթե դա ա միակ լուծումը, թող հեռացնեն:
Վիրահատության ժամանակ արձանագրվել է սրտի կանգ, որն արագ վերականգնվել է սիրտ-թոքային վերակենդանացման միջոցառումների արդյունքում: Անցած 6 ժամերին արձանագրվել է ևս 3 անգամ սրտի կանգ: Վերջինը բժիշկներին չի հաջողվել վերականգնել: Արայիկ Ջուլհակյանը պնդում է՝ բժիշկների անփութությունն է դարձել կնոջ ու որդու մահվան պատճառ: Եթե բժիշկները կեսարյան հատման որոշում կայացնեին, 2 կյանքը կփրկվեր, բայց իր համար անհասկանալի պատճառով այդ քայլին չեն դիմել:
Արայիկ Ջուլհակյան - Էդ պահի փրկությունը եղել ա միայն կեսարյանը, որը որ չեն արել, ասել ա՝ ցուցում չկա: Երկու երեխան էլ ունեցել ա բնական ճանապարհով, ասել են՝ թող երրորդն էլ տենց լինի:
Ռուսուդան Վարդանյան - Կեսարյան հատման ցուցում չի եղել, որևէ էտապում չի եղել:
Նախաձեռնվել է քրեական վարույթ, նշանակվել է դատաբժշկական փորձաքննություն: Կնոջը և զավակին կորցրած Արայիկ Ջուլհակյանը արդար դատավարություն է պահանջում ու ասում՝ բժիշկների՝ «փորձեցինք փրկել, բայց անարդյունք» խոսքերը իրեն չեն բավարարում:
Կարինե Մուսայելյանը 2 երեխայի մայր էր:
