Գների, մակրոտնտեսական, ֆինանսական կայունություն, սպառողների շահերի պաշտպանություն. սրանք այն ոլորտներն են, որոնք ԿԲ-ն դիտարկել է որպես առաջնահերթություն և ներառել նախորդ տարեվերջին հաստատված ռազմավարության հիմքում: ԿԲ նախագահի տեղակալ Ներսես Երիցյանը վստահեցնում է՝ կառույցի, ինչպես նաև ռազմավարության գլխավոր նպատակներից է քաղաքացիների բարեկեցությունը:
Ներսես Երիցյան (ՀՀ ԿԲ նախագահի տեղակալ) - Մեր կենտրոնացումը լինելու է գների և ֆինանսական կայունության վրա, և դրանով իսկ նպաստելու ենք բարեկեցության ավելացմանը:
Ըստ ռազմավարության ու տեսլականի, գլխավոր դրամատունը պետք է լինի աշխարհի առաջատար ԿԲ-ներից մեկը, ինչը հնարավոր կլինի իրականացնել խոր հետազոտությունների արդյունքում: Ըստ Երիցյանի՝ այս ամենին հնարավոր կլինի հասնել, երբ քաղաքացիների փոխադարձ շփումն ակտիվանա, գլխավոր դրամատան գործողություններն էլ ընկալելի լինեն հանրությանը:
Ներսես Երիցյան - Որքան մեր քաղաքականության շրջանակը՝ դրամավարկային քաղաքականության շրջանակը, թե ինչպես ենք կանխատեսում գնաճը, ինչ գործոններ ենք հաշվի առնում, որքան դրա ընկալումը մեծանա, այնքան մեր քաղաքականության արդյունավետությունը կբարձրանա, որովհետև մարդիկ մեզ կվստահեն, և եթե մենք ասում ենք, որ գնաճի կանխատեսումն այսպիսին է, բնականաբար, վարքագիծն էլ կլինի այդպիսին, և բոլորս ավելի քիչ ծախսերով կկարողանանք քաղաքականություն իրականացնել:
Հայաստանի քաղաքացիները ֆինանսական գրագիտությունը բարելավելու կարիք ունեն դեռ՝ շարունակում է Երիցյանը: Այսօր, շատերի ընկալմամբ, ինչ ասում են բանկերն ու ֆինանսական այլ կառույցներ, դառնում է պայման: Եվ միայն ֆինանսական կրթվածության շնորհիվ հնարավոր կլինի պաշտպանել սեփական շահերը՝ օգտագործելով արդեն իսկ աշխատող տարբեր ինստիտուտներ: ԿԲ նախագահի տեղակալը մանրամասնում է՝ բանկերը միայն վարկ տվող ու ավանդ վերցնող կառույցներ չեն, ունեն հարյուրավոր այլ հնարավորություններ, որոնցից շատերը չեն օգտվում:
Ներսես Երիցյան - Զուտ բանկային ծառայությունների մասով՝ վճարումներդ ինչպես կատարես, բյուջեդ ինչպես, վարկդ երբ վերցնես, մարումներդ ոնց պլանավորես, դրանք էապես ազդում են քո եկամուտների և ծախսերի հաշվեկշռի վրա:
ԹՎԱՅՆԱՑՈՒՄԸ՝ ԶԱՐԳԱՑԱԾ ՖԻՆԱՆՍԱԿԱՆ ՀԱՄԱԿԱՐԳԻ ԳՐԱՎԱԿԱՆ
Զարգացած ֆինանսական համակարգ ունենալու համար պետք է զարգացնել նաև տեխնոլոգիաների կիրառումն ու թվայնացումը՝ նշում է Երիցյանը, և սա անխուսափելի է:
Ներսես Երիցյան - Հիմա մենք գնում ենք մի բանկ մի հաշիվ ենք բացում, մյուս բանկից վարկ կարող ենք վերցնել, մի տեղից ապահովագրություն, թվայնացման ամբողջ նպատակն այն է, որ իմ տվյալները, որպես անձ, սեփականությունը իմն է, և բոլոր ինստիտուտները ինձ էդ ծառայությունը մատուցում են, այսինքն՝ հասարակ հեռախոսային հավելվածի միջոցով ես կարող եմ ինտեգրել բոլոր ֆինանսական ինստիտուտները, այդ թվում՝ աշխարհում եթե ես ունեմ ծառայություններ, դրանց ամբողջական ինտեգրումը մեկ հարթակի վրա ինձ համար:
ԿԲ-ն ու Կառավարությունը համատեղ աշխատում են նաև ազգային մակարդակով թվայնացման ուղղությամբ: Այստեղ հիմքում նույնականացումն է, որով թվային միջավայրում անձը նույնականացված կլինի բոլոր պետական ու, անհրաժեշտության դեպքում, նաև մասնավոր կառույցների համար, միաժամանակ կիբեռանվտանգության զարգացման միջոցով կլինի պաշտպանված: Նույնականացման մասով օրակարգն արդեն ձևավորված է՝ նշում է ԿԲ նախագահի տեղակալը: Այս ամենին զուգահեռ՝ գլխավոր դրամատունը դիտարկում է նաև թվային արժույթի ներդրման նպատակահարմարությունը:
Ներսես Երիցյան - Սա մենք դիտարկում ենք վճարահաշվարկային և երկրների միջև համաշխարհային փոխգործելիություն ապահովելու տեսակետից: Միջազգային կառույցները աշխատում են, տարբեր ստանդարտացման կառույցներում համատեղ աշխատում ենք, որ հասկանանք՝ աշխարհի դինամիկան ինչպիսին է, ուր է գնում աշխարհը, և մենք կարողանանք լավագույն լուծումը դնել, որովհետև եթե մենք միջակ լուծում ենք տեսնելու, դա խնդիր է:
Թվայնացումը էապես կնվազեցնի նաև վերահսկողության ծախսերը՝ ընդգծում է Երիցյանը: ԿԲ նախագահի տեղակալն անդրադառնում է նաև գնաճի ու տնտեսական աճի նոր կանխատեսումներին, ասում է՝ այս պահին դեռ աշխատում են կանխատեսումների վրա, շուտով կավարտեն ու կհրապարակեն: Հավելում է՝ իրավիճակը վերահսկվում է ու կայուն է, հետևում են միջազգային զարգացումներին: