Մինչև հոկտեմբերի 1-ը դեռ կարելի է համեմատաբար մեծ ծավալի անմաքս առցանց առևտուր անել: Եվրասիական տնտեսական հանձնաժողովի խորհրդի որոշման հիմքով Հայաստանում ֆիզիկական անձանց կողմից անձնական օգտագործման համար առցանց անմաքս առևտրի թույլատրելի շեմը մարտի 31-ից վեց ամսով սահմանվել է 200 հազար դրամ՝ նախկին 200 եվրոյի փոխարեն: Պետական եկամուտների կոմիտեից հստակեցնում են՝ պատվերներ քաղաքացիները կարող են անել ոչ թե ամիսը մեկ անգամ, այլ յուրաքանչյուր օր:
Գարիկ Մինասյան (ՀՀ ՊԵԿ արևմտյան մաքսատուն-վարչության պետ) - Ֆիզիկական անձանց հնարավորություն ա ընձեռված, որ առանց սահմանափակումների քանակական իրենք կարող են ներմուծել իրենց կողմից ձեռք բերված առաքանիները էլեկտրոնային գնման արդյունքում, այսինքն՝ ֆիզիկական անձը կարող է օրվա մեջ մի քանի տարբեր կայքերից գնումներ իրականացնել և այդ առաքանիները ներմուծել ՀՀ: Մենք արտոնության սահմանաչափը կիրառում ենք յուրաքանչյուր առաքանու մասով:
ՊԵԿ արևմտյան մաքսատուն-վարչության պետը նշում է՝ ֆիզիկական անձինք առցանց գնում են հիմնականում հագուստ, տեխնիկա, հատկապես բջջային հեռախոսներ, համակարգիչներ:
Գարիկ Մինասյան - Քանի որ դա ֆիզիկական անձանց համար ավելի ձեռնտու տարբերակ էր՝ օնլայն գնել ու ներմուծել այդ ապրանքները, օրինակ՝ եթե բջջային հեռախոսի արժեքը 1000 դոլար է, նախկինում ֆիզիկական անձը վճարում էր մոտ 57 հազար դրամ մաքսային վճար, իսկ հիմա վճարում է 30 հազար դրամ, դա պայմանավորված է երկու հանգամանքով, որ 200 եվրոյի շեմը դառնում է 200 հազար դրամ, և երկրորդը՝ փոխարժեքը նախկինում 1 դոլարը 490 դրամ էր, հիմա 1 ԱՄՆ դոլարը 410 դրամի կարգի է:
Կան ապրանքատեսակներ, որոնք անձնական օգտագործման չեն կարող դիտարկվել. այդ դեպքում արտոնությունները չեն կիրառվում՝ նշում է Գարիկ Մինասյանը: Խոսքը վերաբերում է, օրինակ՝ բժշկական սարքավորումներին կամ 200-ից ավելի հատիկով ապրանքներին: Պետեկամուտների կոմիտեն վերահսկողություն է իրականացրել՝ պարզելու համար՝ մարդը անձնակա՞ն, թե՞ այլ, բիզնես նպատակներով է գնումներ կատարում, քանի որ մաքսային արտոնությունը այդ պարագայում չի գործում: Պարզվում է՝ օրենքը շրջանցելու փորձերը բազմաթիվ են եղել:
Գարիկ Մինասյան - Այդ ամենը մեր կողմից բացահայտվել է, այդ ապրանքները չեն դիտարկվել անձնական օգտագործման նպատակով ներմուծված, ֆիզիկական անձանց համար չեն կիրառվել այդ արտոնությունները, և նրանք ներկայացրել են ապրանքների հայտարարագրեր, այսինքն՝ ոչ անձնական օգտագործման համար ներմուծված ապրանքների համար հայտարարագրեր, հարկը ամբողջությամբ վճարել են, և արտոնությունները նրանց համար չեն կիրառվել:
Եղել են նաև դեպքեր, երբ քաղաքացիները օնլայն գնած և ներմուծած ապրանքները փորձել են վաճառել տարբեր կայքերի միջոցով: Նման խարդախություններն էլ բացահայտվել են, և մաքսային վճարները գանձվել են ամբողջությամբ՝ վստահեցնում է Արևմտյան մաքսատուն-վարչության պետը:
Գարիկ Մինասյան - Որպես անձնական օգտագործման ապրանքներ մենք գանձել ենք 476 մլն դրամ մաքսային վճարներ մինչև օգոստոսի 20-ը ներառյալ և 2022-ին որպես ոչ անձնական նպատակով ապրանքներ մենք գանձել ենք 441 մլն դրամի մաքսային վճարներ, առաքանիները 1 մլն 243 հազար հատ, որոնցից մի մասը՝ որպես անձնական, մի մասը՝ ոչ անձնական օգտագործման ապրանքներ:
Այս տարի, նախորդ տարվա համեմատ, առցանց գնումներից քիչ մաքսային վճարներ են գանձվել՝ քանի որ 200 եվրոյի փոխարեն գործում է 200 հազար դրամ չհարկվող շեմ, փոխարենը շահել են օնլայն գնումներ արած քաղաքացիները: Արդյոք արտոնության ժամկետը կերկարացվի՞ հոկտեմբերի 1-ից հետո՝ դեռ հայտնի չէ:
