Արգավանդ-Շիրակ ճանապարհահատվածի կառուցումից հետո կկարողանան խնայել 10 անգամ քիչ ժամանակ: 25 րոպեի փոխարեն գնալու ենք 3 րոպեում:
Աշխատանքների մեկնարկից 3 տարի անց զրոյից կառուցված կամուրջը պատրաստ է ընդունելու ու ճանապարհելու մեքենաներ:
Առաջինը ջրցան մեքենան, ապա կամրջի կառուցմանը մասնակցած տեխնիկան է անցնում ճանապարհով: Ապա վարչապետի շարասյունը:
Հրաչյա Սարգսյան (Երևանի քաղաքապետ) - Մեր նորանկախ պատմության մեջ երևի առաջին կամուրջն է, որ զրոյից է կառուցվել:
Գնել Սանոսյան (ՀՀ տարածքային կառավարման և ենթակառուցվածքների նախարար) - Նշանակությունը երկակի կարող ենք բացատրել՝ երթևեկության մեծ բեռ կվերցնի իր վրա, և երկրորդը՝ կազմում է մի մեծ ճանապարհի մի փոքր մաս, հարավից հյուսիս գնալիս այլևս Երևանի խցանումները չխանգարեն:
Այս կամրջի նախագիծը մշակվել է 2012 թ., բայց շինարարությունը մեկնարկեց միայն 2019 թ., երբ ավելի քան 26 մլն դոլարի պայմանագիր կնքվեց Երևանի քաղաքապետարանի և իսպանական ընկերության միջև:
Հրաչյա Սարգսյան - Ամբողջ գումարը պետության կողմից է հատկացվել վարկային միջոցներով:
Արգավանդ-Շիրակ ճանապարհահատվածը մաս է կազմում Երևանի արևմտյան օղակաձև ճանապարհի, կապում է Մալաթիա-Սեբաստիա և Շենգավիթ վարչական շրջանները:
Հրաչյա Սարգսյան - Ճիշտ է, այս պահին Շիրակի փողոցում խնդիր կա, ճանապարհ կա՝ մի քիչ նեղ է, բայց համապատասխան ծրագրեր ենք նախապատրաստում, որ այդ խնդիրը լուծենք:
Քաղաքապետն ավելացնում է՝ մի քանի ամիս անց, երբ ավարտած կլինեն նաև Աշտարակ-Բաբաջանյան ճանապարհահատվածը, արդեն այս կամրջով Աշտարակից Արտաշատ գնալու համար Երևանը կշրջանցեն:
Նախագծողը ժպտում է՝ այն, ինչ տեսնում է, իր պատկերացրածն է:
Ֆաբրիցիո Կոլիչինյո (կամրջի նախագծող) - Տեխնոլոգիան նոր չի, բայց նման տեխնոլոգիայով կառուցված առաջին կամուրջն է Հայաստանում, առանձնահատկությունն այն է, որ երկաթբետոնե կոնստրուկցիաներով է կառուցված, մեկ թռիչքային է՝ թռիչքը 300 մ:
Շիխին Չեն (Ասիական զարգացման բանկի փոխնախագահ) - Ես ուրախ եմ այսօր այստեղ գտնվել՝ այս արևոտ օրը, հրաշալի աշխատանք է արված:
Սա արդեն Ասիական զարգացման բանկի փոխնախագահի արձագանքն է: Նշում է՝ Հայաստանի հետ գործակցությունը 17 տարուց ավելի է ու շարունակվելու է: Քաղաքային կայուն զարգացման ներդրումային ծրագրի ղեկավարը վարչապետին մի քանի ծրագիր է ներկայացնում, որոնց իրականացումը պետության աջակցությամբ օրակարգային է:
Նորա Մարտիրոսյան (Քաղաքային կայուն զարգացման ներդրումային ծրագրի ղեկավար) - Իսակով-Արշակունյացը, ավտոբուսային հավաքակայանը, հա՛, հենց նոր քաղաքապետի հետ դա էինք խոսում:
Երևանի քաղաքապետը նշում է՝ մինչև տարեվերջ նախատեսում են Արշակունյաց-Իսակովի կամուրջ կառուցելու համար մրցույթ հայտարարել, իսկ դա կնշանակի՝ Երևանը կունենա վեց կամուրջ և կբեռնաթափվի:
Գնել Սանոսյանը նշում է՝ այս կամուրջը վերջին տարիներին իրականացված բացառիկ նախագիծն է, որը շինարարության մեկնարկից մինչև ավարտ բարդություններ գրեթե չի ունեցել:
Գնել Սանոսյան - Եղածն էլ արագ կարգավորվեց՝ ֆինանսական, շինարարական, տեխնիկական:
Հրազդան գետի վրա 252 մ երկարությամբ և 28 մետր լայնությամբ մետաղական կամուրջը երթևեկելի 6 գոտի ունի:
Ճանապարհի ամբողջ երկարությունը 2.7 կմ է, միջին լայնությունը` 26 մ: Շիրակի փողոցի հետ հատման վայրում կառուցվել է նաև օղակաձև երթևեկությամբ ճանապարհային հանգույց։ Ճանապարհի բոլոր հաղորդուղիները տեղափոխվել են, մայթերի տակ անցկացվել են կապի ստորգետնյա խողովակներ, տեղադրվել են LED տիպի էներգախնայող լուսատուներ:
Ի դեպ, Արգավանդ-Շիրակ ճանապարհահատվածի կառուցման աշխատանքների իրականացման շրջանակում 265 մլն դրամի փոխհատուցում է տրամադրվել 26 տնային տնտեսության:
Հեղինակ՝ Իրինա Մկրտչյան
