ՀԱՅ ՌԱԶՄԱԳԵՐԻՆԵՐԻ ՄԱՀԱՊԱՏԻԺԸ՝ ՊԱՏԵՐԱԶՄԱԿԱՆ ՀԱՆՑԱԳՈՐԾՈՒԹՅՈՒՆ
Ադրբեջանցի զինծառայողների կողմից հայ ռազմագերիների մահապատիժը միջազգային մարդասիրական իրավունքի խախտում է, պատերազմական հանցագործություն՝ հայտարարել է Ֆրանսիայի արտգործնախարարը:
Կատրին Կոլոննա (Ֆրանսիայի ԱԳ նախարար) - Եվ նման դեպքերում անպատժելիություն չի կարող լինել։ Ֆրանսիան իր համերաշխությունն է հայտնում հայ ժողովրդին: Ֆրանսիան նաև կոչ է արել անհապաղ անաչառ և անկախ հետաքննություն սկսել՝ բացահայտելու այդ գործողությունների մեղավորներին ու ապահովելու, որ վերջիններս պատասխանատվության ենթարկվեն:
Ադրբեջանի վերջին զինված ներխուժումները Հայաստան շատ լուրջ են։ Հանրապետության նախագահն անմիջապես կապվել է իր հայ և ադրբեջանցի գործընկերների հետ՝ կոչ անելով դադարեցնել մարտական գործողությունները, հարգել Հայաստանի տարածքային ամբողջականությունը, Ադրբեջանին հորդորել հետ քաշվել զավթած դիրքերից:
Հայաստանի միջազգայնորեն ճանաչված տարածքում տեղի ունեցած իրադարձությունները ցույց տվեցին նաև, որ Ռուսաստանը չի կարող խաղալ միակ միջնորդի դերը, որին նա հավակնում էր 2020 թ. պատերազմից հետո:
Ֆրանսիայի ԱԳ նախարարը ընդգծել է, որ Ֆրանսիան կշարունակի աշխատել այս ճգնաժամի խաղաղ և բանակցային ճանապարհով կարգավորման համար, մասնավորապես՝ ուղարկելով ԵԱՀԿ փաստահավաք առաքելություն, ինչի հետ կապված ջանքեր են գործադրվում:
ՌԴ-Ն ԱՋԱԿՑՈՒՄ Է ԽԱՂԱՂՈՒԹՅԱՆ ԱՊԱՀՈՎՄԱՆ ՔԱՅԼԵՐԻՆ. ԿՈՊԻՐԿԻՆ
Հայաստանում Ռուսաստանի դեսպան Սերգեյ Կոպիրկինը շահարկումներ է որակել պնդումները, թե Ռուսաստանը երես է թեքում Հայաստանից և Հարավային Կովկասից։ Արձագանքելով Պրահայում Հայաստանի վարչապետ Նիկոլ Փաշինյանի և Թուրքիայի նախագահ Ռեջեփ Էրդողանի հնարավոր հանդիպման մասին լուրերին՝ Կոպիրկինն ընդգծել է՝ Մոսկվան միշտ հայտնել է իր պատրաստակամությունը՝ աջակցելու երկրների միջև հարաբերությունների կարգավորման գործընթացին։
Սերգեյ Կոպիրկին (Հայաստանում ՌԴ արտակարգ և լիազոր դեսպան) - Աջակցում ենք բոլոր քայլերին, գործընթացներին, որոնք թույլ կտան խաղաղություն ապահովել, կկանխեն բռնության դրսևորումները, ուժի կիրառումը, էսկալացիան և հիմք կդառնան տարածաշրջանի անվտանգ և խաղաղ զարգացման համար: Մեզ համար կարևոր է, որ այս տարածաշրջանը նպաստի հարավկովկասյան և միջազգային տնտեսական գործընթացներին: Ռուսաստանի համար դա կենսական նշանակություն ունի: Հարավային Կովկասի տարածաշրջանը մեր հարևանն է, հետևաբար ցանկացած պնդում, թե Ռուսաստանը երես է թեքում տարածաշրջանից, Հայաստանից, ոչ այլ ինչ է, քան շահարկում, հայտարարում եմ դա պաշտոնապես և միանգամայն հստակ։
Դեսպանը ևս մեկ անգամ ողջունել է այն փաստը, որ Երևանը և Բաքուն քաղաքական կամք են դրսևորում՝ հաղթահարելու առկա մարտահրավերները: Նա ընդգծել է, որ ռուս զինվորականները, խաղաղապահները և սահմանապահները կապի մեջ են երկու երկրի հետ և աշխատում են հետագա էսկալացիաները կանխելու ուղղությամբ։
Կոպիրկինն անդրադարձել է նաև Հայաստանում ՀԱՊԿ առաքելության արդյունքներին, հիշեցրել՝ կառույցի գլխավոր քարտուղար Ստանիսլավ Զասն անցած շաբաթ հանդիպել է ՀՀ վարչապետ Նիկոլ Փաշինյանի հետ և ներկայացրել ՀԱՊԿ պատվիրակության գնահատականներն ու առաջարկները:
«Կարծում եմ՝ խոսքը կոնկրետ քայլերի մասին է, որոնք պետք է գործնականում ցույց տան ՀԱՊԿ ներկայությունը և դերը տարածաշրջանում»,- նշել է նա EXPO Rusia Armenia 2022 ֆորումի շրջանակում։
ԹՈՒՐՔԻԱՆ ԲԱՆԱԿՑՈՒԹՅՈՒՆՆԵՐՈՒՄ ՀԱՇՎԻ Է ԱՌՆՈՒՄ ԲԱՔՎԻ ՇԱՀԸ. ԱՔԱՐ
Թուրքիան Հայաստանի հետ բանակցությունները վարում է՝ հաշվի առնելով Բաքվի իրավունքները և շահերը՝ Ադրբեջան կատարած այցի շրջանակում հայտարարել է Թուրքիայի պաշտպանության նախարար Հուլուսի Աքարը: Նա նշել է, որ Ադրբեջանն ու Թուրքիան ակտիվորեն գործակցում են ռազմական կրթության և պաշտպանական արդյունաբերության ոլորտներում, միաժամանակ ընդգծել՝ այդ գործընկերությունն ուղղված չէ երրորդ երկրների դեմ: Աքարի խոսքով՝ Անկարան հանդես է գալիս բարօրության և խաղաղության հաստատման օգտին:
ԲԼԻՆՔԵՆԸ ՈՂՋՈՒՆԵԼ Է ՌԱԶՄԱԳԵՐԻՆԵՐԻ ԱԶԱՏ ԱՐՁԱԿՈՒՄԸ. ՓՐԱՅՍ
ԱՄՆ պետքարտուղարը երախտագիտություն է հայտնել Երևանին և Բաքվին՝ կայուն խաղաղության պայմանագրի ձեռքբերման ուղղությամբ դրական քայլերի համար՝ հայտարարել է պետքարտուղարության խոսնակ Նեդ Փրայսը՝ մեկնաբանելով Էնթոնի Բլինքենի հեռախոսազրույցը Հայաստանի և Ադրբեջանի արտգործնախարարների հետ:
«Պետքարտուղար Էնթոնի Բլինքենն այսօր եռակողմ ձևաչափով զրուցել է Արարատ Միրզոյանի և Ջեյհուն Բայրամովի հետ։ Պետքարտուղարը ողջունել է ռազմագերիների ազատ արձակումը և վերահաստատել Վաշնգտոնի հանձնառությունը՝ օգնելու Հայաստանին և Ադրբեջանին առկա խնդիրները լուծել խաղաղ ճանապարհով, և ընդգծել է, որ առաջընթացի միակ ճանապարհը դիվանագիտությունն է»,- ասված է Փրայսի հաղորդագրության մեջ։
ՄԵԾ ԲՐԻՏԱՆԻԱՆ ՈՂՋՈՒՆԵԼ Է 17 ՌԱԶՄԱԳԵՐՈՒ ԱԶԱՏ ԱՐՁԱԿՈՒՄԸ
Մեծ Բրիտանիայի կառավարությունը ողջունում է Ադրբեջանի կողմից 17 հայ ռազմագերու ազատ արձակումը՝ հայտնել են Հայաստանում Բրիտանիայի դեսպանատնից:
«Խրախուսում ենք կողմերին չլուծված բոլոր խնդիրները կարգավորել դիվանագիտական միջոցներով, այդ թվում՝ քննարկել անհայտ կորածների ճակատագրերը և ապահովել բոլոր ռազմագերիների վերադարձը»,- ասված է դեսպանատան հայտարարության մեջ:
