ՀԱՍՏԱՏՎԵԼ Է ՀՀ-ԱԴՐԲԵՋԱՆ ՍԱՀՄԱՆԻՆ ԱՌԱՔԵԼՈՒԹՅԱՆ ՏԵՂԱԿԱՅՈՒՄԸ
Այսօր Լյուքսեմբուրգում ԵՄ 27 երկրի արտգործնախարարները հաստատել են Հայաստան-Ադրբեջան սահմանին քաղաքացիական առաքելության տեղակայումը: Նախնական փուլում սահմանին կտեղակայվի շուրջ 40 դիտորդ՝ Վրաստանում Եվրամիության առաքելության կազմից, ինչը, Միության հիմնավորմամբ, պայմանավորված է խնդրի հրատապությամբ։
Նախարարների օրակարգում ներառված են եղել նաև այլ հարցեր՝ Եվրամիության տարածքում ուկրաինական բանակի համար ուսումնական առաքելություն սկսելու հնարավորությունը, Միության քաղաքականությունը Չինաստանի նկատմամբ՝ հաշվի առնելով Պեկինի գործակցությունը Մոսկվայի հետ։
ԶՈՐԱՎԱՐԺՈՒԹՅՈՒՆՆԵՐ ԻՐԱՆԻ ՀՅՈՒՍԻՍ-ԱՐԵՎՄՈՒՏՔՈՒՄ
Իրանը լայնածավալ զորավարժություններ է անցկացնում երկրի հյուսիս-արևմուտքում: Իրանի իսլամական հեղափոխության պահապանների կորպուսի ցամաքային զորքերի հրամանատարի տեղակալ Ալի Աքբար Փուրջամշիդիանը, անդրադառնալով վարժանքներին, նշել է՝ Թեհրանը կարևորում է հյուսիսարևմտյան սահմանների ու Արաքսի շրջանի կայունությունը:
«Ադրբեջանն ու Հայաստանը Իսլամական Հանրապետության համար սպառնալիք չեն, բայց այնտեղ տեղի ունեցող որոշ զարգացումներ վտանգավոր են»,- նշել է պաշտոնյան:
Նա համոզմունք է հայտնել՝ եթե տարածաշրջանի զինված ուժերը սերտորեն գործակցեն, դիվանագիտության և տարածաշրջանի անվտանգության համար բավարար հիմքեր կարող են ստեղծվել: Փուրջամշիդիանը ևս մեկ անգամ շեշտել է՝ առկա խնդիրները չպետք է լուծվեն պատերազմական գործողությունների միջոցով, տարածաշրջանի սահմանները չպետք է փոխվեն: Նա նաև անընդունելի է համարել արտաքին միջամտությունը տարածաշրջանային հարցերին:
ԶԱՐԳԱՑՈՒՄՆԵՐԸ ՀԱՐԱՎԱՅԻՆ ԿՈՎԿԱՍՈՒՄ՝ ՔՆՆԱՐԿՄԱՆ ԱՌԱՆՑՔՈՒՄ
Իրանի և Ադրբեջանի արտգործնախարարներ Հոսեյն Ամիր Աբդոլլահիանը և Ջեյհուն Բայրամովը հեռախոսազրույցի ընթացքում քննարկել են Հարավային Կովկասում զարգացումները: Աբդոլլահիանը հայտարարել է, որ Թեհրանը դեմ է տարածաշրջանում օտարերկրյա ուժերի տեղակայմանը։ Նա նաև ընդգծել է, որ անհրաժեշտ է հարգել Ադրբեջանի և Հայաստանի ինքնիշխանությունն ու տարածքային ամբողջականությունը։
ԻՐԱՆԱԿԱՆ ԲԱՆՏՈՒՄ ՀՐԴԵՀԻ ՀԵՏԵՎԱՆՔՈՎ ԶՈՀՎԵԼ Է ԱՌՆՎԱԶՆ 4 ՄԱՐԴ
Թեհրանի «Էվին» բանտում կիրակի երեկոյան բռնկված հրդեհի հետևանքով առնվազն 4 բանտարկյալ է մահացել, ևս 61-ը տուժել են՝ տեղեկացնում են իրանական ԶԼՄ-ները։ Նշվում է, որ հրդեհը բռնկվել է բանտի կարի արտադրամասում կալանավորների միջև բախումներից հետո: Տեղական իշխանությունների տվյալով՝ իրավիճակը վերահսկվում է:
ԿԻԵՎՈՒՄ ՊԱՅԹՅՈՒՆՆԵՐ ԵՆ ՈՐՈՏԱՑԵԼ. ԿԼԻՉԿՈ
Կիևում պայթյուններ են որոտացել՝ հայտնել է քաղաքապետ Վիտալի Կլիչկոն: Մասնավորապես, պայթյուններ են լսվել Շևչենկոյի շրջանում, որտեղ գտնվում են Ուկրաինայի նախագահի և ԱԱԾ գրասենյակները։ Դնեպրոպետրովսկի իշխանություններն էլ հայտնել են, որ ռուսական կողմն այսօր թիրախավորել է շրջանի էներգետիկ ենթակառուցվածքները: Ավելի վաղ Կիևում և Ուկրաինայի մի քանի այլ շրջաններում օդային տագնապ է հայտարարվել, քաղաքացիներին կոչ են անում մնալ ապաստաններում։
Ուկրաինայի մայրաքաղաքի և մի շարք շրջաններին արդեն մի քանի օր հասցվող օդային հարվածների ֆոնին ավելի քան 10 երկիր իր քաղաքացիներին հորդորել է լքել Ուկրաինայի տարածքը։ Նման հայտարարություններով արդեն հանդես են եկել Չինաստանը, ԱՄՆ-ը, Եգիպտոսը, Ղազախստանը, Ուզբեկստանը, Բելառուսը, Ղրղզստանը, Տաջիկստանը, Թուրքմենստանը և այլն: Անվտանգության նկատառումներով ժամանակավորապես փակվել է նաև Ուկրաինայում Սերբիայի դեսպանատունը։
ՕԳՆԵԼՈՎ ԿԻԵՎԻՆ՝ ՆԱՏՕ-Ն ԲԱՐԴԱՑՆՈՒՄ Է ԻՐԱՎԻՃԱԿԸ. ՊԵՍԿՈՎ
ՆԱՏՕ-ն դե ֆակտո ուկրաինական հակամարտության կողմ է դարձել՝ հայտարարել է Դմիտրի Պեսկովը։ «Օգնելով Կիևին՝ Հյուսիսատլանտյան դաշինքը զգալիորեն բարդացնում է իրավիճակը: Ստեղծված իրավիճակում, հավանաբար, ներքին տնտեսական և այլ մոբիլիզացիայի կարիք կա, սակայն Ռուսաստանի ներուժը թույլ է տալիս շարունակել հատուկ ռազմական գործողությունը նույնիսկ այս պայմաններում»,- հավատացրել է ՌԴ նախագահի խոսնակը։
ՄՈԼԴՈՎԱՅՈՒՄ ԱՊԱՄՈՆՏԱԺՎԵԼ ԵՆ ՑՈՒՑԱՐԱՐՆԵՐԻ ՎՐԱՆՆԵՐԸ
Մոլդովայի մայրաքաղաքում ոստիկանությունն ապամոնտաժել է խորհրդարանի շենքի և նախագահական նստավայրի մոտ հավաքված ցուցարարների վրանները: Լրատվամիջոցների տվյալով՝ շուրջ 60 հազար մարդ դուրս է եկել բողոքի ցույցի։
Քաղաքացիները դժգոհություն են հայտնում նախագահ Մայա Սանդուին և երկրի իշխող կուսակցությանը եվրոպամետ քաղաքականության, էներգետիկ ճգնաժամի և գների բարձրացման համար, պահանջում նոր ընտրությունների անցկացում: Ցուցարարները կոչ են անում բանակցություններ վարել Ռուսաստանի հետ գազի գնի շուրջ և ճնշում չգործադրել ընդդիմության անդամների վրա:
ԲՈՂՈՔԻ ՑՈՒՅՑԵՐ ՓԱՐԻԶՈՒՄ
Վառելիքի և սննդամթերքի թանկացման, կենսաթոշակային տարիքի բարձրացման դեմ բողոքի ցույցեր են անցել նաև Փարիզում: Ցուցարարները կոչ են արել քայլեր ձեռնարկել՝ լուծելու այդ թվում կլիմայական խնդիրները: Լրատվամիջոցների տվյալով՝ ակցիայի մասնակիցների և ոստիկանների միջև բախումներ են տեղի ունեցել: Ցույցերի կազմակերպիչների տվյալով՝ փողոց է դուրս եկել շուրջ 140.000 մարդ:
ՉԻՆԱՍՏԱՆԻ ԿՈՄՈՒՆԻՍՏԱԿԱՆ ԿՈՒՍԱԿՑՈՒԹՅԱՆ ՀԱՄԱԳՈՒՄԱՐԸ ՊԵԿԻՆՈՒՄ
Պեկինում մեկնարկել է Չինաստանի կոմունիստական կուսակցության 20-րդ համագումարը, այն կամփոփվի հոկտեմբերի 22-ին: Շուրջ 2300 պատվիրակ կքննարկի վերջին հինգ տարում երկրի ձեռքբերումները և կհաստատի Չինաստանի զարգացման նպատակներն ու խնդիրներն առաջիկա հինգ տարվա համար։
Համագումարի ընթացքում պատվիրակները կընտրեն Չինաստանի կոմունիստական կուսակցության կենտրոնական կոմիտեի և կենտրոնական հանձնաժողովի նոր կազմը։
20-րդ համագումարի բացման արարողությանը հաջորդել է Չինաստանի կոմունիստական կուսակցության կենտրոնական կոմիտեի գլխավոր քարտուղար, նախագահ Սի Ծինփինի ելույթը: Նա համոզմունք է հայտնել, որ Չինաստանի և Թայվանի վերամիավորումը չի կարող կասկածի տակ դրվել, ընդգծել՝ իշխանությունը ձգտում է խաղաղ վերամիավորման, սակայն արտաքին ուժերի միջամտության դեպքում կդիտարկվի նաև ուժի կիրառման հնարավորութունը։
Նա տեղեկացրել է, որ Չինաստանը մտադիր է արագացնել բանակի արդիականացումը և շարունակել պաշտպանական ոլորտում կոռուպցիայի դեմ պայքարը:
«Կոռուպցիան ամենամեծ քաղցկեղն է, որը վտանգում է կուսակցության կենսունակությունը»,- ասել է նախագահը:
Սի Ծինփինը նաև ընդգծել է, որ իշխանությունների առաջնահերթություններից մեկը Չինաստանը տեխնոլոգիական և արդյունաբերական հզոր տերություն դարձնելն է։
