ՀՐԹԻՌԱԿՈԾՈՒԹՅՈՒՆ ՈՒԿՐԱԻՆԱՅՈՒՄ. ԿԱՆ ԶՈՀԵՐ ԵՎ ՎԻՐԱՎՈՐՆԵՐ
Այսօր առավոտյան Կիևի կենտրոնում պայթյուններ են որոտացել: Օդային տագնապ է հայտարարվել Ուկրաինայի ամբողջ տարածքում: «Հրթիռակոծությունը շարունակվում է: Կան զոհեր և վիրավորներ»,- գրել է Զելենսկին Տելեգրամի իր ալիքում: Կիևի քաղաքապետ Վիտալի Կլիչկոն հայտնել է Շևչենկոյի շրջանում չորս պայթյունի մասին։ Այդտեղ են գտնվում Ուկրաինայի նախագահի և ԱԱԾ գրասենյակները։ Կլիչկոն հայտնել է, որ դեպքի վայրում աշխատում են արտակարգ իրավիճակների հատուկ ծառայությունները։
Լրատվամիջոցները հայտնում են, որ պայթյուններ են տեղի ունեցել Ուկրաինայի տարբեր շրջաններում: Ուկրաինայի ՆԳՆ-ն հայտարարել է, որ օդային հարվածների հետևանքով Լվովի և Տերնոպոլի որոշ շրջաններ մնացել են առանց էլեկտրականության:
ՔՆՆԱՐԿՎԵԼ Է ՌԴ-Ի ՆԿԱՏՄԱՄԲ ՃՆՇՈՒՄՆԵՐԻ ՄԵԾԱՑՄԱՆ ՀԱՐՑԸ
ԱՄՆ նախագահը և Գերմանիայի կանցլերը հեռախոսազրույցի ընթացքում քննարկել են Ռուսաստանի նկատմամբ ճնշումների մեծացման ու Ուկրաինային շարունակական աջակցության հարցը։ Ջո Բայդենը և Օլաֆ Շոլցը քննարկել են համաշխարհային էներգետիկ շուկայում տիրող իրավիճակը և նշել էներգակիրների մատչելի մատակարարման կարևորությունը։
Միացյալ Նահանգների նախագահ Ջո Բայդենի ավելի վաղ արած զգուշացումը՝ Կուբայի ճգնաժամից հետո «Արմագեդոնի» ամենաբարձր ռիսկի մասին, պատերազմի բարձր խաղադրույքների արտահայտություն է և ոչ թե հետախուզական տեղեկատվության, հայտարարել Ազգային անվտանգության խորհրդի պաշտոնական ներկայացուցիչ Ջոն Քիրբին։ «Նախագահը մտածում էր, որ այժմ խաղադրույքները բարձր են՝ հաշվի առնելով այն, ինչ տեղի է ունենում Ուկրաինայում մարտի դաշտում, և շատ անպատասխանատու ու անխոհեմ մեկնաբանությունները, որոնք Վլադիմիր Պուտինը արել է վերջին մի քանի օրվա ընթացքում»,- մեկնաբանել է Ազգային անվտանգության խորհրդի պաշտոնական ներկայացուցիչը:
ԵՎՐՈՊԱՆ ԴԺՎԱՐՈՒԹՅՈՒՆՆԵՐԻ ԿԲԱԽՎԻ ՌԴ ԳԱԶԻ ՊԱՏՃԱՌՈՎ. ԷՐԴՈՂԱՆ
Եվրոպական երկրները դժվարությունների կբախվեն Ռուսաստանից գազի մատակարարումների սահմանափակման պատճառով՝ հայտարարել է Թուրքիայի նախագահ Ռեջեփ Թայիփ Էրդողանը Թուրքիայի երիտասարդական հիմնադրամի անդամների հետ Ստամբուլում կայացած հանդիպմանը։ էրդողանը հավելել է, որ Թուրքիան ջեռուցման հետ կապված խնդիրներ չի ունենա, քանի որ երկիրը բավականաչափ բնական գազի ու ածխի պաշարներ է կուտակել։ Ուկրաինայում հատուկ գործողության մեկնարկից հետո Արևմուտքը ուժեղացրել է պատժամիջոցների ճնշումը Մոսկվայի վրա, ինչը հանգեցրել է Եվրոպայում և ԱՄՆ-ում էլեկտրաէներգիայի, վառելիքի և սննդամթերքի գների բարձրացման:
ԻՐԱՆԸ ԴԵՄ Է ԿՈՂՄԵՐԻՑ ՈՐԵՎԷ ՄԵԿԻՆ ԶԻՆԵԼՈՒՆ. ԻԻՀ ԱԳ ՆԱԽԱՐԱՐ
Իրանը դեմ է ուկրաինական պատերազմի կողմերից որևէ մեկին զինելուն՝ հայտարարել է Իրանի ԱԳ նախարարը: Լեհաստանի փոխարտգործնախարարի հետ Թեհրանում կայացած հանդիպման ժամանակ, անդրադառնալով Ուկրաինայի պատերազմին, Աբդոլլահիանն ասել է, որ Իրանը պատերազմի կողմերից ոչ մեկին զենք չի տրամադրել։
ՄՏԱԴԻՐ ՉԵՆՔ ԲԱՆԱԿՑԵԼ ԱՄՆ-Ի ԵՎ ԿՈՐԵԱՅԻ ՀԵՏ. ԿԻՄ ՉԵՆ ԸՆ
Հյուսիսային Կորեայի առաջնորդը հայտարարել է, որ մտադիր չէ բանակցել ԱՄՆ-ի և Կորեայի Հանրապետության հետ: Կիմ Չեն Ընը նշել է, որ ԱՄՆ-ի և «Հարավային Կորեայի ռեժիմի» կողմից «լարվածության սրմանն ուղղված մշտական, կանխամտածված և անպատասխանատու քայլերը միայն ավելի խիստ արձագանք կունենան Փհենյանի կողմից: Նա վստահություն է հայտնել, որ երկրի միջուկային ուժերը լիովին պատրաստ են պատասխան գործողությունների և հասկանում են, որ իրենց առաքելությունն է պաշտպանել հանրապետության արժանապատվությունը, ինքնիշխանությունը և նրա գոյության իրավունքը: Երեկ Հյուսիսային Կորեան ևս երկու բալիստիկ հրթիռ է արձակել: Սեուլն և Տոկիոն հայտարարել են, որ դա յոթերորդն է սեպտեմբերի 25-ից ի վեր:
